ޝަރީއަތް ނިމެންދެން ބަންދު ކޮށްފައި ތިބި މީހުންނަށް އެއް ފުރުސަތު ދިނުމަށް އިލެކްޓްރޯނިކް މޮނިޓަރިން ނިޒާމެއްގެ ދަށުން އިލެކްޓްރޯނިކް ޓެގު އަޅުވާފައި ދޫކޮށްލުމުގެ މަސައްކަތް މިއަދު ރަސްމީކޮށް ފަށައިފިކަން ރައީސުލްޖުމްހޫރިއްޔާ މުހައްމަދު މުއިއްޒު އިއުލާނު ކުރައްވައިފި އެވެ.
އެކްސްގައި ރައީސް މިރޭ ކުރެއްވި ޕޯސްޓެއްގައި ވިދާޅުވީ މިއަދު ފެށުނު މަސައްކަތުގެ ތެރެއިން ވާނުވާ މައްސަލައަށް ހައްލުތަކެއް ލިބި ޝަރުތު ފުރިހަމަވާ މީހުންގެ ބަންދަށް ލުއިތަކެއް ދެވޭނެ ކަމަށެވެ.
"ޝަރީއަތް ނިމެންދެން ބަންދުގައި ތިބި މީހުންގެ މައްސަލަތަކަށް ހައްލެއް ހޯދުމަށްޓަކައި ދައުލަތުގެ އިދާރާތަކުން ގުޅިގެން ކުރަން ފަށާފައިވާ މަސައްކަތްތަކުގެ ތެރެއިން ކޯޓުން ކަނޑައަޅާފައިވާ ޝަރުތުތަކާއެކު އިލެކްޓްރޯނިކް މޮނިޓަރިން ނިޒާމެއްގެ ތެރެއިން ބަންދަށް ލުއި ދިނުމުގެ ކަންކަން މިއަދު ވަނީ ފަށާފައި،" ރައީސް ކުރެއްވި ޕޯސްޓުގައި ވިދާޅުވި އެވެ.
ވާނުވާ ބަންދުގައި ތިބި މީހުންނަށް ލުއި ދޭން ނިންމާފައި ވަނީ ވަކި ނިޒާމެއްގެ ތެރެއިން ބަންދަށް ލުއި ހޯދުމަށް ހުށަހަޅާ މީހުންގެ ތެރެއިން ފުލުހުންނާއި ކަރެކްޝަންސްއިން ހަދާ ހާއްސަ އެސެސްމެންޓަކަށް ބެލުމަށްފަހު އެވެ.
އެ އެސެސްމަންޓުގައި ބަލާނީ އެ މީހުން ދޫކޮށްލުމުން މުޖުތަމައަށް އޮތް ނުރައްކަލަށެވެ. އަދި، އެ އެސެސްމަންޓުގައި ބަންދުން ދޫކޮށްލާ މީހުން މޮނީޓާ ކުރަން ފެންނަ މިންވަރު ބަޔާންކުރާނެ ކަމަށް ވެސް ޕީޖީ އޮފީހުން މީގެ ކުރިން ބުނެފައިވެ އެވެ.
ޕީޖީ އޮފީހުން ބުނި ގޮތުގައި ޓެގު އަޅުވާފައި ބަންދަށް ލުއި ދޭނީ، ބަންދަށް ލުއި ދޭން ފެންނަ ހާލަތްތަކުގައި، ބަންދު މުރާޖައާކުރަން ކޯޓަށް ހުށަހަޅައިގެންނެވެ. މި ލުއި ދޭން ނިންމާފައި ވަނީ ގިނަ ވެގެން 100 ދުވަހަށް ކަނޑައަޅާ ޝަރުތެއްގެ ގޮތުގަ އެވެ.
ބަންދަށް ލުއި ދީފައިވާ މީހުންގެ ޝަރުތުތައް މުރާޖައާކުރުމަށް ކޮންމެ 100 ދުވަހަކުން ކޯޓަށް ހުށަހަޅާނެ ކަމަށް ވެސް ޕީޖީ އޮފީހުން ބުނެފައިވެ އެވެ. އަދި ކޯޓުން ކޮށްފައިވާ އެއްވެސް ޝަރުތަކާ މިއިން މީހަކު ހިލާފު ވެއްޖެ ހާލަތެއްގައި، ވަގުތުން އެ މީހަކު އަލުން ބަންދުކުރުމަށް ކޯޓުގައި އެދޭނެ ކަމަށް ވެސް އެ އޮފީހުން ބުނެފައިވެ އެވެ.
ވާނުވާ ބަންދުގައި ތިބި ފަރާތްތަކުގެ ތެރެއިން ލުޔަށް އެދޭ މީހުންގެ ވަކީލުންނަށް އެކަމަށް އެދުމުގެ ފުުރުސަތު މިހާރު ވަނީ ހުޅުވާލައިފަ އެވެ.
ސަރުކާރުން މި ގޮތަށް ނިންމާފައި މި ވަނީ، ވާނުވާ ބަންދުގައި ތިބި މީހުންނަށް ލުޔެއް ހޯދައިގެން ދޭންް އެދި އެ މީހުންގެ ޖަމިއްޔާތަކުންނާއި އެ މީހުންގެ ވަކީލުން މިކަމަށް ލޮބީކޮށް، މާލޭގައި ސިލްސިލާ މުޒާހަރާތަކެއް ކުރިތާ ދުވަސްތަކެއް ފަހުންނެވެ. މިފަހުން އެ މީހުން ވަނީ ރައީސް ޑރ. މުހައްމަދު މުއިއްޒުއާ ބައްދަލުކޮށް، އެ ކަމުގައި ހައްލުތަކެއް ހުށަހަޅައިފަ އެވެ.
އެ ބައްދަލުވުމަށް ފަހު ރައީސް ވާނުވާ ބަންދުގައި ތިބި މީހުންނާ ގުޅޭ ގޮތުން ހުށަހެޅީ ހިޔާލުތަކާ ގުޅޭ ގޮތުން ރައީސް އޮފީހުގައި، ހޯމްލޭންޑް ސެކިއުރިޓީ މިނިސްޓަރު އަލީ އިހުސާން އާއި ޕްރޮސެކިއުޓާ ޖެނެރަލް އައްބާސް ޝަރީފް އަދި ބަންޑާރަނައިބު އަހުމަދު އުޝާމްއާ މަޝްވަރާކުރައްވައިފަ އެވެ.
