ލިވަޕޫލް (އޮގަސްޓް 16) - އިނގިރޭސި ޕްރިމިއާ ލީގުގެ ޗެމްޕިއަން، ލިވަޕޫލުން މި ފަހަރުގެ ލީގު ސީޒަނުގައި ކުޅުނު ފުރަތަމަ މެޗުން ފަހު ވަގުތު ބޯންމައުތު އަތުން 4-2 އިން މޮޅުވެއްޖެ އެވެ.
މިއީ ޕްރިމިއާ ލީގުގެ އާ ސީޒަނެއް ފަށަން ފާއިތުވި ހަތަރު އަހަރު ތެރޭ ލިވަޕޫލުން އަމިއްލަ ދަނޑުގައި ކުޅުނު ފުރަތަމަ ފަހަރެވެ.
ލިވަޕޫލްގެ އެންފީލްޑް ސްޓޭޑިއަމްގައި ކުޅުނު މެޗުގައި އެ ޓީމަށް ލީޑުނަގައިިދިނީ، 37 ވަނަ މިނިޓްގައި ހޫގޯ އެކިޓީކޭ އެވެ. ލިވަޕޫލަށް މިދިޔަ ހަފްތާގައި ކޮމިއުނިޓީ ޝީލްޑް މެޗުގައި ވެސް ލީޑުނަގައިދިން އެކިޓީކޭ މި ލަނޑު ޖެހީ އަލެކްސިސް މެކް އަލިސްޓާ ދިން ބޯޅައެއް ހިފައިގެން އޭރިއާތެރެއަށް ވަދެ އެވެ.
ދެ ވަނަ ހާފުގެ ކުޅުން ފެށިތާ ހަތަރު މިނިޓް ތެރޭ އެކިޓީކޭ ދިން ބޯޅައަކުން، ކޯޑީ ގަކްޕޯ ވަނީ ލިވަޕޫލްގެ ދެ ވަނަ ލަނޑު ޖަހައިދީ، ލީޑުފުޅާކޮށްދީފަ އެވެ.
އެކަމަކު، އޭގެ ފަހުން، ބޯންމައުތުން ލިބޭ ފުރުސަތުތަކުގެ ބޭނުންހިފައި، ދެ ގޯލު ޖަހައި އެއްވަރުކުރި އެވެ.
ލިވަޕޫލްގެ ފްރާންސް ފޯވާޑް، އެކިޓީކޭ ލަނޑު ޖެހުމަށް ފަހު އުފާފާޅުކުރިއިރު ވަނީ ދާދި ފަހުން މަރުވި ލިވަޕޫލްގެ ޕޯޗުގީސް ފޯވާޑް ޑިއޯގޯ ޖޮޓާގެ ހަނދާން އާ ކޮށްފައި.--- ފޮޓޯ: ގެޓީއިމޭޖަސް
ބޯންމައުތުގެ ދެ ލަނޑު ވެސް އެ ޓީމަށް ޖަހައިދިނީ، ދާދި ފަހުން، އެ ޓީމުގެ ކޮންޓްރެކްޓް އާ ކުރި އަންޓުއާން ސެމޭންޔޯ އެވެ. މެޗުގެ ފުރަތަމަ ހާފުގައި، ސެމެންޔޯއާ ނަސްލީ ގޮތުން ދިމާކޮށްގެން، މެޗު ވަގުތު ކޮޅަކަށް މެދުކަނޑާލި އެވެ.
ބޯންމައުުތުން ލިވަޕޫލާ އެއްވަރުކޮށްގެން މެޗު ނިމެން ދަނިކޮށް، ހުރިހާ ކަމެއް ބަދަލުކޮށްލީ 88 ވަނަ މިނިޓްގައި ފެޑެރީކޯ ކިއޭސާ ޖެހި ގޯލުން ލިވަޕޫލަށް އަނެއްކާ ލީޑުނެގުމުންނެވެ. ބަދަލަކަށް ކުޅެން އެރި ކިއޭސާ މި ޖެހި ގޯލަކީ، ލީގުގައި އޭނާ ޖެހި ފުރަތަމަ ގޯލެވެ. މިދިޔަ ސީޒަނުގައި ލިވަޕޫލާ ގުޅުނު ކިއޭސާ އަށް އަނިޔާގެ ސަބަބުން އެންމެ ރަނގަޅު ފޯމުގައި ގިނަ މެޗުތަކެއް ލިވަޕޫލްގައި ނުކުޅެވެ އެވެ.
އިތުރު ވަގުުތުގެ ހަ މިނިޓް ތެރޭ ލިވަޕޫލަށް ހަތަރު ވަނަ ލަނޑު ޖަހައިިދިނީ މިދިޔަ ސީޒަނުގެ މޮޅު ކުޅުންތެރިޔާ، މުހައްމަދު ސަލާހު އެވެ. މިއީ، އިނގިރޭސި ޕްރިމިއާ ލީގުގެ އާ ސީޒަނުގެ ފުރަތަމަ މެޗުތަކުގައި ސަލާހު ޖެހި 10 ވަަނަ ގޯލެވެ. އާ ސީޒަނުގެ ފުރަތަމަ މެޗުގައި އެންމެ ގިނަ ގޯލު ޖެހުމުގެ ރެކޯޑް އޮތީ ސަލާހު އަތުގަ އެވެ.
