މައިކްރޮސޮފްޓްގެ އެކްސްބޮކްސްއަށް އަމާޒުކޮށްގެން މިދިޔަ އަހަރު ނެރުނު "ސެނުއާސް ސާގާ: ހެލްބްލޭޑް 2"، މި ހޫނު މޫސުމުގައި ޕްލޭސްޓޭޝަން 5 (ޕީއެސް5) އަށް އަންނާނެ ކަމަށް ނިންޖާ ތިއަރީން އިއުލާންކޮށްފި އެވެ.
މިއީ އެކްސްބޮކްސްއިން އެ ކުންފުނީގެ ގޭމްތައް ވާދަވެރި ޕްލެޓްފޯމްތަކަށް ނެރުމުގެ ސިޔާސަތަށް އިތުރުވި ކަމެކެވެ. ހެލްބްލޭޑް 2 އަކީ ސީދާ އީސްޕޯޓްސް ގޭމެއް ނޫން ކަމުގައި ވީނަމަވެސް، މައިކްރޮސޮފްޓްގެ މިސްރާބު ބަދަލުވުމުގެ ސަބަބުން، އީސްޕޯޓްސްގެ މައިދާނަށް ވަރަށް ބޮޑެތި، ހެޔޮ އަސަރުތަކެއް ކުރާނެ ކަމަށް ގިނަ ބަޔަކު ދެކެ އެވެ.
މައިކްރޮސޮފްޓުން ވަނީ މީގެ ކުރިންވެސް އެކްސްބޮކްސް އާއި ޕީސީއަށް އެކްސްކްލޫސިވްކޮށް ނެރެފައިވާ، އީސްޕޯޓްސް އަށް ގުޅުންހުރި ގިނަ ގޭމްތަކެއް ޕީއެސް 5 އަށް ގެނެސްފަ އެވެ. މީގެ ތެރޭގައި އެންމެ ފާހަގަކޮށްލެވެނީ "ގިއާސް އޮފް ވޯ: ރީލޯޑެޑް" އެވެ.
މިއީ "ގިއާސް އޮފް ވޯ" ސީރީޒްގެ ފުރަތަމަ ގޭމްގެ ރީމާސްޓާ އެއް ކަމަށްވާއިރު، އޮގަސްޓް 26 ގައި ޕީއެސް5، އެކްސްބޮކްސް އަދި ޕީސީއަށް ރިލީޒްކުރާނެ އެވެ. ގިއާސް އޮފް ވޯ އަކީ އީސްޕޯޓްސްގެ ދުނިޔޭގައި ވަރުގަދަ ތާރީޚެއް އޮތް ގޭމެކެވެ. މި ގޭމް ޕީއެސް5 އަށް އައުމުން، ޕްލެޓްފޯމްތަކުގެ ހުރަސްތައް ނެތި، ގިއާސް އޮފް ވޯ ގެ އީސްޕޯޓްސް މުޖުތަމަޢު އިތުރަށް ފުޅާވެ، މުބާރާތްތަކުގެ ފޯރި އިތުރުވެގެންދާނެ އެވެ.
އޭގެ އިތުރުން، "ފޯޒާ ހޮރައިޒަން 5" ފަދަ ރޭސިން ގޭމްތަކާއި، "އޭޖް އޮފް އެމްޕަޔާސް 2: ޑެފިނިޓިވް އެޑިޝަން" އަދި "އޭޖް އޮފް މިތޮލޮޖީ: ރިޓޯލްޑް" ފަދަ ރިއަލް-ޓައިމް ސްޓްރެޓެޖީ (އާރްޓީއެސް) ގޭމްތައް ޕީއެސް5 އަށް ނެރުމަކީ، އެފަދަ ޖޯންރާތަކުގެ އީސްޕޯޓްސް މުބާރާތްތަކަށް ޕީއެސް5 ކުޅުންތެރިންނަށްވެސް ބައިވެރިވުމުގެ ފުރުޞަތު ހުޅުވިގެންދާ ކަމެކެވެ. ހަމައެއާއެކު، "ޑޫމް: ދަ ޑާކް އޭޖަސް" ފަދަ ގޭމްތައް އެއްފަހަރާ ހުރިހާ ޕްލެޓްފޯމްތަކަށް ނެރުމުން، އީސްޕޯޓްސް މުބާރާތްތައް އިންތިޒާމްކުރުމަށްވެސް ފަސޭހަތަކެއް ވެގެންދާނެ އެވެ.
މައިކްރޮސޮފްޓްގެ މި މަލްޓިޕްލެޓްފޯމް ސިޔާސަތު ދަނީ ކާމިޔާބުވަމުންނެވެ. އެޕްރީލް މަހު ޕްލޭސްޓޭޝަން ސްޓޯރުގައި އެންމެ ރަނގަޅަށްވިކުނު ގޭމްތަކުގެ ގަދަ ތިނެއްގައި ހިމެނުނީ އެކްސްބޮކްސްގެ ގޭމްތަކެވެ. މިކަމުން ދޭހަވަނީ، ގޭމްތައް ގިނަ ޕްލެޓްފޯމްތަކެއްގައި ލިބެން ހުރުމަކީ ކުޅުންތެރިންގެ އަދަދު އިތުރުކޮށް، މުބާރާތްތަކުގެ ފޯރި ގަދަކޮށް، އީސްޕޯޓްސް އިންޑަސްޓްރީއަށް ފައިދާކުރާނެ ކަމެއް ކަމެވެ. ކުރިއަށް އޮތްތަނުގައި، މި ސިޔާސަތުގެ ސަބަބުން އީސްޕޯޓްސްގެ މައިދާން އިތުރަށް ފުޅާވެ، ޕްލެޓްފޯމްތަކުގެ ހުރަސްތައް ނެތި، ވާދަވެރިކަން އިތުރުވެގެން ދާނެ ކަމަށް އުންމީދު ކުރެވެ އެވެ.
