މުމްބާއި (އޮގަސްޓް 20) - އިންޑިއާގެ ކްރިކެޓް ތަރި، ޖަސްޕްރީތު ބުމްރާ އަށް ކުރިއަށް އޮތް އޭޝިއާ ކަޕަށް ނެގި އިންޑިއާގެ 15 ކުޅުންތެރިންގެ ސްކޮޑުން ފުރުސަތު ދީފި އެވެ.
އިންޑިއާ އިން ދާދި ފަހުން، އިންގްލެންޑާ ދެކޮޅަށް އެ ގައުމުގައި ކުޅެ ނިންމާލި، ޓެސްޓް ސީރީސްގެ ފަސް މެޗުގެ ތެރެއިން، ބާރު އުކުންތެރިޔާ، ބުމްރާ، 31، އަށް ކުޅެވުނީ ދެ މެޗުގަ އެވެ. އެންމެ ފަހު ޓެސްޓް މެޗުގައި، ބުމްރާ އަށް ނުކުޅެވުނީ، ކަކުލަށް ލިބުނު އަނިޔާއެއްގެ ސަބަބުން ކަމަށް މީޑިއާތަކުން ރިޕޯޓްކޮށްފައިވެ އެވެ.
އޭޝިއާ ކަޕްގައި ކުޅޭ އިންޑިއާގެ ސްކޮޑު އިއުލާނުކުރިއިރު، ބުމްރާ އަށް ވަނީ ފުރުސަތު ދީފަ އެވެ.
އިންޑިއާ އިން އެންމެ ފަހުން ބޭއްވި ޓީ20 ވޯލްޑް ކަޕް ކާމިޔާބުކުރިއިރު، މުބާރާތުގެ މޮޅު ކުޅުންތެރިޔާގެ މަގާމު ހޯދި, ބުމްރާގެ ބުރަކަަށްޓަށް ލިބުނު އަނިޔާއެއްގެ ސަބަބުން ގިނަ ދުވަސްތަކެއް ކުޅުމާ ދުރުގައި ހުރެފައި، އެނބުރި އައީ މި އަހަރުގެ އިންޑިއަން ޕްރިމިއާ ލީގު (އައިޕީއެލް)ގައި މުމްބައި އިންޑިއަންސް އަށް ކުޅުމަށެެވެ.
އައިސީސީ ޗެމްޕިއަންސް ޓްރޮފީގައި ބުމްރާ އަށް ނުކުޅެވުނު ކަމުގައި ވިޔަސް އޭޝިއާ ކަޕަށް ބުމްރާ ފިޓްވާނެ ކަމަށް އިންޑިއާ އިން ވަނީ ނިންމައިފަ އެވެ.
އިންޑިއާގެ ސްކޮޑުން ބޯލަރު ކުލްދީޕް ޔާދަވް އަށް ފުރުސަތު ދިންއިރު، ޒުވާން ބެޓްސްމަން ޔަޝަޝްވީ ޖޭސްވާލް އާއި ހުނަރުވެރި ކުޅުންތެރިޔާ، ޝްރޭޔަސް އައްޔަރު ވަނީ ބާކީވެފަ އެވެ. ޓީމުގެ ކެޕްޓަނަކީ، ސޫރްޔަކުމާރު ޔާދަވް އެވެ. އަދި، ވައިސް ކެޕްޓަން އަކީ ޝުބްމަން ގިލް އެވެ.
އޭޝިއާގެ ގަދަ އަށް ގައުމުގެ މެދުގައި، ޓީ20 ފޯމެޓަށް ކުޅޭ އޭޝިއާ ކަޕްގައި އިންޑިއާ ހިމެނެނީ، އޮމާނާއި ޕާކިސްތާންގެ އިތުރުން މުބާރާތް ބާއްވާ ގައުމު ކަމަށްވާ ޔޫއޭއީއާ އެއް ގްރޫޕެއްގަ އެވެ. އަނެއް ގްރޫޕްގައި ހިމެނެނީ، އަފްގާނިސްތާން، ބަންގްލަދޭޝް، ހޮންް ކޮންގް އަދި ސްރީ ލަންކާ އެވެ.
އެންމެ ފަހުން، 2023 ވަނަ އަހަރުގެ އޭޝިއާ ކަޕް އިންޑިއާ އިން ކާމިޔާބުކުރީ، ފައިނަލުގައި، 10 ވިކެޓުން ސްރީ ލަންކާ ބަލިކޮށްފަ އެވެ. މިއީ، އިންޑިއާ އިން އޭޝިއާ ކަޕް ތަށި އުފުލާލި އަށް ވަނަ ފަހަރެވެ.
