ރާއްޖޭގެ ފުޓްބޯޅައިގެ އެންމެ ވަރުގަދަ އެއް ބާރު، ވިކްޓަރީ ސްޕޯޓްސް ކްލަބްގެ ބޯޑު މެމްބަރުންތައް އިސްތިއުފާދީފި އެވެ.
"އަދަދު ސްޕޯޓްސް" އަށް މައުލޫމާތު ދިން ފަރާތަކުން ބުނެފައިވަނީ، މީގެ ދުވަސްކޮޅެއް ކުރިން ވިކްޓަރީގެ ރައީސް، ހުސެއިން އާދަމް (އާދަމްބެ) ފިޔަވައި ދެން ތިބި ހިންގާ ކޮމިޓީގެ ހުރިހާ މެމްބަރުން އިސްތިއުފާދީފައިވާ ކަމަށެވެ.
އިސްތިއުފާ ދިން ވިކްޓަރީގެ ބޯޑު މެމްބަރަކު މައުލޫމާތު ދިން ގޮތުގައި، އެ ކްލަބް ހިންގުމަށްޓަކައި، ލީޑަޝިޕް ބަދަލުވުމަށް، މިހާރުގެ ސަރުކާރުގެ ފަރާތުން ވެސް ޕްރެޝަރު އަންނަ ކަމަށާއި އެހެންވެ، ބޯޑު މެމްބަރުން ނިންމީ ކްލަބް ކުރިއަށްގެންދިއުމަށްޓަކައި، މަގާމުން އެއްކައިރި ވުމަށެވެ.
ވިކްޓަރީގެ އާ ބޯޑެއް އިންތިހާބު ކުރުމުގެ މަސައްކަތްތައް ހިނގަމުން އަންނައިރު، އެ ކްލަބްގެ ހިންގާ ކޮމިޓީ އަށް ވެސް މި ސަރުކާރުގެ އެކި ވުޒާރާތަކުގެ އިސް ވެރިން އައުމުގެ ފުރުސަތު އެބައޮތް ކަމަށް މި ކަމުގެ މައުލޫމާތު ހުރި ފަރާތަކުން ވަނީ ބުނެފަ އެވެ.
މިދިޔަ ނޮވެމްބަރު މަހު، ރާއްޖޭގެ އެންމެ ސަޕޯޓަރުން ގިނަ ކްލަބް، ނިއު ރޭޑިއަންޓް ސްޕޯޓްސް ކްލަބަށް އިންތިހާބުވި، އާ ހިންގާ ބޯޑުގައި ވެސް މި ސަރުކާރުގެ ގިނަ ވެރިން ހިމެނެ އެވެ. ނިއުގެ ޗެއާމަނަކަށް އިންތިހާބުވިއިރު، މުބީން ހުންނެވީ، ރީޖަނަލް އެއާޕޯޓްސް ކޮމްޕެނީގެ މެނޭޖިން ޑިރެކްޓަރުގެ މަގާމުގަ އެވެ. މިހާރު ވަނީ އެ މަގާމުން އިސްތިއުފާ ދެއްވައިފަ އެވެ. މުބީން އަކީ، އެފްއޭއެމް އިން އިއުލާނުކުރި ރާއްޖޭގެ ފުޓްބޯޅައިގެ އަލިމަސް ޔޫބީލް (75 އަހަރު ފުރުން) ކުލަގަދަކޮށް ފާހަގަ ކުރުމަށް އެކުލަވާލި، "ޑައިމަންޑް ޖޫބިލީ ކޮމިޓީ"ގެ ވައިސް ޗެއާމަން ވެސް މެ އެވެ.
ނިއުގެ ބޯޑުގައި ދެން ތިބި އިސް މަގާުމުތަކަށް ބަލާއިރު، ސީނިއާ ވައިސް ޗެއާމަނަކަށް ހުންނެވީ ރައްޔިތުންގެ މަޖިލީހުގެ ރައްޔިތުންގެ މަޖިލިހުގެ ހެންވޭރު ހުޅަނގު ދާއިރާގެ ޕީއެންސީގެ މެންބަރު އަދި އެފްއޭއެމްގެ ހިންގާ ކޮމިޓީގެ ނައިބު ރައީސް، މުހައްމަދު އިބްރާހިމް (ކައްޕި) އާއި ވެމްކޯގެ މެނޭޖިން ޑިރެކްޓަރު އަދި އެފްއޭއެމްގެ ނައިބު ރައީސް، މުޖުތަބާ ޖަލީލް (މުޖޭ) އެވެ. އަދި، ބޯޑު މެމްބަރުންގެ ތެރޭގައި، ހައްޖު ކޯޕަރޭޝަންގެ މެނޭޖިން ޑިރެކްޓަރު، މުހައްމަދު ޝަކީލް ހިމެނޭއިރު، ދާދި ފަހުން ވަނީ، ކްލަބްގެ ވައިސް ޗެއާމަނަކަށް، އެމްއޭސީއެލްގެ ޑެޕިއުޓީ މެނޭޖިން ޑިރެކްޓަރުގެ މަގާމުގައި ހުންނެވި މުހައްމަދު ލަމްއާން އައްޔަނުކޮށްފަ އެވެ.
