ނިންޓެންޑޯ ކުންފުނިން ނެރެން ހަމަޖެހިފައިވާ އެ ކުންފުނީގެ އައު ކޮންސޯލް، ނިންޓެންޑޯ ސްވިޗް 2 ގައި މުޅިން އައު ފީޗާތަކެއް ހިމެނޭނެކަމަށް އެ ކުންފުނިން ހާމަކޮށްފިއެވެ.
ނިންޓެންޑޯ ކުންފުނިން އިއުލާނުކޮށްފައިވާ އައު ފީޗާތަކުގެ ތެރޭގައި ޓެކްސްޓް-ޓު-ސްޕީޗް އަދި ލައިވް ކެޕްޝަން ފަދަ އެކްސެސިބިލިޓީ ފީޗާތައް ހިމެނޭނެކަ މަށް އެ ކުންފުނިން ވަނީ ހާމަކޮށްފަ އެވެ. މި ކޮންސޯލް ބާޒާރަށް ނެރުމުގެ ހަފްތާތަކެއް ކުރިން މި މަޢުލޫމާތު ހާމަކޮށްފައިވަނީ ގޭމް ޗެޓް ފީޗާ އާއި ގުޅޭގޮތުންނެވެ.
ނިންޓެންޑޯއިން ހާމަކުރި ގޮތުގައި ސްވިޗް 2 ގައި ޓެކްސްޓް-ޓު-ސްޕީޗް ފީޗާ ބޭނުންކޮށްގެން ގޭމް ޗެޓްގައި މެސެޖު ޓައިޕްކުރުމުން އެ މެސެޖު އަޑުއިވޭނެ އެވެ. މީގެ އިތުރުން، ލައިވް ކެޕްޝަން ފީޗާ ބޭނުންކޮށްގެން އެހެން ކުޅުންތެރިން ދައްކާ ވާހަކަ ސްކްރީނުގައި ލިޔެވިގެންދާނެ އެވެ. މި މަޢުލޫމާތު ހާމަކޮށްފައިވަނީ ބްލޫސްކައި ޕްލެޓްފޯމްގައި ޝާއިޢުކޮށްފައިވާ ވީޑިއޯއެއްގަ އެވެ.
އަދި ހަމައެއާއެކު، ނިންޓެންޑޯއިން ވަނީ ސްވިޗް 2 ގައި ވޭރިއަބަލް ރިފްރެޝް ރޭޓް (ވީއާރްއާރް) ސަޕޯޓް ލިބޭނީ ހަމައެކަނި ހޭންޑްހެލްޑް މޯޑްގައި ކަމަށް ހާމަކޮށްފައެވެ. މި މައުލޫމާތު ނިންޓެންޑޯލައިފް އަށް ދީފައިވާ ބަޔާނެއްގައި ކަށަވަރުކޮށްދީފައިވެ އެވެ.
ނިންޓެންޑޯއިން ފުރަތަމަ އެ ކުންފުނީގެ ވެބްސައިޓްގައި ލިސްޓްކޮށްފައިވަނީ ސްވިޗް 2 ގައި ޑޮކްޑް މޯޑްގައިވެސް ވީއާރްއާރް ސަޕޯޓް ލިބޭނެ ކަމަށެވެ. ނަމަވެސް، ފަހުން އެ މައުލޫމާތު ވެބްސައިޓުން ނަގާފައިވެ އެވެ. އެހެންނަމަވެސް، މި ހައިބްރިޑް ކިޑް ކޮންސޯލްގައި 4ކޭ ރެޒޮލިއުޝަން، އެޗްޑީއާރް އަދި 120އެފްޕީއެސް އަށް ސަޕޯޓް ކުރާނެކަން ކަށަވަރުކޮށްދީފައިވެ އެވެ.
ނިންޓެންޑޯ ސްވިޗް 2 ބާޒާރަށް ނެރުމަށް ހަމަޖެހިފައިވަނީ ޖޫން 5 ގައެވެ. އެމެރިކާގައި މި ކޮންސޯލްގެ އަގު ފަށާނީ 449.99 ޑޮލަރުންނެވެ. މި މާލީ އަހަރުގައި ސްވިޗް 2 ގެ 15 މިލިއަން ޔުނިޓް ވިއްކޭނެކަމަށް ނިންޓެންޑޯއިން ލަފާކުރެ އެވެ.
ނިންޓެންޑޯ ސްވިޗް 2 އަކީ ކުރީގެ ސްވިޗް ކޮންސޯލްގެ ފަހުގެ މޮޑެލް އެވެ. މި އައު ކޮންސޯލްގައި ހިމެނޭ އިތުރު ފީޗާތަކާއި ބެހޭ މައުލޫމާތު ކުރިއަށް އޮތް ދުވަސްތަކުގައި ހާމަކުރާނެ ކަމަށް ނިންޓެންޑޯއިން ބުނެފައިވެ އެވެ.
