ރިސޯޓް ލީގުގެ ދ. އަތޮޅު ޒޯނުގައި ކުޅުނު ދެ ވަނަ މެޗު ވެސް ނިޔާމަ ޕްރައިވެޓް އައިލަންޑުން ކާމިޔާބުކޮށްފި އެވެ.
މި މުބާރާތުގައި ނިޔާމަ އިން ކުޅުނު ފުރަތަމަ މެޗުން ވަނީ ސަން ޝިޔާމް އޮޅުވެލި 3-2 ގެ ނަތީޖާ އަކުން ބަލިކޮށްފަ އެވެ. މިއަދު ހަވީރު ކަނޑިންމަ މޯލްޑިވްސްގެ މައްޗަށް ނިޔާމަ ކުރިހޯދީ 1-0 ގެ ނަތީޖާ އަކުންނެވެ.
މެޗު ފަށައިގެންވެސް ކަނޑިންމަ އިން ލީޑުކޮށްގެން ކުޅުނު މި މެޗުގައި ކަނޑިންމައިން ވަނީ ގިނަ ހަމަލާތަކެއް ނިޔާމަ ކޮޅަށް ފޮނުވާލައިފަ އެވެ. އެ ގޮތުން، ނިޔާމައިގެ ހުސެއިން އިފްހާމް އާއި މުހައްމަދު އަޔާޒް ވަނީ ގިނަ ހަމަލާތަކެއް ފޮނުވާލައިފަ އެވެ. އެކަމަކު، މި ހަމަލާތައް ހުއްޓުވުމުގައި ނިޔާމައިގެ ކީޕަރު ރީހާން ނިޒާރު ވަނީ މޮޅު ކުޅުމެއް ދައްކައިފަ އެވެ.
އެކަމަކު މެޗުގެ ދެ ވަނަ ހާފު ފަށައިގެން ހަތަރު ވަނަ މިނިޓްގައި ނިޔާމަ އިން ވަނީ ގޯލު ޖަހައި ލީޑު ނަގައިފަ އެވެ. އިބްރާހީމް އަފްސަލް ތަނަވަސްކޮށްދިން ފުރުސަތެއްގެ ބޭނުން ހިފައި މި ގޯލު ނިޔާމަ އަށް ކާމިޔާބުކޮށްދިނީ ހުސެއިން ޝާރިގް އެވެ.
މި ގޯލަށް ފަހު ވެސް ކަނޑިންމައިގެ އަޔާޒް އަށް ވަނީ ގޯލު ޖަހަން ރަނގަޅު ދެ ފުރުސަތެއް ލިބި ބޭކާރުވެފަ އެވެ. އޭގެ ތެރެއިން އެއް ހަމަލާ ދަނޑިކައިރިން ބޭރަށް ދިޔައިރު، ދެ ވަނަ ހަމަލާގެ ހުރަހަކަށްވީ މި މެޗުގެ މޮޅު ކުޅުންތެރިޔާގެ މަގާމު ހޯދި ނިޔާމައިގެ ކީޕަރު އިފްހާމް އެވެ.
މި މުބާރާތުގެ ދ. ޒޯނުގައި ފަސް ޓީމެއް ވާދަކުރެ އެވެ. އެއީ ނިޔާމަ އާއި ކަނޑިންމައިގެ އިތުރުން، ވޮއްމުލި ރިސޯޓް، އަންގްސާނާގެ ވެލަަވަރު އަދި ސަން ޝިޔާމް އިރުވެލި އެވެ.