ވިކްޓަރީގެ އެންމެ ފަހުން އޮތް ލީޑަޝިޕްގެ ރައީސް އާދަމްބެ (ކ) އާއި ނައިބު ރައީސް ލަތީފް.
ވިކްޓަރީގެ ކުރީގެ ހިންގާ ބޯޑުގެ މަސައްކަތް؛ ސަސްޕެންޝަނުން އެނބުރި ފުރަތަމަ ޑިވިޝަނަށް
މިދިޔަ ސަަރުކާރުގައި މުލިއާގޭ ޗީފް އޮފް ސްޓާފްގެ މަގާމު ފުރުއްވި، އާދަމްބެ، ވިކްޓަރީގެ ރައީސް ކަމަށް އިންތިހާބުވީ 2022 ވަނަ އަހަރު ބޭއްވި އިންތިހާބު ކާމިޔާބު ކުރައްވައިގެންނެވެ. ނައިބު ރައީސަކަށް އިންތިހާބުވީ އިސްމާއިލް ލަތީފް އެވެ.
އެ ފަހަރު، އަލަށް އިންތިހާބުވި ވިކްޓްރީގެ ބޯޑު މެމްބަރުންގެ ތެރޭގައި ހިމެނެނީ ރައްޔިތުންގެ މަޖިލީހުގެ މިދިޔަ ދައުރުގެ ހުޅުމާލެ ދާއިރާގެ މެމްބަރު އަލީ ނިޔާޒުގެ އިތުރުން، ފާތިމަތު ޝެރިން، ވިކްޓްރީ އަށް ކުރިން ކުޅުނު މިޑްފީލްޑަރު، މުހައްމަދު ޝައްފާޒު (ސައްޕޭ)، އިބްރާހިމް މުހައްމަދު، އަހުމަދު ފައިސަލް، އިބްރާހިމް އިޒްހާން، އިސްމާއިލް ޝަރީފް، އަހުމަދު އަރީސް (ޕަޓޭ)ގެ އިތުރުން ވިކްޓަރީ އަށް ގިނަ ދުވަހު ހިދުމަތްތަކެއް ކޮށްދެއްވައިފައިވާ، މަޝްހޫރު ގޯލްކީޕަރު ޓްރެއިނަރު އަހުމަދު ރިޔާޒް (ގާނާ) އެވެ.
އާ ބޯޑު އިންތިހާބުވިއިރު، ވިކްޓަރީން ގުނަމުންދިޔައީ ސަސްޕެންޝަނުގެ ތިން ވަނަ އަހަރެވެ.
ވިކްޓަރީން، 2019/2020 ލީގު މެޗުތަކަށް ހާޒިރުނުވާ މައްސަލަ އާއި ކުޅުންތެރިންނާއި ކޯޗުންނަށް ދޭން ޖެހޭ މުސާރަ ނުލިބިގެން އެ ފަރާތްތަކުން ހުށަހަޅާފައިވާ މައްސަލަ އާއި ކްލަބް ލައިސަންސްއާ ގުޅޭ ގޮތުން ހަމަކުރަން ޖެހޭ ލިޔެކިޔުންތައް ހަމަކޮށްފައިނުވާތީ އެ ކްލަބް ސަސްޕެންޑްކުރީ 2019 އަހަރު ޑިސެމްބަރު މަހު އެވެ.
އެފްއޭއެމުން ވިކްޓަރީ ސަސްޕެންޑްކުރިއިރު، އެ ކްލަބުން ތުހުމަތުކުރީ އެ އަދަބަކީ އެ ޓީމާއި ނިއު އިން އިސްވެ، އެފްއޭއެމްގެ ލީޑަޝިޕް ބަދަލުކުރަން މަސައްކަތްކުރާތީ ކުރި ކަމެއް ކަމަށެވެ.
ސަސްޕެންޝަނުން ސަލާމަތްވުމަށް، އާދަމްބެގެ ލީޑަޝިޕުން ވަނީ، ފީފާ އަށް ދައްކަން ޖެހޭ ފައިސާ އާއި ދިވެހި ކުޅުންތެރިންނަށް ދޭން ޖެހޭ ފައިސާ ދައްކައިފަ އެވެ. ވިކްޓަރީ، ސަސްޕެންޝަނުން ސަލާމަތްވީ، 2022 ވަނަ އަހަރު ޖޫން މަހު އެވެ. އޭގެ ފަހުން، ދެ ފަހަރު، ދެ ވަނަ ޑިވިޝަނުގައި ވާދަކޮށް، މިހާރު ވަނީ ފުރަތަމަ ޑިވިޝަނަށް ޕްރޮމޯޓްވެފަ އެވެ. އެއީ، އެންމެ ފަހުން ބޭއްވި ދެ ވަނަ ޑިވިޝަނުގެ ފައިނަލުން ޖާގަ ހޯދައިގެންނެވެ.
