ހުޅުމާލޭގެ މާސްޓާ ޕްލޭން އަލުން ރިވައިސް ކުރުމަށްފަހު ބޮޑެތި ބަދަލުތަކަކާއެކު މިއަދު ނެރެފި އެވެ.
ހައުސިން ޑިވެލޮޕްމަންޓު ކޯޕަރޭޝަނުން މިއަދު ނެރުނު މާސްޓާ ޕްލޭނުގައި ހިމެނޭ އެންމެ ބޮޑު އެއް ބަދަލަކީ ހުޅުމާލޭގެ ފޭސް ތިނެއް، މިހާރު ހުރި ބިންތަކާ ގުޅުވައިލުމެވެ. ދެން ގެނައި އެންމެ ބޮޑު ބަދަލަކީ ފޭސް ދޭއްގައި ލިބެން ހުންނަ ހިދުމަތްތައް ގިނަ ކުރުމެވެ. އަދި ބަނދަރު ސަރަހައްދު ބޮޑު ކުރަން ވެސް ޕްލޭނުގައި ހިމަނާފައިވެ އެވެ.
ކުރީގެ ޕްލޭނުގައި، ފޭސް ތިނަކާއި ފޭސް އެކެއް އަދި ފޭސް ދޭއް ގުޅުވައިލަނީ ބްރިޖަކުންނެވެ. އެކަމަކު، ފޭސް ތިނެއް ދެން ގުޅުވައިލާނީ ބިން ހިއްކައިގެންނެވެ. އޭގެ ސަބަބުން ހުޅުމާލޭގެ ތިން ފޭހުގެ ކަނެކްޓިވިޓީ އިތުރުވާނެ އެވެ.
އާ މާސްޓާ ޕްލޭނުގެ ދަށުން މިހާރުގެ ބަނދަރު ބޮޑު ކުރާއިރު ގާތްގަނޑަކަށް 20 ހެކްޓަރު ބަނދަރަށް އިތުރު ކުރާނެ އެވެ. މިހާރުގެ ބަނދަރުގެ ސައިޒަކީ 36 ހެކްޓަރެވެ. ބަނދަރު ބޮޑު ކުރާނީ 53 ހެކްޓަރަށެވެ.
އެޗްޑީސީ އިން ބުނެފައި މާސްޓާ ޕްލޭނުގެ ދަށުން ތަރައްގީ ކުރީ އާ ލޭންޑް ޔޫސް ޕްލޭނުގައި ވިސްނާފައި ވާނީ ހުސް ތަންތަނާއި ފެހި ސަރަހައްދުތައް އާންމުންނަށް ބޮޑަށް ބޭނުން ކުރެވޭ ގޮތަކަށް ބަދަލު ކުރަން ކަމަށެވެ. އާ ޕްލޭނުގައި ހުސް ޖާގަ ހިމަނާފައި ވަނީ ކޮންމެ މީހަކަށް 2.5 އަކަ މީޓަރުގެ ހުސް ޖާގަ ހިމަނައިގެންނެވެ.
މީހުން ދިރިއުޅޭ ސަރަހައްދު އަލުން ކުރަހާފައި ވަނީ ފަސޭހައިން ހިދުމަތްތައް ލިބި، އެކްސެސިބިލިޓީ އިތުރުވާނެ ގޮތަކަށް ކަމަށް އެޗްޑީސީ އިން ބުނެ އެވެ. އަދި މީހުން ދިރިއުޅޭ ސަރަހައްދުގެ ޕްލޭންތައް ބަދަލުކޮށްފައިވާނީ ދިރިއުޅުމުގެ ފެންވަރު މަތިވާނެ ފަދަ ގޮތަކަށް ކަމަށް އެޗްޑީސީ އިން ބުނެ އެވެ.
އާ ޕްލޭނުގެ ދަށުން ހުޅުމާލޭގެ ބިމުގެ 29 ޕަސެންޓު ހާއްސަކޮށްފައި ވަނީ މީހުން ދިރިއުޅުމަށެވެ. އަދި ބިމުގެ 10 ޕަސެންޓު ހާއްސަކޮށްފައި ވަނީ މިސްކިތާއި މަދަރުސާތަކާއި އެހެން އިދާރާތަަށެވެ. އަދި ބިމުގެ ފަސް ޕަސެންޓު ހާއްސަކޮށްފައި ވަނީ ކޮމާޝަލް ބޭނުންތަކަށެވެ. އިންޑަސްޓްރިއަލް ބޭނުމަށް ވެސް ހާއްސަ ކުރީ ބިމުގެ ފަސް ޕަދެންޓެވެ. ހުސް ސަރަހައްދު، ފެހި ސަރަހައްދު އަދި ކުޅިވަރަށް ބިމުގެ 30 ޕަސެންޓު ވަނީ ހާއްސަކޮށްފަ އެވެ.
