ކޮލަމްބޯގައި ސްރީ ލަންކާއާ ދެކޮޅަށް ކުޅޭ ސައުތު އޭޝިއަން ސުޕަ ކަޕްގެ ދެ މެޗުގައި ދިވެހި ފުޓްބޯޅަ ސަޕޯޓަރުންނަށްޓަކައި ވެސް ރަނގަޅު ނަތީޖާއެއް ނެރެން ބޭނުންވާ ކަމަށް ގައުމީ ފުޓްބޯޅަ ޓީމުގެ މިޑްފީލްޑަރު، ހުސެއިން ނިހާން (ނިހާޓް) ބުނެފި އެވެ.
ކޮލަމްބޯގެ ރޭސް ކޯސް ސްޓޭޑިއަމްގައި، މި މަހު ހަ ވަނަ ދުވަހާއި ނުވަ ވަނަ ދުވަހު ސްރީ ލަންކާއާ ދެކޮޅަށް ރާއްޖޭން ސައުތު އޭޝިއަން ސުޕަ ކަޕްގެ ދެ މެޗުގައި ކުޅޭނެ އެވެ. މި މެޗުތަކަށް ނުކުންނައިރު، ރާއްޖޭގެ ގައުމީ ޓީމުން އެންމެ ފަހުން ކުޅުނު ފަސް މެޗުން ވެސް ބަލިވެ، ރާއްޖޭގެ ފުޓްބޯޅަ ސަޕޯޓަރުންނަށް ދިވެހި ފުޓްބޯޅައާ މެދު ނާއުންމީދުވުމުގެ މަންޒަރު އޮތީ ފެންނަން ފަށައިފަ އެވެ.
"ކުޅުންތެރިން އިރާދަކުރެއްވިއްޔާ މި ތިބީ ވަރަށް ރަނގަޅަށް ތައްޔާރުވެގެން، އަހަރެމެން ހުރިހާ ޕްލޭޔަރުންގެ ވެސް ފޯކަސް މި ހުރީ މި ދެ މެޗު، ހަމަ ނަގާލަދީގެން ޕަބްލިކަށް ރަނގަޅު ނަތީޖާއެއް ނެރެދިނުން،" ގައުމީ ޓީމުގެ އެންމެ ފަހުގެ ނަތީޖާތަށް ދިޔަ ގޮތުން އަރައިގަތުމަށް އަމާޒުކޮށް، ގައުމީ ޓީމުގެ މިޑްފީލްޑަރު، ނިހާން ބުންޏެވެ.
އިއްޔެ ބޭއްވި ނޫސްވެރިންގެ ބައްދަލުވުމުގައި ނިހާން ވާހަކަ ދައްކަނީ.--- ފޮޓޯ: އަތޫފް އާތިފް / އަދަދު ސްޕޯޓްސް
އެންމެ ފަހުން ސްރީ ލަންކާގައި އެ ގައުމާ ދެކޮޅަށް ރާއްޖޭން ކުޅުނީ، 2021 ވަނަ އަހަރު ލަންކާގައި ކުރިއަށްދިޔަ ފޯ ނޭޝަންސް ކަޕުގަ އެވެ. އެ ގޮތުން، އެ އަހަރުގެ ނޮވެމްބަރު މަހުގައި ކުޅުނު މެޗުން ރާއްޖޭން ހަތަރު ގޯލުގެ ލީޑެއްގައި އޮއްވައި، ލަންކާ އިން ވަނީ ފަހަތުން އަރައި 4-4 އިން އެއްވަރުކޮށްފަ އެވެ. އޭގެ އެއް މަސް ކުރިން، މާލޭގައި އޮތް ސާފް ޗެމްޕިއަންޝިޕްގައި ރާއްޖޭން 1-0 އިން ލަންކާ ބަލިކުރި އެވެ.
އެކި ގައުމުތަކުގައި ކުޅޭ ލަންކާގެ ރައްޔިތުކަން ދެވޭ ކުުޅުންތެރިން ގެނެސް ގައުމީ ޓީމުގައި ހިމަަނައިގެން، ލަންކާ ޓީމު މިހާރު އޮތީ ވަރަށް ބޮޑަށް ބަދަލުވެފަ އެވެ. އަދި، ކުރިއަށް ވުރެ ލަންކާ ޓީމުގެ ނަތީޖާތައް ވެސް މި ބަދަލުތަކާ އެކު ވަނީ ރަނގަޅުވެފަ އެވެ.
ނިހާން ބުނީ، ލަންކާ ޓީމު ކުރިއަށް ވުރެ ބަދަލުވެފައި، އަދި ރަނގަޅުވެފައި އޮތްކަން އެނގޭ ކަމަށާއި އެކަންކަމަށް ތައްޔާރުވެގެން މެޗުގައި ނަތީޖާ ނެރެން ކުޅުންތެރިން އެކުގައި މަސައްކަތްކުރާނެ ކަމަށެވެ.
އެންމެ ފަހުން ރާއްޖެ އާއި ލަންކާ ކުޅުނީ، 2022 ވަނަ އަހަރުގެ ޖޫން މަހު ކުރިއަށްދިޔަ އޭޝިއަން ކަޕް ކޮލިފައިން ފަހު މެޗުގަ އެވެ. އެ މެޗުގައި، ހަމްޒާ މުހައްމަދު (ހަމްޕު) ޖެހި ގޯލުން ރާއްޖޭން 1-0 ލަންކާ ބަލިކުރި އެވެ. ރާއްޖެއާ ދެކޮޅަށް ކުޅުނު 22 މެޗުގެ ތެރެއިން ލަންކާ މޮޅުވީ ތިން މެޗުންނެވެ. ދިހަ މެޗު އެއްވަަރުވިއިރު، ރާއްޖޭން ނުވަ މެޗުން މޮޅުވި އެވެ.
ގައުމީ ސްކޮޑަށް އާ ކުޅުންތެރިން އައުމުން އަަބަދުވެސް ސީނިއާކޮށް ތިބޭ ކުޅުންތެރިން، އާ ކުޅުންތެރިންނާ އެކުގައި މަސައްކަތްކޮށް، އެ ހުންނަ ކޯޗެއްގެ އިރުޝާދުގެ ދަށުން ރަނގަޅަށް މަސައްކަތްކުރާ ކަމަށް ނިހާން ވަނީ ބުނެފަ އެވެ.
ލަންކާ މެޗުތައް ކުޅެން މިއަދު ގައުމީ ޓީމު އެ ގައުމަށް ދާ ގޮތަށް ވަނީ ހަމަޖެހިފަ އެވެ.
