ކުރީގެ ރައީސް އިބްރާހިމް މުހައްމަދު ސޯލިހުގެ ގެދޮރުވެރިޔާ މަޝްރޫއުގެ ދަށުން އިމާރާތް ކުރި 4000 ޔުނިޓު ނިންމައި "ރަމްޒީ ތަޅުދަނޑި" އިންޑިއާގެ ބޮޑުވަޒީރު ނަރެންދުރަ މޯދީ، ރައީސް ޑރ. މުހައްމަދު މުއިއްޒުއާ މިއަދު ހަވާލުކުރައްވައިފި އެވެ.
މި މަޝްރޫއު ނިންމައި ދިވެހި ސަރުކާރާ ރަސްމީކޮށް ހަވާލު ކުރީ މޯދީ ރާއްޖެއަށް ފެއްޓެވި ދެ ދުވަހުގެ ދަތުރުގައި، މިއަދު ރައީސް އޮފީހުގައި ބޭއްވި ރަސްމިއްޔާތުގަ އެވެ.
އިންޑިއާގެ އެގްޒިމް ބޭންކުގެ ލޯނުގައި ތަރައްގީކޮށްފައިވާ 4000 ހައުސިން ޔުނިޓު އިމާރާތް ކުރުމުގެ މަސައްކަތް ފެށީ 2021 ވަނަ އަހަރު އެވެ. އެ މަޝްރޫއުގެ ކޮންސްޓަރްކަޝަން މަސައްކަތްތައް ނިންމާފައި ވާއިރު، ފްލެޓު ލިބުނު ފަރާތްތަކާއެކު އެއްބަސްވުމުގައި މިހާރު ދަނީ ސޮއި ކުރަމުންނެވެ.
ގެދޮރުވެރިޔާ ސްކީމުގެ ދަށުން އިމާރާތްކޮށްފައި ވަނީ ދެ ކޮޓަރީގެ 1200 ޔުނިޓާއި ތިން ކޮޓަރީގެ 2800 އެވެ.
މި ޖުލައި މަސް ނިމުމުގެ ކުރިންފްލެޓުތައް ހަވާލުކޮށް ނިންމާނެ ކަމަށް ސަރުކާރުން ބުނެފައިވެ އެވެ.
ހައުސިން ޔުނިޓުތައް ހަވާލުކުރުމުގެ އިތުރުން، އައްޑޫ މަގުހެދުމުގެ މަޝްރޫއު އާއި ބައެއް ރަށްރަށުގައި ހިންގި އުމްރާނީ މަޝްރޫއުތައް ބޮޑުވަޒީރު މޯދީ މިއަދު އިފުތިތާހުކޮށް ދެއްވި އެވެ. އަދި އިންޑިއާ ސަރުކާރުން އެމްއެންޑީއެފް އަށް 72 ހެވީ ވެހިކަލް ވެސް ހަދީޔާ ކުރި އެވެ.
2021
