އެމަނިކުފާނު ވެރިކަމާ ހަވާލުވެވަޑައިގެންނެވިރިއު، މި އަހަރުގެ މިނިވަން ދުވަހު ހުޅުވާ ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ އައު ފަސިންޖަރުންގެ ޓާމިނަލުގެ ގިނަ މަސައްކަތްތައް ހުރީ ހަވާލުނުކޮށް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެ އެވެ.
ރައީސް އޮފީހުން ގެނެސްދޭ "ރައްޔިތުންނާ އެކު" ޕޮޑްކާސްޓުގެ އައު އެޕިސޯޑެއްގައި ވާހަކަދައްކަވަމުން ރައީސް ވިދާޅުވީ، ޓާމިނަލް މަޝްރޫއުގެ ސްކޯޕު އޮތީ ސިމެންތި ފިނިޝިން އެއްގައި އެތަން ނިންމުން ކަމަށާއި، ކޮންމެހެން ބޭނުންވާ ގިނަ ކަންކަން ކުރުމުގެ ޕްލޭނެއް ވެސް ނެތް ކަމަށެވެ.
އެގޮތުން, ވެރިކަމާއި ހަވާލުވެވަޑައިގެން އެންމެ ފުރަތަމަ ވެސް ޒިޔާރަތްކުރި އެއް ތަނަކީ ޓާމިނަލުގެ މަސައްކަތު ސައިޓު ކަމަށާއި އޭރު މަސައްކަތް ގޮސްފައި އޮތް ހިސާބު ވަރަށް ސާފުކޮށް އެ ދުވަހު އެނގުނު ކަމަށް ރައީސް ވިދާޅުވި އެވެ. ހާއްސަކޮށް ޓާމިނަލަށް ދާ މަގާއި ޑިއުޓީ ފްރީ ސަރަހައްދުގެ މަސައްކަތް ހަވާލުކޮށްފައިނުވާކަމަށް ރައީސް ވިދާޅުވި އެވެ.
"ޓާމިނަލް އޮޕަރޭޝަނަލް ވަންޏާ ކުރަންޖެހޭ ކިތަންމެ ކަމެއް ހުރި. އަދި، ޕްރޮޖެކްޓުގެ ސްކޯޕް ތެރޭގަ، ހަވާލު އެކި ފަރާތްތަކާއި ކޮށްފަ ނުވާ ކީ އެތައް ކަމެއް ވެސް ހުރި. ހަވާލުކުރަންޖެހޭ،" ރައީސް ވިދާޅުވި އެވެ.
އެއާޕޯޓުގެ މައި މަގާއި ޓާމިނަލް ގުޅުވާލުމަކީ މި ސަރުކާރުން ޕްލޭންކޮށް، ބަޔަކާއި ހަވާލުކޮށްގެން ކުރި ކަމެއް ކަމަށާއި އެއީ ކުރިން ސްކޯޕުގައި އެއްވެސް ގޮތަކަށް ނެތް ކަމެއް ކަމަށް ވެސް މިއަދު ރައީސް ވަނީ ވިދާޅުވެފަ އެވެ. އަދި، މި ވެރިކަން ފެށުނުއިރު ނިމިފައި އޮތީ ހަމައެކަނި ޓާމިނަލް އިމާރާތުގެ 53 އިންސައްތަ ކަމަށާއި އެއީ އެކަމުގެ ވަށައިގެންވާ މަސައްކަތްތަކެއް ހިމެނޭ އަދަދެއް ނޫން ކަމަށް އެމަނިކުފާނު ވިދާޅުވި އެވެ.
"މިސާލަކަށް، އެހާ ބައިވަރު މީހުންނަށް ހިދުމަތްދޭ ޓާމިނަލެއް، އިންޓަނޭޝަނަލް ފެންވަރުގެ ޓާމިނަލަކަށްވާއިރު، އެތާ އެތެރޭގަ ކޮންމެ ގޮތެއްވިޔަސް ޑިއުޓީ ފްރީއެއް ހުންނަން ޖެހޭނެ. ކޮމާޝަލް އޭރިއާއެއް ހުންނަން ޖެހޭނެ. އެވެސް ނެތް ބަޔަކާ ހަވާލުކޮށްފަ. އެއްވެސް ކަމެއް ނެތް. ހަމަ މި. ސިމެންތި ފިނިޝިން އެއްގަ. މަތިވެސް، އަރިމަތިވެސް، ބިންމަތިވެސް، ހުރިހާ ތަނެއްވެސް، ހަމަ ދޫކޮށްލާ ގޮތަށް ހުރީ. އެއްވެސް ކަމެއް ނެތޭ އެތާ ހަވާލުކޮށްފަ އެއް،" ރައީސް ވިދާޅުވި އެވެ.
