ބޯހިޔާވަހިކަމުގެ މަޝްރޫއުތައް ނުހިނގާ ހުއްޓިފައި އޮތް މައްސަލައިގައި ހައުސިން މިނިސްޓަރު އަބްދުالله މުއްތަލިބުއާ ބައްދަލު ކުރުމަށް އިދިކޮޅު އެމްޑީޕީގެ ޕީޖީ ގްރޫޕް މެންބަރުން ދަރުބާރުގެއަށް ދިޔުމުން ވެސް އެތަނުގެ ވެރިން އެމީހުންނާ ބައްދަލުނުކުރި ކަމަށް އެމްޑީޕީން ބުނެފި އެވެ.
އެ ޕާޓީގެ ޕީޖީ ގްރޫޕުގެ މެންބަރުންނާއި އާންމު މެންބަރުން މިއަދު ހައުސިން މިނިސްޓްރީ ދޮށަށް ދިޔައީ ހެނދުނު 10:30 ގަ އެވެ. އެމްޑީޕީގެ ޕީޖީ ގްރޫޕުގެ މެންބަރުން އެތަނަށް ދިޔައީ ހައުސިން މިނިސްޓަރާ ބައްދަލު ކުރުމަށެވެ.
ހައުސިން މިނިސްޓްރީ ދޮށަށް ދިޔަ ސަބަބު ކިޔައިދެއްވަމުން ކެންދޫ ދާއިރާގެ މަޖިލިސް މެންބަރު، މައުރޫފް ޒާކިރު ވިދާޅުވީ ރާއްޖޭގެ އެކި ކަންކޮޅުގައި ހިންގަން ފަށާފައި ހުރި މަޝްރޫއުތައް ކުރިއަށް ނުދާ މައްސަލައިގައި ހައުސިން މިނިސްޓަރު، އަބްދުالله މުއްތަލިބު މަޖިލީހަށް ހާޒިރު ކުރަން އެދުނުތާ ވެސް އެތައް މަހެއް ފާއިތުވެގެން ގޮސްފައިވާއިރު ވެސް އޭނާ މަޖިލީހަށް ހާޒިރުވެފައި ނުވާ ކަމަށެވެ.
އަދި އެމްޑީޕީގެ ޕީޖީ ގްރޫޕުން ހައުސިން މިނިސްޓަރާ ބައްދަލު ކުރުމަށް ތަކުރާރުކޮށް އެދުމުން ވެސް ބައްދަލު ކުރައްވާފައި ނުވާ ކަމަށް މައުރޫފް ވިދާޅުވި އެވެ.
"ހާއްސަކޮށް ރާއްޖޭގެ ގެދޮރުވެރިކަމާއި ބޯހިޔާވަހިކަމާއި ފްލެޓުތަކާއި ގޯތި ދިނުމާއި ބިން ހިއްކުމާއި މިހެން ގުޅުންހުރި ގިނަ މައްސަލަތަކެއް އަދި އަޅުގަނޑުމެންގެ ދާއިރާތަކުގައި ވެސް ނުހިނގާ ހުއްޓިފައި ހުރި މައްސަލަތަކާއި މަޝްރޫއުތަކާ ބެހޭ ގޮތުން ބައްދަލު ކޮށްލުމަށް، އެހެންނަމަވެސް މިއަދާ ހަމައަށް ތިން މަސްދުވަސް ވެގެންދިޔައިރު ވެސް ބައްދަލުވުމެއް އަޅުގަނޑުމެންނަށް ލިބިފައި ނުވާތީ އަޅުގަނޑުމެން މިއަދު މިއައީ އަޅުގަނޑުމެންގެ ސަޕޯޓަރުންނާއެކު ވަޒީރުއާ ބައްދަލު ކުރެވޭނެ ކަމުގެ އުއްމީދުގައި،" މައުރޫފް ވިދާޅުވި އެވެ.
ނަމަވެސް އެތަނަށް ގޮސް އެތައް އިރެއްވީއިރު ވެސް މުއްތަލިބު އެމީހުންނާ ބައްދަލު ނުކުރި ކަމަށް މައުރޫފް ވިދާޅުވި އެވެ. އަދި އެމްޑީޕީ މެންބަރުން ހައުސިން މިނިސްޓްރީ ތެރެއަށް ވަދެ ބައްދަލުވުމަކަށް އެދުމުން ވެސް ބައްދަލު ނުކުރި ކަމަށް މައުރޫފް ވިދާޅުވި އެވެ.
އެކަމާ ގުޅޭގޮތުން ވާހަކަދައްކަވަމުން ވައިކަރަދޫ ދާއިރާގެ މަޖިލިސް މެންބަރު، ހުސެއިން ޒިޔާދު (ފިއްޓެ) ވިދާޅުވީ ހައުސިން މިނިސްޓްރީގައި 50 އެއްހައި ސިޔާސީ މުވައްޒަފުން ތިއްބަވާއިރު، އޭގެތެރެއިން އެއްވެސް ބޭފުޅަކު އޮފީހަށް ވަޑައިގެން ނޫޅުއްވާ ކަމަށް އެ މިނިސްޓްރީން މައުލޫމާތު ދިން ކަމަށެވެ.
"އަޅުގަނޑުމެން އެދުނިން ވަޒީރު ނެތިއްޔާމުން ނައިބު، މުޅި މިނިސްޓްރީ އައިބުވާއިރު ނައިބުން އެބަތިބި، 30 އަކަށް 40 އަކަށް ނައިބުން އެބަތިބި، އެކަމަކު މިއަށް ޖަވާބު ދޭނެ މީހަކު، އެއްވެސް މީހަކު މިނިސްޓްރީއަކު ނެތް،" ފިއްޓެ ވިދާޅުވި އެވެ.
އެމްޑީޕީގެ ޕީޖީ ގްރޫޕާ ހައުސިން މިނިސްޓްރީގެ އެއްވެސް ބޭފުޅަކު ބައްދަލު ނުކުރުމުން އެ ޕާޓީގެ އާންމު މެންބަރުން ވަނީ އެ މިނިސްޓްރީ ދޮށުގައި އަޑު އުފުލައި މުޒާހަރާ ކޮށްފަ އެވެ.
