ޕެރިސް (ޖުލައި 16) - ޗެލްސީ އަށް ކުޅެމުން އަންނަ އިނގިރޭސި ގައުމީ ޓީމުގެ ތަރި، ކޯލް ޕާމާ އަށް ފްރާންސްގެ ޕީއެސްޖީން 300 މިލިއަން ޑޮލަރުގެ ބިޑެއް ކުރަން ތައްޔާރުވަމުން އަންނަ ކަމަށް ފްރާންސްގެ ނޫހެއް ކަމަށްވާ ލަ ޕެރީސިއަން އިން ރިޕޯޓްކޮށްފި އެވެ.
ދާދި ފަހުން އެމެރިކާގައި، ނިމިދިޔަ ފީފާ ކްލަބް ވޯލްޑް ކަޕްގެ ފައިނަލުގައި ޗެލްސީން 3-0 އިން ޕީއެސްޖީ ބަލިކުރިއިރު، މި މެޗުގެ ތަރިއަކީ ޕާމާ އެވެ. އޭނާ ވަނީ ދެ ގޯލު ޖެހުމުގެ އިތުރުން ދެން ޖެހި ގޯލަށް ފުރުސަތު ވެސް ތަނަވަސްކޮށްދީފަ އެވެ.
މީގެ އެއް އަހަރު ކުރިން، މެންޗެސްޓާ ސިޓީ ދޫކޮށް، 50 މިލިއަން ޑޮލަރުގެ ފީ އަކަށް ޗެލްސީން ޕާމާގެ ސޮއި ހޯދިއިރު، ފުރަތަމަ ސީޒަނުގައި އޭނާ ވަނީ، ޕްރިމިއާ ލީގުގައި 22 ގޯލު ޖަހައި، 11 ގޯލު ޖަހަން ފުރުސަތު ތަނަވަސްކޮށްދީފަ އެވެ. އަދި، މިހާތަނަށް ޗެލްސީ އަށް ކުޅެދިން، 97 މެޗުން 43 ގޯލު ޖަހައި، 29 ގޯލު ޖަހަން ފުރުސަތު ތަނަވަސްކޮށްދީފަ އެވެ.
ޗެލްސީއާ އެކު، ޕާމާގެ ކޮންޓްރެކްޓް އޮތީ 2033 ވަަނަ އަހަރުގެ ޖޫން މަހުގެ ނިޔަލަށެވެ. ރިޕޯޓްތައް ބުނާގޮތުން، ޕީއެސްޖީން ޕާމާގެ ސޮއި ހޯދަން ހުށަހަޅަން ތައްޔާރުވަނީ، ދުނިޔޭގެ ޓްރާންސްފާ ރެކޯޑެކެވެ. އެއީ، 300 މިލިއަން ޑޮލަރުގެ ޕެކޭޖެއް ކަމަށް ރިޕޯޓްތައް ބުނާއިރު، މިހާތަނަށް ރެކޯޑް ޓްރާންސްފާ އަކަށް އޮތީ ޕީއެސްޖީން، 2017 ވަނަ އަހަރު ބާސެލޯނާ އަށް 277 މިލިއަން ޑޮލަރު ދީފައި ގަތް ނޭމާ އެވެ.
ޕީއެސްޖީން މިދިޔަ ސީޒަނުގެ ޗެމްޕިއަންސް ލީގު ހޯދުމުގެ އިތުރުން، ފީފާ ކްލަބް ވޯލްޑް ކަޕްގެ ފައިނަލަށް ދަތުރުކުރުމުން އެ ކްލަބަށް އެ ދެ މުބާރާތުގެ އާމްދަނީ އެއްކޮށް ވެސް ވަނީ 200 މިލިއަން ޑޮލަރަށް ވުރެ އިތުރަށް ލިބިފަ އެވެ. އަދި، ފްރާންސްގެ ތިން މުބާރާތުގެ ތަށި ވެސް ހޯދި ޕީއެސްޖީ އަށް އަންނަ މަހު، ޔުއެފާ ސުޕަ ކަޕް ކާމިޔާބުކުރުމުގެ ފުރުސަތު ވެސް އޮތްއިރު، އެ ކްލަބުން ފައިނޭންޝިއަލް ފެއާޕްލޭ (އެފްއެފްޕީ)އާ ހިލާފުނުވެ، އެ ވަރުގެ އިންވެސްޓެއް ޕާމާ އަށް ކުރަން ގަވާއިދުގެ ތެރެއިން ހުރަހެއް ނެތެވެ.
