ހ. މިޓާޒް ގޭގެ ފުރާޅުމައްޗަށް ވެއްޓިފައި އޮއްވައި ފެނުނު ހައްވާ ޔުމްނު ރަޝީދު، 21، އަށް އިންސާފު ހޯދައިދިނުމަށް ގޮވާލައި މާލޭގައި ކުރި ޒުވާނުންގެ މުޒާހަރާތަކުގައި އިސްކޮށް ހަރަކާތްތެރިވި އަބްދުالله މަހުޒޫމް މާޖިދު އާއި އައިޝަތު ޝިމަންގެ މައްޗަށް ދައުލަތުން ޖިނާއީ ދައުވާ އުފުލުމުން ގިނަ ބަޔަކު އެކަން ކުށްވެރިކޮށްފި އެވެ.
ޝިމަން އާއި މަހުޒޫމްއަށް ދައުވާ ކުރުން ކުށްވެރި ކުރައްވައި ސޯޝަލްމީޑިއާގައި ޕޯސްޓު ކުރެއްވި ބޭފުޅުންގެ ތެރޭގައި އެމްޑީޕީގެ ޗެއާޕާސަން، ފައްޔާޒް އިސްމާއިލް އާއި މާލެ ސިޓީގެ މޭޔަރު، އާދަމް އާޒިމްގެ އިތުރުން މާފަންނު އުތުރު ދާއިރާގެ ކުރީގެ މެންބަރު، އިމްތިޔާަޒު ފަހުމީ ވެސް ހިމެނިވަޑައިގަންނަވަ އެވެ.
ޝިމަން އާއި މަހުޒޫމްގެ މައްޗަށް ޖިނާއީ ދައުވާ އުފުލުން ކުށްވެރި ކުރައްވައި ސޯޝަލްމީޑިއާގައި ފައްޔާޒް ކުރެއްވި ޕޯސްޓެއްގައި ވިދާޅުވީ އެއްވެ އުޅުމުގެ ހައްގާއި ހިޔާލުފާޅު ކުރުމުގެ ހައްގު ބޭނުން ކުރުމުގެ ސަބަބުން ޒުވާނުންތަކެއް ކުށުގެ އަދުލުގެ ނިޒާމުގެ ތެރެއަށް އެއްލައިލުމަކީ ހަޑި މުޑުދާރު އަމަލެއް ކަމަށެވެ.
"މިއީ ޒުވާނުންގެ ހިތްހަމަނުޖެހުންތަކާ ގުޅިގެން އަޑުއުފުލުން ހުއްޓުވުމަށް ސަރުކާރުން ކުރި ލަދުވެތި ކަމެއް،" ފައްޔާޒް ވިދާޅުވި އެވެ.
އެކަމާ ގުޅިގެން މާލެ ސިޓީގެ މޭޔަރު، އާދަމް އާޒިމް ކުރެއްވި ޕޯސްޓެއްގައި ވިދާޅުވީ ސުލްހަވެރިކަމާއެކު މުޒާހަރާކުރުމަކީ އަސާސީ ހައްގެއް ކަމަށާއި ހިޔާލުފާޅު ކުރުމުގެ ބާވަތެއް ކަމަށެވެ.
"ޒުވާނުންގެ ގޮވައިލުންތަކަށް އިހުތިރާމުކޮށް [ޝިމަން އާއި މަހުޒޫމްގެ] މައްޗަށް އުފުލާފައިވާ ހުރިހާ ދައުވާއެއް ވަގުތުން ވަގުތަށް އަނބުރާ ގެންދިޔުމަށް ގޮވައިލަން،" އާޒިމް ކުރެއްވި ޕޯސްޓުގައި ވިދާޅުވި އެވެ.
ޝިމަން އާއި މަހުޒޫމްގެ މައްޗަށް ދައުވާ ކުރަން ދައުލަތުން ނިންމުމާ ގުޅިގެން ކެންދޫ ދާއިރާގެ ކުރީގެ މެންބަރު، އަލީ ހުސެއިން ކުރެއްވި ޕޯސްޓެއްގައި ވިދާޅުވީ އެ ދެ މީހުންގެ މައްޗަށް ކޮށްފައިވަނީ ޒުވާނުންނަށް ބިރު ދެއްކުމުގެ ގޮތުން ކޮށްފައިވާ ފެންނުޖެހޭ ހުހި ދައުވާތަކެއް ކަމަށެވެ.
