އިދިކޮޅު މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) ގެ ދެވަނަ ވެރިކަމުގައި މާލީ އަދި އިގުތިސޯދީ ސިޔާސަތު ހިންގީ ވެރިކަން ބަދަލުވެގެން ދެން ހަވާލުވާނީ މަކަރުވެރި، ތަންދޮރު ނުދަންނަ ބައެއް ކަމަށް ބަލައިގެން ނޫން ކަމަށް އެ ސަރުކާރުގައި މާލީ ވަޒީރަކަށް ހުންނެވި އިބްރާހިމް އަމީރު ވިދާޅުވެއްޖެ އެވެ.
މި ސަރުކާރަށް ދެ އަހަރު ހަމަވާންދާއިރު ވެސް އެއްވެސް ކަމެއް ހައްލު ކުރެވިފައި ނުވާ ކަމަށާއި އަދި ހޯދުނު ކުރިއެރުމެއް ވެސް ނެތް ކަމަށް ޕީއެންސީގެ ވާހަކަތަކަށް ރައްދު ދެއްވަމުން އަމީރު އެކްސްގައި ލިޔުއްވި އެވެ. އެ ސަރުކާރުގައި ދިމާވި ކޮވިޑުން އަރައިގަނެވުނީ ހަރުދަނާ ސިޔާސަތުތަކެއް އޮތުމުން ކަމަށް އޭނާ ލިޔުއްވި އެވެ.
"ކޮވިޑްގެ ވަބާއިން އަރައިގަނެ، އަމއްލަ ފަރުދުންނާއި ވިޔަފާރިތައް ސަލާމަތްވީ އޭރު އެޅުނު މާލީ، އިޤްތިސާދީ އަދި އިޖްތިމާއީ ފިޔަވަޅުތަކުގެ ސަބަބުން. އޭގެ ފަހުން އައި ޔުކްރެއިން-ރަޝިޔާ ހަނގުރާމައިގެ ސަބަބުން ދިމާވި ދަތިތައް ވެސް ވާނި ރައްޔިތުންނާއި ވިޔަފާރިތަކަށް އަސަރު ނުކުރާނެ ގޮތަށް މެނޭޖު ކުރެވިފައި،" އަމީރު ލިޔުއްވި އެވެ.
އެ ދަތިތަކާއެކު ވެސް ރާއްޖޭގެ ތާރީހުގައި ސަރުކާރުން ނުކުރާ މަސައްކަތްތައް ރާއްޖޭގެ ރަށްރަށުގައި ހިންގާފައިވާނެ ކަމަށް އަމީރު ވިދާޅުވި އެވެ. އޭގެ ތެރޭގައި ފެނާއި ނަރުދަމާ، މަގު ހެދުން، އެއާޕޯޓު އެޅުން، ބަނދަރު އެޅުން، ބިން ހިއްކުން، ހައުސިން ޔުނިޓުތައް އެޅުން ފަދަ މަޝްރޫއުތައް އަމީރު ފާހަގަކުރެއްވި އެވެ.
ކޮވިޑުގެ ދުވަސްވަރު ދަރަނި ނަގަން ޖެހުނީ އާމްދަނީ ދަށަށް ދިޔުމުން ކަމަށާއި އެމްޑީޕީގެ ދެވަނަ ސަރުކާރުން ނެގި 56 ބިލިއަނުގެ ތެރެއިން 19 ބިލިއަނުގެ ދަރަންޏަކީ ކޮވިޑާއެކު އިތުރުވި ދަރަނި ކަމަށް އެ ޕާޓީގެ ގައުމީ މަޖިލީހުގައި މެދު ދެކުނު ޕްރޮވިންސްގެ ރައީސްކަން ވެސް ކުރައްވާ އަމީރު ވިދާޅުވި އެވެ.
"އެ ވަރު ތި ބޭފުޅުންގެ ސަރުކާރުގެ 2 އަހަރު ނުވަނީސް މިހާރު އިތުރު ވެއްޖެ. ކުރި ކަމެއް، ހިންގި ޕްރޮޖެކްޓެއް ފެންނަ މީހެއް މި ގައުމަކު ނެތް. އަޅުގަނޑުމެންނާއި ކުރިމަތިލާން ޖެހުނު ދަތިތަކުން، އަޅުގަނޑުމެން އަރައިގަތީ ރައްޔިތުންނާއި ވިޔަފާރިތައް ސަލާމަތްކޮށްގެން. އެއާއެކު ދެން ގެންނަންޖެހޭނެ ރިފޯމްތައް ދަނެގެން،" އަމީރު ވިދާޅުވި އެވެ.
އަމީރު ވަނީ މަޖިލީހަށް ހާޒިރުވެ އެމްޑީޕީގެ ސަރުކާރުގެ މާލީ އަދި އިގުތިސާދީ ސިޔާސަތުތަކާ ގުޅޭގޮތުން ކުރިމަތިކުރަމުންދާ ސުވާލުތަކަށް ޖަވާބު ދިނުމުގެ ފުރުސަތަކަށް ވެސް އެދިވަޑައިގެންފަ އެވެ.
މޮޅު ވާހަކަ ނުދައްކާ މަޖްލިސް އަށް ގެންދަން ވީ ނު، މުޅި މަޖްލިސް ކޮމިޓީއަކަށް. ތި ބޭފުޅުންގެ 87 މެމްބަރުންނާއި، ވަޒީރުންނާއި އަދިވެސް ގެންދަން ބޭނުން އެންމެން ގެންދާނީ،" އަމީރު ވިދާޅުވި އެވެ.
ކާރިސާ ތަކާއެކު ގެނެވުނު ބަދަލުތަކާއި ދަރަނި ނަގަން ޖެހުން ގޮތާއި، ތި ކިޔާ ފައިސާ ޗާޕްކުރުމާއި، ހުރިހާ ވާހަކަތަކެއް "ރަނގަޅަށް ދައްކާލަން" ފުރުސަތު ދިނުމަށް އޭނާ އެދިވަޑައިގަތެވެ. އެއީ ދޮގުތަކުގެ ތަފްސީލް ރައްޔިތުންނަށް ސާފުކޮށްދިނުމަށް ކަމަށް އަމީރު ވިދާޅުވި އެވެ.
