ކައުންސިލްގެ ދައުރުގެ ފަހު އަހަރުގެ ތެރޭގައި ރަށުން ބިން ދޫކުރުން ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެނައި 16 ވަނަ އިސްލާހުން މަނާކުރުމުން ގދ. ގައްދޫއިން ދޫކުރުމަށް ހަމަޖެހިފައި އޮތް ބާރަ ބިން ދޫކުރުމުގެ މަސައްކަތް ކުރިއަށް ނުގެންދިއުމަށް އެ ކައުންސިލުން ނިންމައިފި އެވެ.
ގދ. ގައްދޫ ކައުންސިލުން އިއްޔެ ކުރި އިއުލާނެއްގައި ބުނީ ލާމަރުކަޒީ ގާނޫނުގެ އިސްލާހު ތަސްދީގުކުރެވުނުއިރު އެރަށުން 12 ބިމެއް ކުއްޔަށް ދޫކުރުމުގެ މަސައްކަތް އެ ކައުންސިލުން ކުރަމުން ދިޔަ ކަމަށެވެ. މިއީ ކައުންސިލުން ފާސްކޮށްފައިވާ ބިނާވެށި ޕްލޭނާ އެއްގޮތަށް މި ދައުރުގެ ތެރޭގައި ކުއްޔަށް ދޫކުރުމަށް ކައުންސިލުން ނިންމާފައި ހުރި ބިން ތަކެވެ.
މި ބިންތައް ކުއްޔަށް ހޯދުމަށް ވަރަށް ގިނަ އަދަދެއްގެ ބަޔަކު ޝައުގުވެރިކަން ފާޅުކޮށްފައިވީ ނަމަވެސް ގާނޫނަށް ގެނައި އިސްލާހުގެ ސަބަބުން ކައުންސިލްގެ މިދައުރުގެ ބާކީއޮތް މުއްދަތާއިހަމައަށް ބިމުގެ މުއަމަލާތު ހިންގުން ކައުންސިލްތަކަށް މަނާ ވާތީ މިވަގުތު އެ ބިންތައް ކުއްޔަށް ދޫކުރެވެން ނެތްކަމަށް ކައުންސިލުގެ އިއުލާނުގައި ބުނެފައި ވެއެވެ.
"ވުމާއިއެކު، 2025 ޖޫން 29 އިން މިމުއްދަތާއިހަމައަށް ވިޔަފާރީގެ އެކި ބޭނުންތަކަށް ބިން ހޯދުމަށް އެދި މިކައުންސިލްގައި އެދިފައިވާ ބާރަ ކުލީ ބިމުގެ މުއާމަލާތު ހިންގުމަށް ގާނޫނު މަހުދޫކޮށްފައިވާތީ، މިބިންތައް ކުއްޔަށް ދިނުމުގެ މަސައްކަތް ކުރިއަށް ނުގެންގޮސް ކައުންސިލުން މަޑުޖައްސައިފީމެވެ." ކައުންސިލްގެ ބަޔާނުގައި ބުންޏެވެ.
ގދ. ގައްދޫ ކައުންސިލުން ވަނީ މި ބިންތައް ކުއްޔަށް ދޫކުރުން ހުއްޓާލަން ޖެހޭތީ އެ ކަމުގައި ޝައުގުވެރިކަން ފާޅުކުރި ފަރާތްތަކުގެ ކިބައިން މާފަށް އެދިފަ އެވެ. އަދި ސަރުކާރުގެ ކަމާ ގުޅުންހުރި އިދާރާއަކުން މި ބިމުގެ މުއާމަލާތުތައް ކުރިއަށް ގެންދެވޭނޭ ފަދަ އުސޫލެއް ކަނޑައަޅައިފިނަމަ އަލުން މި ބިންތައް ކުއްޔަށް ދޫކުރުމުގެ މަސައްކަތް ފަށާނޭކަމަށް ގައްދޫ ކައުންސިލްގެ ބަޔާނުގައި ބުންޏެވެ.
ލާމަރުކަޒީ ގާނޫނަށް ގެނައި 16 ވަނަ އިސްލާހުން ކައުންސިލްތަކަށް މަނާކުރި ކަންކަން
ވިޔަފާރި ކުރަން ކުރިމަތި ކުރުވާ ހުރަސްތައް
- އަމިއްލަ މީހަކު ކުރަމުންދާ ވިޔަފާރިއެއް ނުކުރެވޭ ގޮތް ހެދުން
- އުމްރާނީ ތަރައްގީއަށް ކޮންމެހެން ބޭނުންވާ މަސައްކަތެއް ނޫނީ ނުކުރެވުން
- ވިޔަފާރީގެ އިންވެސްޓްމަންޓު ނުވަތަ ރައުސުލްމާލު 10 މިލިއަން ރުފިޔާއަށް ވުރެ ބޮޑުވުން
- ކައުންސިލުން މިހާރު ކުރަމުންދާ ވިޔަފާރިތައް މަތީގައި ބަޔާން ކުރާ އުސޫލަކާ ހިލާފުވެއްޖެ ނަމަ އެ ވިޔަފާރިއެއް ތިން މަސްދުވަސް ތެރޭ ހުއްޓާލަން ޖެހުން
ތަންތަން ކުއްޔަށް ދިނުމަށް އެޅި ހުރަސްތައް
- އަސާސީ ހިދުމަތް ދިނުމަށް އެކި ފަރާތްތަކަށް ދޫކޮށްފައިވާ ބިންތަކުން ކުލި ނެގުން މަނާ ކުރުން.
- މާލީ ކަންކަމަށް ނުފޫޒު ފޯރުވުން
- ފިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުން ކައުންސިލުތަކުގެ ބޭންކް އެކައުންޓުތައް ބަލަހައްޓަން މަޖުބޫރު ކުރުވުން
- ފިނޭންސް މިނިސްޓްރީ އިން ބޭނުންވެއްޖެ ހިނދެއްގައި ކައުންސިލުގެ ބޭންކު އެކައުންޓުގެ ސްޓޭޓްމަންޓެއް ދިނުމަށް މަޖުބޫރު ކުރުވުން
ކައުންސިލުގެ މަސައްކަތަށް ހުރަސް އެޅުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ދާއިމީ އަދި ކޮންޓްރެކްޓަށް ވެސް މުވައްޒަފުން ނެގޭނެ މަގު ބަންދު ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ކައުންސިލުގެ އިހުތިސާސްގެ ދަށުގައިވާ ބިމާއި ފަޅާއި ފަރުގެ ސަރަހައްދުގެ ކުއްޔަށް ދޫކުރުން މަނާ ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ތަރައްގީގެ އާ މަޝްރޫއުއެއް ހިންގުން މަނާ ކުރުން
މިއީ ލާމަރުކަޒީ ގާނޫނަށް ގެނައި 16 ވަނަ އިސްލާހެވެ.
