ޖީޓީއޭ 6 ގެ އައު ޓްރެއިލާނެރުނުތާ ދެ ދުވަސް ނުވަނީސް 475 މިލިއަން ވިއުސްއާއެކު ރެކޯޑެއް ގާއިމް ކޮށްފި އެވެ.
ރޮކްސްޓާ ގޭމްސްއިން ބުނެފައިވާ ގޮތުގައި ގްރޭންޑް ތެފްޓް އޯޓޯ 6 ގެ ދެވަނަ ޓްރެއިލާ ވަނީ ސޯޝަލް މީޑިއާގެ އެކި ޕްލެޓްފޯމްތަކުގައި ވިއުއިން ރެކޯޑުތައް މުގުރާލާފަ އެވެ.
ޑެޑްޕޫލް އެންޑް ވޮލްވަރިން އަދި ފެންޓަސްޓިކް ފޯ ފަދަ މަޝްހޫރު ފިލްމުތަކުގެ ޓްރެއިލާތަކަށް ވުރެ މި ޓްރެއިލާ ކުރިއަރައިގެން ގޮސްފައިވާ ކަމަށް ސްޓޫޑިއޯއިން ބުނެފައިވެ އެވެ.
ޓެރެއިލާ ނެރުނުތާ ދެ ދުވަސް ފުރިހަމަ ނުވާއިރު، ޔޫޓިއުބްގައި އެކަނި ވެސް މި ޓްރެއިލާ ވަނީ 85 މިލިއަނަށްވުރެ ގިނަ ފަހަރު ބަލާފައެވެ. އަދި އެކި ސޯޝަލް މީޑިއާ ޕްލެޓްފޯމްތަކުގައި ޖުމްލަ 475 މިލިއަން ފަހަރު ބަލާފައިވާކަމަށް ރޮކްސްޓާއިން ހޮލިވިވުޑް ރިޕޯޓަރަށް ހާމަކޮށްފައިވެ އެވެ.
މީގެ ކުރިން އެންމެ ގިނައިން ބަލާފައިވާ ޓްރެއިލަރަކީ ޑެޑްޕޫލް އެންޑް ވޮލްވަރިންގެ ޓްރެއިލާ ކަމަށްވާއިރު، އެ ޓްރެއިލާ ފުރަތަމަ 24 ގަޑިއިރުގެ ތެރޭގައި ބަލާފައިވަނީ 365 މިލިއަން ފަހަރު ކަމަށް ދަ ހޮލީވުޑް ރިޕޯޓަރުން ބުނެފައިވެ އެވެ. އަދި ފެންޓަސްޓިކް ފޯ: ފަސްޓް ސްޓެޕްސްގެ ޓްރެއިލަރ ފުރަތަމަ ދުވަހު 200 މިލިއަނަށް ވުރެ ގިނަ ފަހަރު ބަލާފައިވާ ކަމަށް ވެސް ބުނެފައިވެ އެވެ.
ޖީޓީއޭ 6 ގެ މި އާ ޓްރެއިލާ ޔޫޓިއުބްގެ އިތުރުން އެކްސް އަދި އިންސްޓަގްރާމް ފަދަ ޕްލެޓްފޯމްތަކުގައި ވެސް ވަރަށް ބޮޑަށް ވައިރަލްވެފައިވާ ކަމަށް ރޮކްސްޓާއިން ބުނެފައިވެ އެވެ.
ޖީޓީއޭ 6 ގެ ފުރަތަމަ ޓްރެއިލާ ވެސް ވަނީ ރެކޯޑުތައް މުގުރާލާފަ އެވެ. މިއުޒިކް ވީޑިއޯތައް ފިޔަވައި ޔޫޓިއުބްގައި އެންމެ ބޮޑު ލޯންޗަކަށް ވެގެން ދިޔަ އެވެ.
ދަ ހޮލީވުޑް ރިޕޯޓަރުން ބުނާ ގޮތުގައި ފުރަތަމަ ޓްރެއިލާ އެއް މުއްދަތެއްގައި 93 މިލިއަން ފަހަރު ބަލާފައިވެ އެވެ. ނަމަވެސް އެ ޓްރެއިލާ ހުރީ ހަމައެކަނި ޔޫޓިއުބްގައެވެ. މިހާރު ފުރަތަމަ ޓްރެއިލާ ވަނީ 255 މިލިއަނަށް ވުރެ ގިނަ ފަހަރު ބަލާފަ އެވެ.
ދެވަނަ ޓްރެއިލާގައި ބޭނުންކޮށްފައިވާ "ހޮޓް ޓުގެދާ" މިއުޒިކް ޓްރެކް ސްޕޮޓިފައިގައި 182،000 އިންސައްތަ އިތުރުވެފައިވާ ކަމަށް ދަ ހޮލިވުޑް ރިޕޯޓަރުން ފާހަގަކޮށްފައިވެއެވެ. ފުރަތަމަ ޓްރެއިލަރގައި ބޭނުންކުރި "ލަވް އިޒް އަ ލޯންގް ރޯޑް" ވެސް ވަނީ ސްޓްރީމިން ހިޓަކަށް ވެފައެވެ.
ދެވަނަ ޓްރެއިލާ ވަނީ ކުރިން އިއުލާނު ނުކޮށް މެއި 6 ގައި ޕަބްލިޝްކޮށްފަ އެވެ. މި ޓްރެއިލާގައި ޖޭސަން އާއި ލޫސިއާގެ ގުޅުމުގެ ކުޑަ ތަސައްވުރެއް ދައްކުވައިދީފައިވެ އެވެ.
މި ޓްރެއިލާ ނަގާފައިވަނީ ޕީއެސް5 ގައި ކަމަށާއި، ގޭމްޕްލޭ އާއި ކަޓްސީންތައް ހިމެނިފައިވާ ކަމަށް ރޮކްސްޓާއިން ބުނެފައިވެ އެވެ. ޖީޓީއޭ 6 ނެރުމަށް ހަމަޖެހިފައިވަނީ 2026 މެއި 26 ގައި ޕީއެސް5 އަދި އެކްސްބޮކްސް ސީރީޒް އެސް/އެކްސް އަށެވެ.
މިއީ ގޭމިންގ އިންޑަސްޓްރީގެ ތާރީހުގައި މިހާތަނަށް ފެނިފައިނުވާ ވަރުގެ ސަމާލުކަމެއް ލިބިފައިވާ ޓްރެއިލަރެއް ކަމަށް ވެގެން ދާނެ ކަމަށް ލަފާކުރެވެ އެވެ.
