މުމްބާއި، އިންޑިއާ (މެއި 8) - އިންޑިއާގެ ޓެސްޓް ކްރިކެޓް ޓީމުގެ ކެޕްޓަންކަން ކުރަމުން އައި ބެޓްސްމަން، ރޯހިތު ޝަރްމާ، އެ ޓީމުން ރިޓަޔާކޮށްފި އެވެ.
ރޯހިތު، 38، ޓެސްޓް ކްރިކެޓުން ރިޓަޔާކުރާކަން އިއުލާނުކޮށްފައި މި ވަނީ، އިންޑިއާގެ ޓެސްޓް ޓީމުގެ ކެޕްޓަންކަން އޭނާ އަތުން ނަގަން އުޅޭ ކަމަށް މީޑިއާގައި އަޑުފެތުރިފައިވާ ދަނޑިވަޅެއްގަ އެވެ.
މިއާ އެކު، ރޯހިތު، ދެން ހަމައެކަނި އިންޑިއާ ގައުމީ ޓީމަށް ކުޅޭނީ ވަންޑޭއިންޓަނޭޝަނަލް (އޯޯޑީއައި) ފޯމެޓްގައި އެކަންޏެވެ. އެ ފޯމެޓްގެ ޗެމްޕިއަންސް ޓްރޮފީ ޗެމްޕިއަންކަން މިދިޔަ މާޗް މަހު އިންޑިއާ އިން ހޯދީ ރޯހިތުގެ ކެޕްޓަންކަމުގަ އެވެ.
މިދިޔަ، އަހަރު އިންޑިއާ އިން ޓީ20 ވޯލްޑް ކަޕްގެ ޗެމްޕިއަންކަން ހޯދިއިރު، އެ ޓީމުގެ ކެޕްޓަން، ރޯހިތު ވަނީ އެ މުބާރާތަށް ފަހު، ޓީ20 ޓީމުން ރިޓަޔާކޮށްފަ އެވެ.
ރޯހިތު ބުނީ ޓެސްޓް ކްރިކެޓްގައި އިންޑިއާ ތަމްސީލްކުރަން ލިބުނު ކޮންމެ ފުރުސަތެއް ވެސް އުފަލާ އެކު ބަލައިގަންނަ ކަމަށާއި އެއީ ވަރަށް އުފާވެރި ހަނދާންތަކެއް ކަމަށެެވެ.
އިންޑިއާގެ ޓެސްޓް ޓީމުގެ ކެޕްޓަންކަން ރޯހިތު އަށް ދިނީ، 2022 ވަނަ އަހަރު ވިރާތު ކޯލީ އަތުން އެ ޒިންމާ ނެގުމަށް ފަހު އެވެ. އިންޑިއާ ޓީމަށް 67 ޓެސްޓް މެޗު ކުޅެދިން، ރޯހިތުގެ ކެޕްޓަންކަމުގައި އެ ޓީމުން 24 ޓެސްޓް މެޗުން މޮޅުވި އެވެ. ޓެސްޓް ކްރިކެޓްގައި އިންޑިއާގެ ކެޕްޓަނުންގެ ތެރެއިން ދެ ވަނަ އަށް އެންމެ ކާމިޔާބީ ރޯހިތު އެވެ. ޓެސްޓް ކްރިކެޓް ވޯލްޑް ކަޕްގެ ފައިނަލަށް އިންޑިއާ އިން 2023 ވަނަ އަހަރު ދަތުރުކުރި ނަމަވެސް ފައިނަލުގައި އޮސްޓްރޭލިއާ އަތުން ބަލިވީ އެވެ.
މިދިޔަ އަހަރު ނިއު ޒީލެންޑް އަތުން ޓެސްޓް ސީރީސްގައި އިންޑިއާ ބަލިވިއިރު، މިއީ، އަމިއްލަ ގައުމުގައި ޓެސްޓް މެޗަކުން މިދިޔަ 12 އަަހަރު ތެރޭ އިންޑިއާ ބަލިވި ފުރަތަމަ ފަހަރެވެ.
