ލަންޑަން (އޮގަސްޓް 5) - އިންޑިއާ އާއި އިންގްލެންޑްގެ މެދުގައި ކުޅެވޭ ފަސް ޓެސްޓް މެޗުގެ ތެރެއިން ފަހު މެޗުގައި، ކުޅަދާނަ އުކުންތެރިޔާ، މުހައްމަދު ސިރާޖު ދެއްކި ތަފާތާ އެކު އިންޑިއާ އިން މޮޅުވެއްޖެ އެވެ.
އިންޑިއާ އާއި އިންގްލެންޑްގެ މެދުގައި ކުޅޭ ފަސް ޓެސްޓް މެޗުގެ ތެރެއިން އިންގްލެންޑުން ދެ މެޗުން މޮޅުވެފައިވާއިރު، އިންޑިއާ އިން އެއް މެޗު ކާމިޔާބުކުރި އެވެ. އަދި، އެންމެ ފަހުން، މެންޗެސްޓާގައި ކުޅުނު ހަތަރު ވަނަ ޓެސްޓް މެޗު ނިމުނީ އެއްވަރުވެގެންނެވެ.
ހެޑިންގްލީގައި ކުޅުނު ފުރަތަމަ ޓެސްޓް މެޗުން، އިން އިންގްލެންޑް މޮޅުވީ ފަސް ވިކެޓުންނެވެ. ދެ ވަނަ ޓެސްޓް، އެޑްގްބަސްޓަންގައި ކުޅެގެން އިންޑިއާ ކުރިހޯދީ 336 ލަނޑުންނެވެ. ތިން ވަނަ މެޗު، ލޯޑްސްގައި ކުޅެގެން 22 ލަނޑުން އިންގްލެންޑް މޮޅުވިއިރު، އެމިރޭޓްސް އޯލްޑް ޓްރެފޯޑްގައި ކުޅުނު ހަތަރު ވަނަ މެޗު އެއްވަރުވީ އެވެ.
އޯވަލްގައި ކުޅުނު ފަހު ޓެސްޓްގައި، އެންމެ މުހިންމު ވަގުތުގައި އިންޑިއާގެ ތަފާތަކަށްވީ، ފަސް ވިކެޓް ނެގި ސިރާޖު އެވެ. އިންޑިއާ އިން ހަ ލަނޑުގެ ހަނި ފަރަގަކުން މި މެޗު މޮޅުވުމުގައި، ތަފާތު ދެއްކީ ސިރާޖުގެ ވިސްނުންތޫނު އުކުންތަކުންނެވެ. އިންގްލެންޑުން 85.1 އޯވަރަށް 367 ލަނޑު ހެދިއިރު ހުރިހާ ކުޅުންތެރިން ނުބައިވި އެވެ.
އިންޑިއާގެ ކެޕްޓަން ޝުބްމަން ގިލްގެ ލީޑަޝިޕުގައި ނިންމާލި ފުރަތަމަ ޓެސްޓް ސީރީސްގައި، އޭނާގެ ފަރާތުން ވެސް ފާހަގަކޮށްލެވޭ ކުޅުމެއް ފެނިގެންދިޔަ އެވެ. މުޅި ސީރީސް އަށް ބަލާއިރު، އެންމެ ގިނަ ލަނޑު ހެދީ ގިލް އެވެ. އެއީ، 754 ލަނޑެވެ. އޭގެ ތެރޭގައި، ހަތަރު ސައްތަ ހިމެނެ އެވެ.
ގޯތަމް ގަމްބީރުގެ ކޯޗުކަމުގައި ކުޅުނު އިންޑިއާ އަށް މި ސީރީސްގައި ދިމާވި އެންމެ ބޮޑު ގޮންޖެހުމަކީ، ރަނގަޅު ފޯމެއްގައި ހުރި ރިޝަބް ޕާންޓް އަށް އަނިޔާވުމާއި، ފާސްޓް ބޯލަރު، ޖަސްޕްރީތު ބުމްރާ އަށް ހުރިހާ ޓެސްޓް މެޗެއްގައި ނުކުޅެވުމެވެ.
