ބޮޑު އީދު ފާހަގަ ކުރުމުގެ ގޮތުން މާދަމާއިން ފެށިގެން އަންނަ އާދީއްތަ ދުވަހުގެ ރެއާ ހަމައަށް މާލެ އާއި ހުޅުމާލޭގައި އާއިލީ ހަވީރުތަކެއް ބާއްވަން ތައްޔާރުވެއްޖެ އެވެ.
އާއިލީ ހަވީރު މާލޭގައި އޮންނަނީ ޖުމްހޫރީ މައިދާނުގަ އާއި ސަލްޓަން ޕާކުގަ އެވެ. ހުޅުމާލޭގައި އޮންނަނީ ސެންޓްރަލް ޕާކުގަ އާއި ފޭސް ދޭއްގެ ހިޔާ ޕާކުގަ އެވެ. އާއިލީ ހަވީރު ކުރިއަށް ގެންދަން ނިންމާފައި ވަނީ ކޮންމެ ދުވަހެއްގެ ވެސް ހަވީރު 4:00 އިން އިރުއޮއްސި 6:00 އަށެވެ. ނަމަވެސް ބައެއް ސްޓޯލްތައް ރޭގަނޑު ވެސް ހުޅުވާފައި ހުންނާނެ ކަމަށް އެމްއެންޑީއެފުން ބުންޏެވެ.
މާލެ އާއި ހުޅުމާލޭގައި އީދުގެ ތިން ދުވަހު އާއިލީ ހަވީރުތަކެއް ބާއްވަނީ އެމްއެންޑީއެފް އިސްވެ އޮވެ، ސަރުކާރު ހިއްސާވާ ކުންފުނިތަކާއި ބައެއް ވުޒާތާތަކުގެ ބައިވެރިވުމާ ވެސް އެކު އެވެ.
އެމްއެންޑީއެފުން ބުނީ އެ އާއިލީ ހަވީރުތަކުގައި ރާއްޖޭގެ ސަގާފަތާއި އިހުގައި ދިވެހީން ކުޅެއުޅުނު ކުޅިވަރުތައް ދައްކައިލުން އޮންނާނެ ކަމަށެވެ. އަދި ޒަމާނީ ކެރެކްޓާތަކާއި އެމްއެންޑީއެފް ބޭންޑުގެ ހަރަކާތްތަކުގެ އިތުރުން އެ މުއައްސަސާއިން ބެނުންކުރާ ބައެއް ހަތިޔާރުތަކާއެކު ފޮޓޯ ނެގުން ފަދަ ކަންކަން ވެސް އާއިލީ ހަވީރުގެ ތެރެއިން ކުރިއަށް ދާނެ ކަމަށް އެމްއެންޑީއެފުން ބުންޏެވެ.
އޭގެއިތުރުން ސަރުކާރު ކުންފުނިތަކާއި މިނިސްޓްރީތަކުން ތައްޔާރުކުރާ ސްޓޯލްތަކުގައި ތަފާތު ގޭމުތަކާއި ކުޅިވަރު ހަރަކާތްތައް ވެސް އޮންނާނެ ކަމަށް އެމްއެންޑީއެފުން ބުންޏެވެ.
މީގެ ކުރިން މިދިޔަ ކުޑަ އީދުގައި ބޭއްވި އާއިލީ ހަވީރަށް ވެސް ގިނަ ބައެއްގެ ތަރުހީބު ލިބުނެވެ.
