ރާއްޖޭން ސިންގަޕޫރާ ދެކޮޅަށް 1992 ވަނަ އަހަރުގެ އޮލިމްޕިކްސްގެ ކޮލިފައިން ބުރުގައި، އޭގެ އެއް އަހަރު ކުރިން ކުޅުނު ދެ މެޗުގެ ތެރެއިން ފުރަތަމަ މެޗުން އެއްވަރުކުރި ފަހުން، ކުޅުނު އަށް މެޗުން ވެސް ވީ ބައްޔެވެ. އެހެންކަމުން، ފީފާ ކަލަންޑަރު، ބައިނަލްއަގުވާމީ އެކުވެރިކަމުގެ މެޗެއްގައި، މާދަމާ ހަވީރު ސިންގަޕޫރާ ދެކޮޅަށް އެ ގައުމުގައި ރާއްޖޭން ކުޅޭއިރު، ގައުމީ ޓީމުން ރަނގަޅު ނަތީޖާއެއް ނެރޭނަމަ އަމާޒުހިފާނީ ތާރީހީ ކަމެއް ހާސިލްކުރުމަށެވެ.
ސިންގަޕޫރާ ދެކޮޅަށް މާދަމާ ހަވީރު ރާއްޖެ ގަޑިން 16:30 ގައި ކުޅޭ މެޗުގެ ކުރިން މިއަދު ބޭއްވި ނޫސްވެރިންގެ ބައްދަލުވުމުގައި، ގައުމީ ފުޓްބޯޅަ ޓީމުގެ ކޯޗު، ސުޒޭން ބުނީ އެންމެ ފަހުން ރާއްޖޭން ސިންގަޕޫރާ ދެކޮޅަށް ނަތީޖާއެއް ނެރުނުއިރު، އޭނާ އަކީ ޓީމުގެ ކުޅުންތެރިއެއް ކަމަށެވެ.
އަދި، މި ފަހަރު ގައުމީ ޓީމުގެ ކޯޗެއްގެ ގޮތުގައި ހުރެ ވެސް ނަތީޖާއެއް ހާސިލްކުރަން މަސައްކަތް ކުރާނެ ކަމަށް ސުޒޭން ވަނީ ބުނެފަ އެވެ.
މިއަދު ބޭއްވި ނޫސްވެރިންގެ ބައްދަލުވުމުގެ ތެރެއިން ސުޒޭން.--- ފޮޓޯ: އެފްއޭއެމް
"ތި ބުނި ގޮތަށް އަހަރެމެންނަށް ސިންގަޕޫރު އަތުން މޮޅުވެވިފައި ނެތް. އަހަންނަށް ހީވާ ގޮތުގައި، އަހަރެމެން ސިންގަޕޫރާ ދެކޮޅަށް ކުޅުނު އެންމެ ފުރަތަމަ މެޗުގައި، 1991 ވަނަ އަހަރު އޮލިމްޕިކް ކޮލިފައިންގައި ބެއިޖިންގައި، ޕިޔޮންޔަންގައި، އެ މެޗުގައި، އަހަރެމެން ސިންގަޕޫރާ 2-2 އިން އެއްވަރުވީ އެ ފަހުން، އަހަންނަށް ހިއެއްނުވޭ ރާއްޖޭން ސިންގަޕޫރާ ދެކޮޅަށް ރަނގަޅު ނަތީޖާއެއް ނެރުނުހެން،" 1991 ވަނަ އަހަރުގެ އޮލިމްޕިކްސް ކޮލިފައިން އޭޝިއާ ބުރުގެ ގްރޫޕްގެ ފުރަތަމަ މެޗުގައި، ސިންގަޕޫރާ 1-1 އިން އެއްވަރުވި މެޗަށް އިޝާރާތްކޮށް ސުޒޭން ބުންޏެވެ.
"ހިނގާ ބަލަމާ، މި ފަހަރު (މާދަމާގެ މެޗުގައި) އަހަރެން މި ހުރީ ކޯޗެއްގެ ގޮތުގައި، ފެނިގެންދާނެ ދެން، އަހަރެމެންނަށް ރަނގަޅު ނަތީޖާއެއް ހާސިލްކުރެވެންޏާ،"
އޮލިމްޕިކްސްގެ ފުޓްބޯޅަ އިވެންޓަކީ، ސީނިއާ ފުޓްބޯޅަ އަށް ވުރެ، 23 އަހަރުން ދަށުގެ ކުޅުންތެރިންނަށް ހާއްސަކޮށް، ސީނިއާ ތިން ކުޅުންތެރިންނަށް ފުރުސަތު ދޭ ގޮތަށް ރޭވިފައި އޮންނަ ކަމެކެވެ. ސީނިއާ ފުޓްބޯޅައިގައި، ރާއްޖެ އަށް އަދި ސިންގަޕޫރު ކައިރިން ނަތީޖާއެއް ނުހޯދެ އެވެ.
