މާލޭގެ އުސް އިމާރާތެއްގެ މަތިން ފުރާޅެއްގެ މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝީދު، 21، އަށް އިންސާފު ހޯދައިދޭން ގޮވާލައި މުޒާހަރާ ކުރަމުން އަންނަ ޒުވާނުންގެ ތެރެއިން ދެ މީހަކު ރޭ ހައްޔަރު ކުރީ ގައިރު ގާނޫނީކޮށް ކަމަށް އިދިކޮޅު އެމްޑީޕީގެ ޕާލަމެންޓަރީ ގްރޫޕުން ބުނެފި އެވެ.
އެމްޑީޕީގެ ޕީޖީ ގްރޫޕުން މިއަދު ނެރުނު ބަޔާނެއްގައި ބުނީ ރޭގެ މުޒާހަރާ ރޫޅާލައި އެ މުޒާހަރާއިން ދެ މީހަކު ހައްޔަރު ކުރީ އެއްވެ އުޅުމުގެ މިނިވަންކަމާއި ހިޔާލުފާޅު ކުރުމުގެ މިނިވަންކަމަށް ހުރަސްއެޅޭ ގޮތަށް ކަމަށެވެ. އަދި އެއީ ފުލުހުން ހިންގި ގައިރު ގާނޫނީ އަމަލެއް ކަމަށް ވެސް އެމްޑީޕީއިން ބުންޏެވެ.
"އިންސާު ހޯދުމަށް ގޮވާލަމުންދިޔަ ޒުވާނުންތަކެއްގެ އަޑު މިފަދައިން ކަނޑުވާލުމަކީ ދިވެހި ފުލުހުންގެ މައްޗަށް ރައްޔިތުންގެ އިތުބާރު ގެއްލި، ޔުމްނުއަށް އިންސާފު ލިބިދާނެ ކަމާމެދު އިތުރު ޝައްކުތަކެއް އުފެއްދުމުގެ ޖާގަ އޮތް އަމަލެއް ކަމުގައި ވެސް ދެކެން،" އެމްޑީޕީން ބުންޏެވެ.
އެމްޑީޕީގެ ޕީޖީ ގްރޫޕުން ގޮވައިލީ އެއްވެސް ޝަރުތަކާ ނުލައި މުޒާހަރާއިން ހައްޔަރު ކުރި ދެ ޒުވާނުން ދޫކޮށްލުމަށެވެ. މުޒާހަރާއިން ރޭ ހައްޔަރު ކުރީ އައިޝަތު ޝިމަން އަހުމަދު، 19، އާއި އަހުމަދު މަހްޒޫމް މާޖިދު، 28، އެވެ.
ރޭ މުޒާހަރާއިން ހައްޔަރު ކުރި ދެ މީހުން ދޫކޮށްލަން އެމްޑީޕީގެ އިތުރުން ސުޕްރީމް ކޯޓުގެ ކުރީގެ ފަނޑިޔާރު ހުސްނުއްސުއޫދާއި ކުރީގެ ރައީސް މުހައްމަދު ނަޝީދާއި ދަ ޑިމޮކްރެޓްސް އިން ވެސް ވަނީ ގޮވާލައިފަ އެވެ. އަދި ބާރުގެ ބޭނުންކޮށްގެން މުޒާހަރާ ރޫޅާލާފައިވާތީ ކުރީގެ ރައީސް އިބްރާހިމް މުހައްމަދު ސޯލިހު ވެސް ވަނީ އެކަން ކުށްވެރި ކުރައްވައިފަ އެވެ.
މާލޭގެ މަގުތަކަށް ނުކުމެ ޒުވާނުން މުޒާހަރާ ކުރަން ފެށީ ޔުމްނުގެ މައްސަލައިގައި ފުލުހުން ހިންގާ ތަހުގީގައި ފާޅުކަން ބޮޑު ހިލާފުތަކެއް ފާޅުވުމުންނެވެ. އެންމެ ބޮޑު މައްސަލައަކީ ފުލުހުން ކިޔައިދީފައިވާ ވާހަކަތައް ދިމާނުވުމެވެ. އަދި އެ މައްސަލައިގައި ހިމެނޭ މީހުންނާމެދު އާންމު އުސޫލާ ހިލާފަށް ލުއި ގޮތަކަށް އަމަލު ކުރި ކަމަށް ވެސް ފުލުހުންނަށް ތުހުމަތު ކުރެވެ އެވެ.
ޔުމްނު ވެއްޓުނު ރޭ އެންމެ ފަހުން އޭނާއާއެކު އުޅުނު ރައުދު އަހުމަދު ޒިލާލް، 21، ހައްޔަރު ކުރީ ހާދިސާ ހިނގިތާ ހަ ދުވަސް ފަހުންނެވެ. އޭނާ ހައްޔަރު ކުރުމުގެ ކުރިން ފުލުހުން ބުނީ ޔުމްނު ވެއްޓުމުގައި އޭނާގެ ބައިވެރިވުމެއް ނެތް ކަމަށެވެ. އެކަމަކު އޭނާ ހައްޔަރު ކުރުމަށްފަހު ފުލުހުން ބުނީ، ޔުމްނު ވެއްޓުނުކަން ރައުދަށް އެނގޭ ކަމަށާއި އެ ރޭ އޭނާއާ ޔުމްނުއާ ދެމެދު ހަމަނުޖެހުންތަކެއް ހިނގާފައިވާ ކަމަށެވެ.
