ޝަރީއަތް ނިމެންދެން (ވާނުވާ) ބަންދަށް ލާފައި ތިބި މީހުންގެ ތެރޭގައި ތިބީ ބޮޑެތި ކުށްތަކުގައި ތުހުމަތު ކުރެވޭ މީހުން ކަމަށް ވިދާޅުވެ، އެ ކަމަށް އަވަސް ހައްލެއް ގެނެވޭނެ ކަމުގެ އުންމީދެއް ރައީސް ޑރ. މުހައްމަދު މުއިއްޒުއަށް ނުދެވުނެވެ.
ރައީސް އޮފީހުގައި ކުރިއަށްދާ ނޫސްވެރިންގެ ބައްދަލުވުމުގައި ރައީސް މުއިއްޒު ވިދާޅުވީ ވާނުވާ ބަންދުގައި ތިބި މީހުންގެ ތެރޭގައި ބޮޑެތި ކުށްތަކުގައި ތުހުމަތު ކުރެވޭ މީހުން ތިބުމުން، އެމީހުން ގޭބަންދަށް ނުވަތަ މުޖުތަމުއަށް ދޫކޮށްލެވޭ އެއްވެސް ގޮތެއް އެޓާނީ ޖެނެރަލްއާ މަޝްވަރާކޮށްގެން ވެސް ނުފެނުނު ކަމަށެވެ.
"އަޅުގަނޑު ޕޮލިހާއި ވެސް ސުވާލުކުރިން. އޭޖީއާ ވެސް ސުވާލުކުރިން. އެ މީހުން ނެތްހެއްޔޭ އަޅުގަނޑުމެންނަކަށް ރިމާންޑު ޖަލުން ނެރެ، މައްސަލަ ނިމެންދެކަށް އެމީހުންގެ ގެއަށް މިސާލަކަށް ފޮނުވާލެވޭނެ ގޮތެއް ވެސް. މިއޭ މައްސަލައަކީ. މިކަހަލަ ކުށްތަކުގައޭ މިހިރީ. ތުހުމަތުތަކުގައޭ މިހިރީ،" ރައީސް މުއިއްޒު ވިދާޅުވި އެވެ.
ރައީސް ހާމަކުރެއްވި ގޮތުގައި ވާނުވާ ބަންދުގައި މިވަގުތު ތިބި 354 މީހުންގެ ތެރޭގައި ހިމެނެނީ ކުޑަކުދިންނަށް ޖިންސީ ގޯނާކުރުމާއި ރޭޕްކުރުމުގެ ތުހުމަތުގައި 108 މީހުން، ޓެރަރިޒަމްގެ ތުހުމަތުގައި 17 މީހުން، މީހުން މެރުމާއި މާރާމާރީ ހިންގުމުގެ ތުހުމަތުގައި 70 މީހުން އަދި މަސްތުވާތަކެތީގެ މައްސަލަތަކުގައި 110 މީހުންނެވެ.
ކްރިމިނަލް ކޯޓުގެ އާ އިމާރާތުގެ މަސައްކަތް ނިންމުމުގެ މަސައްކަތް ވަރަށް ބާރަށް ކުރިއަށްދާކަން ފާހަގަކުރައްވާ ރައީސް މުއިއްޒު ވިދާޅުވީ އެ މަސައްކަތް ނިމުމުން ކޮންމެވެސް ވަރަކަށް ވާނުވާ ބަންދަށް ހައްލުތަކެއް ލިބިގެންދާނެ ކަމަށެވެ.
ވާނުވާ ބަންދުގެ މައްސަލައިގައި ވާނުވާގައި ތިބި މީހުންގެ އާއިލާތަކުން ސިލްސިލާކޮށް މާލޭގެ އެކި ސަރަހައްދުތަކުގައި ދަނީ މުޒާހަރާކޮށް އަޑު އުފުލަމުންނެވެ. އެ މީހުންނާ މި ފެށޭ ހަފްތާ ތެރޭގައި ބައްދަލުކުރައްވާނެ ކަމަށް ރައީސް ވިދާޅުވި އެވެ.
ޝަރީއަތް ނިމެންދެން ބަންދުކޮށްފައި ތިބި މީހުން ހުކުމާ ހިސާބަށް ތިބެން ޖެހޭ މުއްދަތު ކުޑަ ކުރަން ނަން ސިއްރުކޮށްގެން ރަށްރަށުގައި ތިބި ގާޒީން ބޭނުން ކުރެވިދާނެ ކަމަށް ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މީގެ ކުރިން ވިދާޅުވެފައިވެ އެވެ.
ރާއްޖޭގެ ހުރިހާ ޖަލެއްގެ ކެޕޭސިޓީއަކީ 1500 އެއްހާ ޖާގަ ކަމަށްވާއިރު، ޖަލުތަކުގައި ތިބޭ މީީހުންނަށް މަހެއްގެ މައްޗަށް ބޮލަކަށް 27،000ރ. ހަރަދުވެ އެވެ.