މަހުޒޫމްގެ މައްޗަށް ދައުވާ އުފުލާފައި ވަނީ ގާނޫނުލްއުގޫބާތުގެ 120 ވަނަ މާއްދާގެ ހ. ގެ އެއްވަނަ ނަންބަރާ ހަވާލާދީ އެ މާއްދާގެ ށ. ގެ ތިންވަނަ ނަންބަރުގެ ދަށުންނެވެ.
ގާނޫނުލްއުގޫބާތުގެ 120 ވަނަ މާއްދާގެ ހ. ގެ އެއްވަނަ ނަންބަރުގައި ބުނެފައި ވަނީ މީހެއްގެ ރުހުމަކާ ނުލައި އޭނާގެ ގައިގައި އަތްލުން ނުވަތަ އޭނާއަށް އަނިޔާއެއް ކުރުމަކީ ކުށެއް ކަމަށެވެ.
އެ މާއްދާގެ ށ. ގެ ތިންވަނަ ނަންބަރުގައި އޮންނަނީ އެ އަމަލުގެ ސަބަބުން އަނިިޔާ ލިބުނު ފަރާތަކީ ފުލުހެއް ނުވަތަ ސިފައިންގެ މީހެއް ކަމުގައިވުމެވެ.
އެ ކުށް ކުރާ މީހަކަށް ދެވޭ އަސާސީ އަދަބަކީ އެއް މަހާއި ހަ ދުވަހުގެ ޖަލު ހުކުމެކެވެ.
ޝިމަންގެ މައްޗަށް ދައުލަތުން އުފުލަނީ ގާނޫނު ތަންފީޒު ކުރާ މުވައްޒަފަކު ނުވަތަ މީހުން ބަންދުގައި ބައިތިއްބާ ތަނެއް ބަލަހައްޓާ މުވައްޒަފަކު ރަސްމީ ހައިސިއްޔަތުން ކުރުން ހުއްދަ ކަމެއް ކުރުން ގަސްދުގައި ހުއްޓުވުން ނުވަތަ އެކަމަށް ހުރަސްއެޅުން ނުވަތަ އެކަމެއް ކުރިއަނުދިނުމުގެ ކުށުގެ ދައުވާ އެވެ.
އެ ކުށް ކުރާ މީހަކަށް ދެވޭ އަސާސީ އަދަބަކީ ހަތަރު މަހާއި 24 ދުވަހުގެ ޖަލު ހުކުމެކެވެ. އެ ކުށަށް ދެވޭ އެންމެ ބޮޑު އަދަބަކީ އެއް އަހަރު ދުވަހުގެ ޖަލު ހުކުމެކެވެ.
ޝިމަން އާއި މަހްޒޫމް ހައްޔަރުކުރީ ސުލްހަވެރިކަމާއެކު މުޒާހަރާ ކުރަމުން ދަނިކޮށް މުޒާހަރާ ރޫޅާލާނެ ކަމުގެ އިންޒާރެއް ވެސް ނުދީ އެވެ. މުޒާހަރާ ރޫޅާލި ހަމައެކަނި ސަބަބަކީ މަގުމަތީ މުޒާހަރާ ކުރުމުން ވިޔަފާރިތަކަށް ދަތިވުމާއި އޯލެވެލް ޓެސްޓު ހަދާ ކުދިންނަށް މުޒާހަރާގެ ސަބަބުން އުނދަގޫވުން ކަމަށް ފުލުހުން ބުންޏެވެ.
ޒާހަރާގެ ތެރެއިން އެ ދެމީހުން ހައްޔަރު ކުރީ ހާލަތާ ނުބައްދަލު ބާރު ބޭނުން ކޮށްގެން ކަމަށް އެ ވަގުތު އެ ސަރަހައްދުގައި ތިބި މީހުން ބުންޏެވެ. ހައްޔަރު ކުރުމަށް ފުލުހުން އަމަލު ކުރި ގޮތުން އެ ދެ މީހުންނަށް ވެސް އަނިޔާ ލިބުނެވެ.
