ގައުމީ ބޮޑީބޯޑިން ލީގުގެ ދެ މުބާރާތް ވެސް ދިޔައީ ބޭނުންވި ގޮތައް ކަމަށާއި، ރާއްޖޭގެ އެންމެ ކާމިޔާބު ބޮޑީބޯޑަރު، އަލީ ހުޝްރުވާން އަހުމަދު (ކުޑަ އައްޔަ) ބަލިކޮށް ދެ ފައިނަލް ކާމިޔާބުކުރެވުމުން ހިތްހަމަ ޖެހޭ ކަމަށް ޒުވާން ބޮޑީބޯޑަރު އާމިން އުމަރު މޫސާ ބުނެފި އެވެ.
މި އަހަރުގެ ގައުމީ ބޮޑީބޯޑިން ލީގުގެ ފުރަތަމަ މުބާރާތް، ބުރުނު ޝިކާރުގެ ފައިނަލުގައި ވެސް ވާދަކުރީ ކުޑަ އައްޔަ އާއި އާމިން އެވެ. އެ ފައިނަލް އާމިން ކާމިޔާބުކުރިިއިރު، އިއްޔެ ނިމުނު ލަބެރާ ބޮޑީބޯޑިން ޗެލެންޖްގެ ފައިނަލުގައި ވެސް އާމިން ކުރިހޯދީ ކުޑަ އައްޔަގެ މައްޗަށެވެ. މިއީ، ފައިނަލެއްގައި ވިދިވިދިގެން ކުޑަ އައްޔަ ބަލިވި ފުރަތަމަ ފަހަރެވެ.
ފައިނަލަށް ފަހު "އަދަދު ސްޕޯޓްސް" އާ ވާހަކަ ދައްކަމުން އާމިން ބުނީ ދެ މުބާރާތްވެސް ދިޔައީ އެންމެ ބޭނުންވި ގޮތައް ކަމަށެވެ. އަދި ދެ މުބާރާތުގެ ފައިނަލުގައި ވެސް ކުޑަ އައްޔައާ ދެކޮޅަށް ނުކުންނަން ލިބުން އެއީ ހިތްހަމަ ޖެހުމެއް ކަމަށެވެ. އަދި ދެ ފައިނަލުގެ ހީޓުތައް ވެސް ދިޔައީ ރަނގަޅަށް ކަމަށް އާމިން ބުންޏެވެ.
"ހަމަ ދެ ފައިނަލް ވެސް ދިޔައީ އާމިން އެންމެ ބޭނުންވި ގޮތައް. އާމިން އަބަދުވެސް ބުނާ ވާހަކަ އެއް އެއީ ފައިނަލުން ނުކުންނަން ބޭނުންވަނީ އައްޔައާ. ވަރަށް ރަނގަޅު ދެ ހީޓު ދެ ފައިނަލް ވެސް. އާމިން އުންމީދުކުރަނީ ދެން އަންނަ މުބާރާތުގައި ވެސް ހަމަ އައްޔައާ ޖެހި ރަނގަޅު ފައިނަލެއް ހަމަ ދާނެ ކަމަށް" އާމިން ބުންޏެވެ.
އާމިން ބުނީ ލީގުގެ ފުރަތަމަ ދެ މުބާރާތް ކާމިޔާބުކުރެވުމުން މިހާރު ވިސްނުން ހުރީ ގައުމީ މުބާރާތަށް ކަމަށެވެ. އަދި ގައުމީ މުބާރާތަކީ ލީގުގައި އެންމެ ގިނަ ޕޮއިންޓް ލިބޭ މުބާރާތަށް ވުމާއެކު އެ މުބާރާތައް މިހާރަށްވުރެ ބޮޑަށް ތައްޔާރުވާނެ ކަން އާމިން ފާހަގަކުރި އެވެ.