ސުޒޭން ބުނީ ހަގީގަތުގައި، ރާއްޖެ ޓީމުގެ މައިގަނޑު ފޯކަސް ހުރީ، މި މަހު 10 ވަނަ ދުވަހު ޓިމޯ ލެސްޓޭއާ ކުޅޭ އޭޝިއަން ކަޕް ކޮލިފިކޭޝަން މެޗަށް ކަމަށެވެ. އަދި، އެ މެޗަށް ދާއިރު މިއީ، ރާއްޖެ އަށް ލިބުނު ބޭނުންހިފޭނެ ރަނގަޅު މެޗެއްގެ ގޮތުގައި، ސުޒޭން ފާހަގަކުރި އެވެ.
ރާއްޖޭގައި ލީގު ފުޓްބޯޅަ ނުކުޅޭތާ ދެ އަހަރެއްހާ ދުވަސް ވެފައިވާއިރު، ދާދި ފަހުން، ކުޅުނު އެފްއޭއެމް ލީގު ކަޕްގެ ސަބަބުން ކުޅުންތެރިންގެ ކޮންފިޑެންސަށް ކޮންމެ ވެސް ވަރެއްގެ ހެޔޮ ބަދަލުތަކެއް އަންނާނެ ކަމަށް ސުޒޭން ގަބޫލުކުރެ އެވެ. އަދި، މާޗްް މަހު، ރާއްޖޭގައި ފުޓްބޯޅައިގެ މަތީ ލެވަލްގެ އެއްވެސް ކަމެއް ނެތި، ފިލިޕީންސާ ދެކޮޅަށް އޭޝިއަން ކަޕް ކޮލިފައިންގައި ކުޅުނު މެޗާ އަޅާކިޔާއިރު، ކުރިއަށް ހުރި މެޗުތަކުގައި ގައުމީ ޓީމު ކުރިއަށްވުރެ ރަނގަޅުވާނެ ކަމަށް ސުޒޭން ވަނީ ބުނެފަ އެވެ.
"(މާޗް މަހު) ފިިލިޕީންސާ ވެސް ކުޅުނިން ލީގު ފުޓްބޯޅަ ނެތި، އެ މެޗު ހަގީގަތުގައި އުނދަގޫވި، ލީގެއް ނެތި ކުޅެންޖެހުނީމަ، އެކަމަކު، މި ފަހަރު މި ކުުޅުނު ކުރު މުބާރާތަށް ފަހު، ކުޅުންތެރިންގެ ކޮންފިޑެންސް ރަނގަޅު، އަހަރެން މަސައްކަތް މި ކުރަނީ، ޑިފެންސިވްކޮށް، ދެން، މެދުތެރޭގެ ރޭވުންތެރިކަން މި މެޗުން (ސިންގަޕޫރު މެޗުން) ރަނގަޅުކޮށްލަން، އެއީ، ޓިމޯ ލެސްޓޭއާ ކުޅޭއިރު، އަހަރެމެންގެ މިޑްފީލްޑް ރަނގަޅަށް އޮތުން މުހިންމު، އެ ކަންކަމަށް އަހަރެމެން ސަމާލުކަން ދޭނަން،" ސުޒޭން ބުންޏެވެ.
ސިންގަޕޫރު މި ވަގުތު އޮތީ ފީފާ ރޭންކިންގެ 160 ވަނައިގަ އެވެ. އަދި، ރާއްޖެ އޮތީ 162 ވަނައިގަ އެވެ. ސުޒޭން ބުނީ، ސިންގަޕޫރުން ވެސް ރާއްޖެ އެކޭ އެއްގޮތަށް މި އޮތީ އެންމެ ފަހުން ކުޅުނު އިންޓަނޭޝަނަލް މެޗުތަކުގައި އެކަށީގެންވާ ނަތީޖާއެއް ނުނެރެވި ކަމަށާއި ބެލެވޭ ގޮތުގައި، އެ ކަންކަމަށް ބަލާނަމަ، ދެ ގައުމީ ޓީމު ވެސް މި އޮތީ އެއް ހާލަތެއްގައި ކަމަށެވެ.
"އަހަރެމެން ދެ ގައުމު ވެސް މި އޮތީ އެއް ހާލަތެއްގައި، އަހަރެމެންގެ އުންމީދުކުރަނީ، އަހަރެމެން މި ކުޅުނު ކުރު ކްލަބް މުބާރާތް (އެފްއޭއެމް ލީގު ކަޕް) އަށް ފަހު ރަނގަޅުވާނެ ކަމަށް. ކުޅުންތެރިންގެ ކޮންފިޑެންސް ވެސް ރަނގަޅު، އެހެންވީމަ، ފިލިޕީންސް މެޗަށް ވުރެން ރަނގަޅުވާނެ،" ސުޒޭން ބުންޏެވެ.
ސިންގަޕޫރުން އެންމެ ފަހުން ރާއްޖެއާ ދެކޮޅަށް ކުޅުނު މެޗު ކާމިޔާބުކުރީ، 2022 ވަނަ އަހަރު، 3-1 އިންނެވެ. އެ މެޗު ވެސް ކުޅުނީ ސިންގަޕޫރުގަ އެވެ.
