ވޮޝިންޓަން، ޔުނައިޓެޑް ސްޓޭޓްސް (ޖޫން 22) - ފީފާ ކްލަބް ވޯލްޑް ކަޕްގައި ރޭ ޖަޕާނުގެ އުރާވާ ރެޑް ޑައިމަންޑްސް އަތުން އިޓަލީގެ އިންޓަ މިލާނުން 2-1 އިން ހަނި މޮޅެއް ހޯދައިފި އެވެ.
އިންޓަ އިން ފުރަތަމަ މެޗުގައި ވަނީ، މެކްސިކޯގެ ގަދަބާރު، މޮންޓެރޭއާ 1-1 އިން އެއްވަރުވެފަ އެވެ. އެހެންކަމުން، ރޭގެ މެޗުން މޮޅުވެ، މުބާރާތުގެ ގަދަ 16 ބުރުން ޖާގަ އެއް ހޯދުމުގެ ފުރުސަތު ބޮޑުކުރަން އެ ޓީމުން އޮތީ އަމާޒުހިފައިފަ އެވެ.
އެހެން ނަމަވެސް، ސިއޭޓްލްގެ ލުމެން ފީލްޑްގައި، 25،000 އަށް ވުރެ ގިނަ ސަޕޯޓަރުންގެ ކުރިމަތީގައި ކުޅުނު މެޗުގައި، ފުރަތަމަ އިންޓަ ކޮޅަށް ގޯލު ޖަހައި، އުރާވާއިން ވަނީ ލީޑުނަގައިފަ އެވެ. އޭޝިއާގެ ޗެމްޕިއަންކަން ހޯދާފައިވާ އުރާވާ އަށް މެޗުގެ، 11 ވަނަ މިނިޓްގައި މި ގޯލު ޖަހައިދިނީ، ރަޔޯމާ ވަޓަނާބޭ އެވެ. މި ލަނޑާ އެކު، މެޗުގެ ބޮޑުބައިގައި، އުރާވާ އިން ލީޑުގައިވެސް އޮތެވެ.
ނަތީޖާ ހަމަހަމަކުރަން އިންޓަ އިން ކުރި މަސައްކަތް ކާމިޔާބުވީ މެޗުގެ 78 ވަނަ މިނިޓްގަ އެވެ. މި ލަނޑު އެ ޓީމަށް ޖަހައިދިނީ، ނިކޯލޯ ބަރޭލާ ދިން ބޯޅައަކުން ލަޓާރޯ މާޓީނޭޒް އެވެ. އޭނާ މި ގޯލު ޖެހީ އޯވަހެޑްކިކަކުންނެވެ.
އިންޓަ މޮޅުކޮށްދިން ގޯލު ޖެހީ މެޗުގެ އިތުރު ވަގުތުގެ ދެ ވަނަ މިނިޓްގައި، ވަލެންޓީން ކާބޯނީ އެވެ. މި ލަނޑާ އެކު، އިންޓަ އިން މި މެޗު ކާމިޔާބުކުރިއިރު، މިއީ އެ ޓީމުގެ ކޯޗުކަމާ ހަވާލުވި، ރުމޭނިއާގެ ކުރީގެ ކެޕްޓަން، ކްރިސްޓިއަން ކީވޫގެ އިރުޝާދުގެ ދަށުން އެ ޓީމު މޮޅުވި ފުރަތަމަ މެޗެވެ.
މި ގްރޫޕްގެ އަނެއް މެޗުގައި، މޮންޓަރޭ ވަނީ ލަނޑެއް ނުޖެހި، 0-0 އިން އާޖެންޓީނާގެ ރިވަ ޕްލޭޓާ އެއްވަރުވެފަ އެވެ.
ގްރޫޕް އެފްގައި ރޭ، ދެކުނު އެފްރިކާގެ މަމެލޯޑީ ސަންޑައުންސް އަތުން ބޮރޫޝިއާ ޑޯޓްމަންޑް 4-3 އިން މޮޅުވިއިރު، ދެކުނު ކޮރެއާގެ އުލްސާން އެޗްޑީ އަތުން، ބްރެޒިލްގެ ފްލުމިނެންސޭ ވަނީ 4-2 އިން މޮޅުވެފަ އެވެ.
