މި އަހަރުގެ މަސް ރޭހަށް މުޅިން އަލަށް އުރީދޫ އެޕްގައި މަސް ރޭސް ޑިޖިޓަލް ގޭމް ތައާރަފްކޮށް، ރާއްޖޭގެ މަސްވެރިކަމަށް ލޯބިކުރާ މީހުންނަށް މުބާރާތުގެ އިތުރު ގޮތަކަށް ބައިވެރިވެވޭނެ މަގު ފަހިކޮށްދީފި އެވެ.
އުރީދޫ އިން ވަނީ އެ ގޭމް ކޮންމެ ތަނެއްގައި ހުރެގެން ވެސް ބުރާސްފަތި ދުވަހުގެ 23:59 އާ ހަމައަށް ލައިވްކޮށް ކުޅެވޭނެ އިންތިޒާމު ހަމަޖައްސާފަ އެވެ.
އުރީދޫ މަސް ރޭސް 2025 ގައި ވާދަކުރާ ހަގީގީ ޓީމުތަކުގެ ނަންތައް ހިމެނިފައިވާ މަސް ރޭހުގެ އޮންލައިން ވާޝަނާ އެކު ކޮންމެ ފަރާތަކަށްވެސް ޓީމެއް އިހްތިޔާރުކޮށް، މަސް ހިފުމަށް ޓެޕްކޮށް، ޕޮއިންޓް އެއްކޮށްގެން ލީޑާބޯޑުގައި ކުރިއަށް ދިޔުމުގެ ފުރުސަތު ލިބެ އެވެ.
ޑިޖިޓަލީ ބާނާ ކޮންމެ މަހަކަށް އެއް ޕޮއިންޓް ލިބޭއިރު، މުބާރާތުގެ މުއްދަތުގެ ތެރޭގައި ވެސް ކުޅުންތެރިންނަށް ލީޑާބޯޑުގެ ކުރިއަށް އެރުމުގެ ފުރުސަތު ލިބިގެންދާނެ އެވެ.
ރާއްޖޭގެ އެންމެ ބޮޑު ފިޝިން ޓެކްލް ފިހާރަ، ހައި ފިޝިން ޓެކްލްސް އިން މި ގޭމުގެ އެއްވަނަ، ދެ ވަނަ އަދި ތިން ވަނައަށްދާ މީހަކަށް ވަނީ ޕްރިމިއަމް ފިޝިން ގިއާ އިނާމުގެ ގޮތުގައި ހުށައަޅާފަ އެވެ.
އެގޮތުން އެއްވަނައަށް ޑައިވާ ސަލްޓިގާ 2025 ރީލްއެއް ލިބޭއިރު، ދެވަނަ އާއި ތިންވަނައަށް ޕީއައިއޯ އަލްޓިމޭޓް ސީ ސްޕިރިޓް/ގޭންގްސްޓާ (އެޗް/ޑީ) ރޮޑްސްއެއް ވަނީ ހުށަހަޅާފަ އެވެ.
އުރީދޫ އެޕް މެދުވެރިކޮށް ޑިޖިޓަލް މަސްރޭހުގައި ރާއްޖޭގެ ހުރިހާ ހިސާބަކުން ވެސް ހުރިހާ އެންމެންނަށް ބައިވެރިވުމުގެ ފުރުސަތު ފަހިކޮށްދިނުމަކީ ލިބޭ ވަރަށް ބޮޑު އުފަލެއް ކަމަށް އުރީދޫއިން ބުންޏެވެ.
