މުމްބައި، އިންޑިއާ (މެއި 23) - އަންނަ ސެޕްޓެމްބަރު މަހު، އިންޑިއާގައި ބާއްވަން ތާވަލުކޮށްފައި އޮތް އޭޝިއާ ކަޕް ކްރިކެޓް މުބާރާތް ނުކުޅެން އިންޑިއާ އިން ނިންމާފައިވާ ކަމަށް މީޑިއާގައި ދެކެވޭ ވާހަކަތައް އިންޑިއާގެ ކްރިކެޓް ޖަމިއްޔާ، ބޯޑް އޮފް ކޮންޓްރޯލް ފޯ ކްރިކެޓް އިން އިންޑިއާ (ބީސީސީއައި) އިން ދޮގުކޮށްފި އެވެ.
ކަޝްމީރުގެ ޕަހަލްގަމްގައި ޓޫރިސްޓުން ގޮސް އުޅޭ ހިސާބެއްގައި ހިނގި ޓެރަރިސްޓު ހަމަލާއެއްގެ ސަބަބުން އިންޑިއާ އާއި ޕާކިސްތާންގެ ގުޅުން ގޯސްވެފައިވާއިރު، އެކަމުގެ އަސަރު ކުޅިވަރު މުބާރާތްތަކަށް ވެސް އަންނަނީ ކުރަމުންނެވެ. އެ ގޮތުން، ޕާކިސްތާން ހިމަނައިގެން، ކުޅެން ޖެހޭތީ، މި އަހަރުގެ ސެޕްޓެމްބަރު މަހު ބާއްވަން ނިންމާފައި އޮތް އޭޝިއާގެ ޓީ20 ކްރިކެޓް މުބާރާތް، އޭޝިއާ ކަޕް، އިންޑިއާ އިން ބޮއިކޮޓްކޮށްފައިވާ ކަމަށް ހަބަރުތައް ފެތުރުނެވެ.
އެކަމަކު، ބީސީސީއައިގެ ސެކްރެޓަރީ، ދެވަޖީތު ސޭކިއާ ވިދާޅުވީ، އޭޝިއަން ކްރިކެޓް ކައުންސިލް (އޭސީސީ)އާ އެކު، އޭޝިއާ ކަޕާ ގުޅޭ އެއްވެސް މަޝްވަރާއެއް މިހާތަނަށް އިންޑިއާ އިން ކޮށްފައިނުވާނެ ކަަމަށެވެ.
"އޭޝިއާ ކަޕް ނޫނީ އޭސީސީގެ އެއްވެސް އިވެންޓަކާ ގުޅޭގޮތުން އެއްވެސް މަޝްވަރާއެއް އަދި ކުރިއަކަށް ނުދޭ. އަހަރެމެންގެ ފޯކަސް މި ވަގުތު މި ހުރީ، އައިޕީއެލް (އިންޑިއަން ޕްރިމިއާ ލީގު) އާއި ކުރިއަށް އޮތް އިންގްލެންޑް، ޓެސްޓް ސީރީސް އަށް،" ސޭކިއާ ވިދާޅުވި އެވެ.
ރިޕޯޓްތައް ބުނާގޮތުން، އިންޑިއާގައި މި މުބާރާތް ހޯސްޓްކުރާނަމަ ޕާކިސްތާނުން ހުށަހަޅަނީ، ހައިބްރިޑް މޮޑެލް އަށް ޕާކިސްތާންގެ މެޗުތައް އެހެން ގައުމެއްގައި ކުޅުމަށެވެ. މީގެ ކުރިން، 2023 ވަނަ އަހަރު ބޭއްވި އޭޝިއާ ކަޕާއި މި އަހަރުގެ ޗެމްޕިއަންސް ޓްރޮފީ މުބާރާތް ޕާކިސްތާންގައި ހޯސްޓްކުރިއިރު، އިންޑިއާގެ މެޗުތައް ކުޅުނީ ޕާކިސްތާންގައެއް ނޫނެވެ. އެ ގޮތުން، އޭޝިއާ ކަޕްގައި އިންޑިއާގެ މެޗުތައް، ސްރީ ލަންކާގައި ކުޅުނުއިރު، ޗެމްޕިއަންސް ޓްރޮފީގައި އިންޑިއާގެ މެޗުތައް ކުޅުނީ، ދުބާއީގަ އެވެ.
އޭޝިއާ ކަޕްގައި، އިންޑިއާ އާއި ޕާކިސްތާންގެ އިތުރުން ދެން ވާދަކުރަނީ، ސްރީ ލަންކާ، ބަންގްލަދޭޝް، އަފްގާނިސްތާން، ޔޫއޭއީ، ހޮންގް ކޮންގް އަދި އޮމާން އެވެ.
