މިނިވަން މީޑިއާ ނައްތާލުމަށް މަޖިލީހަށް މިހާރު ހުށަަހަޅާފައިވާ ބިލަކީ ގާނޫނު އަސާސީގައި ބަޔާންކުރާ މިނުން ބޭރުން އަސާސީ ހައްގުތައް ހިފަހައްޓާ ބިލެއް ކަމަށް ކުރީގެ ބަންޑާރަނައިބު، ދިޔާނާ ސައީދު ވިދާޅުވެއްޖެ އެވެ.
ނޫސްވެރިއަކު ކުރި ސުވާލަކަށް ޖަވާބުދެއްވަމުން ދިޔާނާ ވިދާޅުވީ ހިޔާލުފާޅު ކުރުމުގެ މިނިވަންކަމާއި މައުލޫމާތު ހޯދައި ފެތުރުމުގެ ހައްގަކީ އަސާސީ ހައްގެއް ކަމަށެވެ. އަދި އަސާސީ ހައްގެއް ހިފެހެއްޓޭނެ މިންގަނޑުތައް ގާނޫނުއަސާސީގައި ބަޔާން ކޮށްފައިވާ ކަމަށް އެކަމަނާ ވިދާޅުވި އެވެ.
"ހިޔާލުފާޅު ކުރުމުގެ މިނިވަންކަމާއި މައުލޫމާތު ލިބިގަތުމާއި މައުލޫމާތު ހާމަ ކުރުމާއި މައުލޫމާތު ފެތުރުމުގެ ހައްގަކީ އެއީ އަސާސީ ހައްގެއް ދެއްތޯ؟ އަސާސީ ހައްގެއް ހިފެހެއްޓޭނެ މިންގަނޑުތައް ގާނޫނުއަސާސީގައި ބަޔާން ކޮށްފައި އެބައޮތް، އެހެންވީމާ އެ މިނުން ބޭރުވާ ބިލެއް ކަމަށް އަޅުގަނޑަށް ވެސް، އަޅުގަނޑު މިހައިތަނަށް ބެލި ބެލުމުން ސާފުވަނީ،" ދިޔާނާ ވިދާޅުވި އެވެ.
އަސާސީ ހައްގުތައް ހަނިކުރާ ގޮތަށް ބިލުގައި ހިމަނާފައި ހުރި މާއްދާތައް އިސްލާހު ކުރައްވާނެ ކަމަށް އުއްމީދު ކުރައްވާ ކަމަށް ދިޔާނާ ވިދާޅުވި އެވެ. އަދި އެކަން އެގޮތަށް ނުކުރައްވައިފި ނަމަ ދެން އޮންނާނެ ގޮތަކީ ޝަރުއީ ނިޒާމުގެ ތެރެއިން އެ މައްސަލައަށް ހައްލެއް ހޯދުން ކަމަށް ދިޔާނާ ވިދާޅުވި އެވެ.
އެހެންވީމާ އެއަށް ސަރުކާރުން ހައްލެއް ހޯއްދަވައިދެއްވާނެ ކަމަށް، ދެން އެ ހައްލު ނުލިބިއްޖެ ކަމަށްވަންޏާ އަޅުގަނޑުމެން ހަމަ ކޯޓުގެ ދޮރުގައިތާ ޓަކި ޖަހާނީ ދެއްތޯ؟" ދިޔާނާ ވިދާޅުވި އެވެ.
މިނިވަން މީޑިއާ ނެތިކޮށްލާ ބިލުގައި ބުނެފައި ވަނީ ބިލަށް އަމަލު ކުރަން ފެށުމާއެކު މޯލްޑިވްސް މީޑިއާ އެންޑް ބްރޯޑްކާސްޓިން ކޮމިޝަނުގެ ނަމުގައި ކޮމިޝަނެއް އުފައްދަންޖެހޭ ކަމަށެވެ. އެ ކޮމިޝަން އުފެދުމުން މޯލްޑިވްސް ބްރޯޑްކާސްޓިން ކޮމިޝަނާއި މޯލްޑިވްސް މީޑިއާ ކައުންސިލް އުވޭނެ އެވެ.
މީޑިއާ އެންޑް ބްރޯޑްކާސްޓިން ކޮމިޝަނުގައި ތިބޭނީ ހަތް މެންބަރުން ކަމަށް ބިލުގައި ބުނެ އެވެ. އޭގެ ތެރެއިން ތިން މެންބަރުންނަކީ ރައީސުލްޖުމްހޫރިއްޔާ އައްޔަން ކުރާ މެންބަރުންނެވެ. އަނެއް ހަތަރު މެންބަރުންނަކީ މީޑިއާތަކުގެ ފަރާތުން އިންތިހާބު ކުރާ މެންބަރުންނެވެ. އެފަދަ އިންތިހާބެއްގައި ބައިވެރިވެވޭނީ ވުޖޫދުވިތާ ފަސް އަހަރުވެފައިވާ މީޑިއާތަކަށެވެ.
މީޑިއާ ރެގިއުލޭޓު ކުރަން އެކުލަވާލާ ކޮމިޝަނެއްގައި ރައީސުލްޖުމްހޫރިއްޔާ އައްޔަން ކުރާ މެންބަރުންތަކެއް ތިބެންޖެހޭ ސަބަބެއް އެ ބިލުގައި ބަޔާންކޮށްފައެއް ނުވެ އެވެ. އަދި ބިލުގައިވާ ގޮތުން ކޮމިޝަނުގެ ރައީސް އައްޔަން ކުރަންޖެހެނީ ރައީސުލްޖުމްހޫރިއްޔާ އެވެ.
ބިލުގައިވާ ގޮތުން ބޮޑެތި ބާރުތަކެއް އަލަށް އުފައްދާ ކޮމިޝަނަށް ލިބޭނެ އެވެ. އޭގެ ތެރޭގައި، 100،000 ރުފިޔާއާ ހަމައަށް މީޑިއާތައް ޖޫރިމަނާ ކުރުމާއި މައްސަލައެއް ބަލައި ނުނިމެނީސް ވެސް ވަގުތީ ގޮތުން ރަޖިސްޓްރީ ބާތިލު ކުރުން ހިމެނެ އެވެ. އަދި ފަހުން ކޯޓަށް ގޮސްގެން ވެސް ނޫހެއްގެ ރަޖިސްޓްރީ ބާތިލު ކުރެވިދާނެ ކަމަށް ބުނެފައިވެ އެވެ.
އޭގެ އިތުރުން، ކޮމިޝަނުން މައްސަލައެއް ބަލަމުންދަނިކޮށް، ނޫސް ވެބްސައިޓެއް ބްލޮކް ކުރުން ނުވަތަ ޓީވީގެ ބްރޯޑްކާސްޓު ހުއްޓުވަން އެންގުމުގެ ބާރު ވެސް ކޮމިޝަނަށް ލިބޭނެ އެވެ.