އަލަށް ހަވާލުކުރި ކަމަށް ރައީސް ވިދާޅުވާ މަސައްކަތްތަކާއެކު ޖުލައި 26، ގައި ހުޅުވޭ ވަރަށް މިހާރު މަސައްކަތް ނިމިފައިވާ ކަމަށާއި ބާކީ މަސައްކަތްތައް ސެޕްޓެމްބަރު މަހަށް ނިންމާ މުޅި ޓާމިނަލް އޮޕަރޭޝަނަށް ގެންނާނެ ކަމުގެ ޔަގީންކަން ރައީސް ވަނީ ދެއްވާފަ އެވެ. މުޅި ޓާމިނަލް ނިމޭނެ ކަމަށް އެމަނިކުފާނު ފުރަތަމަ ދެއްވި ތާރީހަކީ މިދިޔަ އަހަރުގެ އޮކްޓޯބަރު މަހެވެ.
މި ވާހަކަތަކަކީ ކުރީގެ ވެރިންގެ މަސައްކަތްތައް ބަލައިނުގަންނާތީ ދައްކާ ވާހަކަތަކެއް ނޫން ކަމަށާއި މި މަޝްރޫއުގެ މަސައްކަތް ދިޔަ ސްޕީޑާއި ވެރިކަންކަމުގައި ލިބުނު އަވަސްކަން ތާރީހުން ފެންނާނެ ކަމަށް އެމަނިކުފާނު ވިދާޅުވި އެވެ.
ވީއައިއޭގެ އާ ޕެސެންޖާ ޓާމިނަލަކީ ކުރީގެ ރައީސް އަބްދުﷲ ޔާމީން ފެއްޓެވި ވެލޭނާ އެއާޕޯޓުގެ އެކްސްޕޭންޝަން ޕްރޮޖެކްޓުގެ ދަށުން ކުރާ މަސައްކަތެކެވެ.
ޕެސެންޖާ ޓާމިނަލް ހިމެނޭ ގޮތަށް މިހާރު ކުރިޔަށްދާ ވެލާނާ އިންޓަނޭޝަނަލް އެއާޕޯޓުގެ އެކްސްޕެންޝަން ޕްރޮޖެކްޓް އެއްކޮށް ނިމުމުން، އެއާޕޯޓުގެ ކެޕޭސިޓީ ދެ ގުނައަށް ވުރެ އިތުރުވެ، އަހަރަކު 7.5 މިލިއަން ފަސިންޖަރުންނަށް ހިދުމަތް ދެވޭ ފެންވަރަށް ވަސީލަތްތައް ތަރައްގީ ވެގެން ދާނެ އެވެ.
ދެ ފަންގިފިލާއަށް ހުންނަ ޒަމާނީ ފެންވަރުގެ އާ ޓާމިނަލްގައި 78،000 އަކަމީޓަރުގެ ޖާގަ ހުންނާނެ އެވެ. މިއާއެކީ މިހާރުގެ ޓާމިނަލަށް ދިމާވެފައިވާ ޖާގައިގެ ދަތިކަމުގެ މައްސަލަ ހައްލު ވެގެން ދާނެ އެވެ. އޭގެ އިތުރުން އެއިރޯ ބޯޑިން ބްރިޖުތަކާއި "ސްޓޭޓް-އޮފް-ދި-އާޓް" ބެޖޭޖް ހޭންޑްލިން ސިސްޓަމްތަކާއި، އެފްއެންބީ އައުޓްލެޓްތަކުގެ އިިތުރުން ލޯންޖުތަކާއި އެހެނިހެން ހިދުމަތްތައް ހުންނާނެ އެވެ.
