އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) ގެ ޕާލަމަންޓްރީ ގްރޫޕުން ފިނޭންސް މިނިސްޓްރީއަށް ގަދަ ކަމަށް ވަނުމުން ބައްދަލުކުރާނެ މީހަކު ވެސް ނުވި އެވެ.
އެމްޑީޕީގެ ޕާލަމަންޓްރީ ގްރޫޕުން ބޭއްވި ނޫސްވެރިންގެ ބައްދަލުވުމުގައި ވައިކަރަދޫ ދާއިރާގެ އެމްޑީޕީގެ މެންބަރު ހުސައިން ޒިޔާދު (ފިއްޓޭ) ވިދާޅުވީ ފިނޭންސް މިނިސްޓަރު މޫސާ ޒަމީރާ ބައްދަލުކުރަން މިނިސްޓްރީއަށް ދިޔުމުން ބައްދަލުކުރާނެ މީހަކު ނުވި ކަމަށެވެ.
"މިއަދު އަޅުގަނޑުމެން މި މަސައްކަތްކުރީ މިނިސްޓްރީގެ ބޭފުޅަކާ ބައްދަލުކުރަން. އެހެންނަމަވެސް ކަން ދިމާކުރި ގޮތުން ވަޒީރުގެ އެންގެވުމަށް މިތަނަށް އަޅުގަނޑުމެންނަށް ވެސް ނުވަދެވޭ ގޮތަށް ހަމަޖައްސާފައި އޮތީ. އެހެންނަމަވެސް މިތަނަށް މިހާރު އަޅުގަނޑުމެންނަށް ވަދެވިއްޖެ،" އޭނާ ވިދާޅުވި އެވެ.
އަދަދު އަށް އެނގިފައިވާ ގޮތުގަައި ފިނޭންސް މިނިސްޓަރު ޒަމީރު މި ވަގުތު ރާއްޖޭގައި ނޫޅުއްވަ އެވެ. ނަމަވެސް އޭނާ ހުންނެވީ ކޮން ގައުމެއްގައި ކަމެއް ކަށަވަރެއް ނުވި އެވެ.
ފިނޭންސް ކުރިމަތީގައި ބޭއްވި އިހުތިޖާޖުގައި ބައިވެރިވެ ވަޑައިގެންނެވި ކެންދޫ ދާއިރާގެ މެންބަރު، މައުރޫފް ޒާކިރު (މަޓޭ) ވިދާޅުވީ މިދިޔަ އެއް އަހަރުގެ ތެރޭގައި ފިނޭންސް މިނިސްޓަރާއި ސުވާލުކުރަން އެމްޑީޕީން 16 ސުވާލު ހުށަހަޅާފައިވާއިރު، މިހާތަނަށް ބައެއް ސުވާލުތަކަށް ޖަވާބުވެސް ލިބިފައި ނުވާ ކަމަށެވެ.
އޭނާ ވިދާޅުވީ ދިވެހި ރައްޔިތުން ތަހަންމަލުކުރާ ދަތި އުނދަގޫ ހާލަތު ގުޅިފައިވަނީ އިގްތިސާދާއި ފައިސާއާ ކަމަށްވުމުން ވާން އުޅޭ ގޮތާ ގޮތާ ގުޅޭގޮތުން ސުވާލުތައް މިނިސްޓަރާ އަމާޒުކުރަން ބޭނުންވާ ކަމަށެވެ.
ހުޅުމާލެ ދެކުނު ދާއިރާގެ މެންބަރު، އަހްމަދު ޝަމްހީދު ވިދާޅުވީ ރައްޔިތުންގެ މަޖިލީހުން މި އަހަރަށް ލަފާކޮށް ފާސްކުރި ބަޖެޓާއި ސަރުކާރުން ބަޖެޓު ހަރަދުކުރަމުންދާ ގޮތާއި އެއްވެސް ގޮތަކަށް ދިމާނުވާ ކަމަށެވެ.
"މިކަހަލަ ކަންކަމަށް ޖަވާބުދާރީ ކުރުވުމަށް މަޖިލީހުގައި މާލިއްޔަތު ކޮމިޓީ މިއޮތީ ހަދާފައި. މާލިއްޔަތު ކޮމިޓީއަށް އަދި މިއަދާ ހަމައަށް ބަޖެޓު ފާސްކުރި ފަހުން ވަޒީރެއް ހާޒިރެއް ނުވޭ. ވަޒީރު ހާޒިރުނުވާތީ އަޅުގަނޑުމެން އިސްނަގައިގެން އަޅުގަނޑުމެން މަޖިލިސް މެދުވެރިކޮށް ވަޒީރު މަޖިލީހަށް ހާޒިރު ކުރުމަށް އެތައް ސުވާލެއް ފޮނުވައިފިން. މީގެއިން އެއްވެސް ސުވާލަކަށް ޖަވާބެއް ނުދޭ،" އޭނާ ވިދާޅުވި އެވެ.
އެމްޑީޕީގެ ޕާލަމަންޓްރީ ގްރޫޕްގެ މެންބަރުންނާއި އެ ޕާޓީގެ ގައުމީ މަޖިލިސް މެންބަރުންގެ އިތުރުން އާންމު މެންބަރުން މިއަދު ހެނދުން ފެށިގެން ފިނޭންސް މިނިސްޓްރީ ދޮށުގައި އިހުތިޖާޖުކުރި އެވެ.
އިހުތިޖާޖުގެ ބައިވެރިން ހިފައިގެން ތިބި ޕޯސްޓަރުތަކުގައި ލިޔެފައިވަނީ ދައުލަތުގެ ހަޒާނާ އެއްކޮށް ލޫޓުވާލާފައިވާ ކަމަށާއި ގައުމަށް ވަންނަ ޑޮލަރު ވެސް ލޫޓުވާފައިވާ ކަމަށެވެ.
މީގެއިތުރުން އަމިއްލަ ވިޔަފާރިތައް ފުނޑާނުލައި ސަރުކާރުން އެ ވިޔަފާރިތަކަށް ދޭން ޖެހޭ ފައިސާތައް ވީހާވެސް އަވަހަށް ދޫކުރުމަށް ވެސް އެމްޑީޕީން ގޮވާލި އެވެ.
ގާނޫނުއަސާސީން ކަށަވަރު ކޮށްދީފައިވާ އަސާސީ ހައްގުތައް ރައީސުލްޖުމްހޫރިއްޔާ މުހައްމަދު މުއިއްޒުގެ ސަރުކާރުން ނިގުޅައިގަނެ ރައްޔިތުންނަށް ހިޔާނާތްތެރިވަމުން ދާތީ އެކަމާ ދެކޮޅަށް ސިލްސިލާ މުޒާހަރާތަކެއް ކުރުމަށް އެމްޑީޕީން މިދިޔަ ހަފްތާގައި ވަނީ ނިންމާފަ އެވެ.
