ސަރުކާރުން ވަރަށް ކުލަ ގަދަކޮށް ފާހަަގަކުރަން ރާވާފައިވާ 60 ވަނަ މިނިވަން ދުވަހުގެ ހަރަކާކްތަކަށް ޖުމްހޫރީީ މައިދާން ތައްޔާކުރަން އެ ސަރަހައްދު ބަންދުކޮށްފި އެވެ.
ކޮންސްޓްރަކްޝަން މިނިސްޓްރީން ގެޒެޓުކޮށްފައިވާ އިއުލާނެއްގައި ބުނީ، ޖުމްހޫރީ މައިދާން މަރާމާތުކޮށް ޒީނަތްތެރިކުރުމުގެ މަސައްކަތް ކުރިއަށް ގެންދިޔުމަށް، އިއްޔެއިން ފެށިގެން މި މަހުގެ 25 ވަނަ ދުވަހާ ހަމައަށް އެ ސަރަހައްދު އާންމުންނަށް ބަންދުކުރެވިފައިވާ ކަމަށެވެ.
މިނިވަން ދުވަހުގެ ހަރަކާތްތަކަށް ޖުމްހޫރީ މައިދާން ސަރަހައްދު ބަންދުކުރިއިރު، މިނިވަން ދުވަހާ ގުޅުވާ ގިނަ ހަރަކާތްތަކެއް ހިންގަން ތައްޔާރުވަމުން އަންނަ ކަމަށް މައުލޫމާތު ލިބެ އެވެ. ނަމަވެސް އެ ދުވަހުގެ ހަރަކާތްތައް ރޭވިފައިވާ ގޮތެއް ސަރުކާރުން އަދި ރަސްމީކޮށް ނުބުނެ އެވެ.
ސަރުކާރުން ވަނީ މިނިވަން ދުވަހާ ގުޅިގެން ހާއްސަ ލޯގޯއެއް ވެސް ބޭނުންކުރަން ފަށާފަ އެވެ. ސަރުކާރުން ވަނީ އަންނަ އަހަރުގެ މިނިވަން ދުވަހާ ހަމައަށް ސަރުކާރުން ފޮނުވާ ލިޔުންތަކާއި ސިޓީތަކުގައި މި ލޯގޯ ބޭނުންކުރަން ނިންމާފަ އެވެ.
މިނިވަން ދުވަހާ ގުޅުވާ ރާވާފައިވާ އެންމެ ބޮޑު އެއް ހަރަކާތަކީ ވެލާނާ އިންޓަނޭޝަނަލް އެއާޕޯޓުގެ އާ ޓާމިނަލް ހުޅުވުމުގެ ރަސްމިއްޔާތެވެ. މި ރަސްމިއްޔާތަށް މިލިއަނަކަށް ވުރެ ގިނަ ޑޮލަރު ހަރަދުކުރާއިރު، ދުނިޔޭގެ ރެކޯޑު މުގުރާލާ ވަރުގެ ޑްރޯން ޝޯއެއް ބާއްވަން ތައްޔާރުވަމުންދާ ކަަމަށް ވެސް މައުލޫމާތު ލިބެ އެވެ.
