ވިޔަފާރި ކުރުމަށާއި މުވައްޒަފުން ނެގުމަށާއި ތަރައްގީގެ ޕްރޮޖެކްޓުތައް ހިންގަން ކައުންސިލަށް ލިބޭ ބާރު ހަނިކޮށް ލާމަރުކަޒީ ގާނޫނަށް ގެނައި ބަދަލު ތަސްދީގު ނުކުރަން ރައީސް މުހައްމަދު މުއިއްޒަށް އެމްޑީޕީގެ ޗެއާޕާސަން ފައްޔާޒް އިސްމާއިލް މިރޭ ގޮވައިލައްވައިފި އެވެ.
އެމްޑީޕީން ބޭއްވި ގައުމީ މަޖިލީހުގެ ޖަލްސާގައި ފައްޔާޒް ވިދާޅުވީ ކައުންސިލްތަކުގެ ބާރުތައް ހަނިވާ ގޮތަށް ފާސްކޮށްފައިވާ ބިލު ގައުމުގެ ހައްގުގައި ތަސްދީގު ނުކުރައްވަން ގޮވާލާ ކަމަށެވެ. އެކަމާމެދު ރަނގަޅަށް ވިސްނަވައި ކައުންސިލްތަކުގެ ބާރުތައް ނުހިފެއްޓުމަށް ވެސް ފައްޔާޒް އެދިވަޑައިގެންނެވި އެވެ.
"މިރޭ އަޅުގަނޑު ހަމަ މި ގައުމަށްޓަކައި ރައީސް މުއިއްޒުއަށް އަޅުގަނޑު ގޮވާލަން ތަސްދީގު ނުކުރައްވާށޭ އަދި ވިސްނަވާށޭ ތިކަން ހުއްޓާލައްވާށޭ،" ފައްޔާޒް ވިދާޅުވި އެވެ.
ފައްޔާޒް ވިދާޅުވީ، ބިލާ މެދު 56 ކައުންސިލަކުން ކަންބޮޑުވުން ފާޅުކޮށްފައި އޮތް ދަނޑިވަޅެއްގައި އަވަސް އަރުވާލައިގެން ދެ ދުވަހެއްގެ ތެރޭގައި ޕީއެންސީގެ މެޖޯރިޓީ ބޭނުންކޮށްގެން އެ ބިލު ފާސްކުރީ ސީދާ މުއިއްޒުގެ އިރުޝާދަށް ކަމަށާއި އެ ބިލު ތަސްދީގު ކުރައްވާނެކަން ވެސް އެނގޭ ކަމަށެވެ.
"56 ކައުންސިލުން މިހާރު ވެސް ކަންބޮޑުވުން ފާޅުކޮށްފައި އޮއްވައި އެއްވެސް ބެލުމެއް ނެތި ދެ ދުވަސް ތެރޭގައި އާންމުކޮށް އެބޭފުޅުން އެކަން ކުރައްވާ ބީދައިން މިއަދު އެ ފާސްއެކޮށްލީ ރައްޔިތުންގެ މަޖިލީހުން،" ފައްޔާޒް ވިދާޅުވި އެވެ.
"އަޅުގަނޑަށް އެނގޭ ރައީސުލްޖުމްހޫރިއްޔާގެ އެންގެވުމާއި އިރުޝާދުގެ މަތިންކަން މަޖިލިސްގައި އެކަން ވެގެން އެދިޔައީ އެހާ ބާރު ސްޕީޑުގައި. އަދި ގެޒެޓް ވެސް ކުރައްވާނެ ކަންނޭގޭ." ފައްޔާޒް ވިދާޅުވި އެވެ.
ފައްޔާޒް އިތުރަށް ވިދާޅުވީ ކުރިއަށް އޮތް އެމްޑީޕީގެ ވެރިކަމެއްގައި ލާމަރުކަޒީ ނިޒާމަށް ގެނައި އިސްލާހު ބަދަލުކޮށް ކުރިން އޮތް ގޮތަށް އިއާދަ ކުރުމާއެކު އިހުނަށްވުރެ ބޮޑެތި ބާރުތައް ކައުންސިލްތަކަށް އެމްޑީޕީން ދޭނެ ކަމަށެވެ.
މަޖިލީހުން ލާމަރުކަޒީ ގާނޫނަށް އިސްލާހު ގެންނަން ފާސްކުރި ބިލުގައި ހިމެނޭ ކަންކަން:
ވިޔަފާރި ކުރަން ކުރިމަތި ކުރުވާ ހުރަސްތައް
- އަމިއްލަ މީހަކު ކުރަމުންދާ ވިޔަފާރިއެއް ނުކުރެވޭ ގޮތް ހެދުން
- އުމްރާނީ ތަރައްގީއަށް ކޮންމެހެން ބޭނުންވާ މަސައްކަތެއް ނޫނީ ނުކުރެވުން
- ވިޔަފާރީގެ އިންވެސްޓްމަންޓު ނުވަތަ ރައުސުލްމާލު 10 މިލިއަން ރުފިޔާއަށް ވުރެ ބޮޑުވުން
- ކައުންސިލުން މިހާރު ކުރަމުންދާ ވިޔަފާރިތައް މަތީގައި ބަޔާން ކުރާ އުސޫލަކާ ހިލާފުވެއްޖެ ނަމަ އެ ވިޔަފާރިއެއް ތިން މަސްދުވަސް ތެރޭ ހުއްޓާލަން ޖެހުން
ތަންތަން ކުއްޔަށް ދިނުމަށް އެޅި ހުރަސްތައް
- އަސާސީ ހިދުމަތް ދިނުމަށް އެކި ފަރާތްތަކަށް ދޫކޮށްފައިވާ ބިންތަކުން ކުލި ނެގުން މަނާ ކުރުން.
މާލީ ކަންކަމަށް ނުފޫޒު ފޯރުވުން
- ފިނޭންސް މިނިސްޓްރީ އިން ކަނޑައަޅާ އުސޫލެއްގެ ދަށުން ކައުންސިލުތަކުގެ ބޭންކް އެކައުންޓުތައް ބަލަހައްޓަން މަޖުބޫރު ކުރުވުން
- ފިނޭންސް މިނިސްޓްރީ އިން ބޭނުންވެއްޖެ ހިނދެއްގައި ކައުންސިލުގެ ބޭންކު އެކައުންޓުގެ ސްޓޭޓްމަންޓެއް ދިނުމަށް މަޖުބޫރު ކުރުވުން
ކައުންސިލުގެ މަސައްކަތަށް ހުރަސް އެޅުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ދާއިމީ އަދި ކޮންޓްރެކްޓަށް ވެސް މުވައްޒަފުން ނެގޭނެ މަގު ބަންދު ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ކައުންސިލުގެ އިހުތިސާސްގެ ދަށުގައިވާ ބިމާއި ފަޅާއި ފަރުގެ ސަރަހައްދުގެ ކުއްޔަށް ދޫކުރުން މަނާ ކުރުން
- ކައުންސިލެއްގެ އުމުރުގައި ބާކީ އަހަރެއް އޮތް ނަމަ ތަރައްގީގެ އާ މަޝްރޫއުއެއް ހިންގުން މަނާ ކުރުން
