ރާއްޖޭގެ ޒުވާނުންގެ މެދުގައި މިފަހަކުން އާންމުވި ޕާޓީ ކުރުމުގެ ޓްރެންޑުގެ ސަބަބުން ގިނަ ބަޔަކު މަސްތުވާތަކެއްޗަށް ދެވިހިފާފައިވާ ކަމަށް ނެޝަނަލް ޑްރަގް އެޖެންސީއިން ބުނެފި އެވެ.
އެންޑީއޭއިން އާދީއްތަ ދުވަހު ނެރުނު ނޫސް ބަޔާނެއްގައި ބުނީ، މަސްތުވާތަކެއްޗާއެކު ޕާޓީ ކުރުމުގެ ޓްރެންޑު މިފަހަކުން އާންމުވެ، މަސްތުވާތަކެއްޗަށް ގިނަ ބަޔަކު ދެވިހިފައި ނުރައްކާ ހާލަތަކަށް ވެއްޓިފައިވާ ކަމަށެވެ.
"ރާއްޖޭގެ ޒުވާނުންގެ މެދުގައި މިފަހަކުން މަޝްހޫރުވެގެން މި އައި ޕާޓީ ކުރުމުގެ އާ ގޮތް [ޓްރެންޑު] ގެ ސަބަބުން ގިނަ ބަޔަކު އެކަމުގެ ތެރެއިން ލާފައި މަސްތުވާތަކެތީގެ ޝިކާރައަކަށްވެ ނުރައްކާތެރި ހާލަތަކަށް ވެއްޓިފައިވޭ،" އެ ބަޔާނުގައި ބުނެފައިވެ އެވެ.
މާލޭގެ ޖަންގްޝަން ފެން ނަގައިގެން ހެދި ދިރާސާއަކުން ދައްކާ ގޮތުގައި ރާއްޖޭގައި އަދި ހާއްސަކޮށް މާލޭގައި އެންމެ ގިނައިން ބޭނުން ކުރަނީ ރަލާއި ކެނަބިސް އެވެ. ދެން އެންމެ ގިނައިން ބޭނުން ކުރަނީ ހެރޮއިން ނުވަތަ ހަކުރެވެ. އެކަމަކު ޕާޓީ ޑްރަގްސްގެ ގޮތުގައި ކްލާސް ކުރެވޭ އެމްފެޓަމައިންސް، މެތައެމްފެޓަމައިންސް އެމްޑީއެމްއޭ ފަދަ މަސްތުވާތަކެތި ބޭނުން ކުރާ މިންވަރު އަންނަނީ އިތުރުވަމުންނެވެ.
އެ ބަޔާނުގައި ބުނެފައި ވަނީ ޒުވާނުންގެ ތެރެއިން ގިނަ ބަޔަކު ޕާޓީ ޑްރަގްސް ބޭނުން ކުރަން ފަށަނީ އެއީ ރައްކާތެރި އެއްޗެއްގެ ގޮތުގައި ދެކިގެން ކަމަށެވެ.
"ރާއްޖޭގައި މިކަން ފެތުރިގެން ގޮސްފައި ވަނީ ރައްކާތެރި އެއްޗެއް ކަމަށް ދެކިގެން ނަމަވެސް މިއީ ފުރާނަ ގެއްލިދިޔުމުގެ ފުރުސަތު އޮތް ނުރައްކާތެރި މަސްތުވާތަކެތި،" އެންޑީއޭއިން ބުނެ އެވެ.
ވަރަށް ގިނަ ޒުވާނުން މަސްތުވާތަކެތި ބޭނުން ކުރަން ފަށާފައި ވަނީ ދޭތެރެއަކުން މަސްތުވުމުގެ ނިޔަތުގައި ކަމަށް ވެސް އެންޑީއޭއިން ބުނެ އެވެ.
"ފަރުވާގެ ނިޒާމުގެ ހިދުމަތަށް އެދިގެން އައި ގިނަ ޒުވާނުންގެ ފަރާތުން އެނގުނު ގޮތުގައި އެފަދަ މީހުން މިތަކެތި ބޭނުން ކުރަމުން ގޮސްފައި ވަނީ ދޭތެރެ ދޭތެރެއިން ބޭނުން ކުރަމުންދާ ގޮތަށް ނަމަވެސް އެކަމުގެ ތެރެއިން މިފަދަ މީހުން މަސްތުވާތަކެއްޗަށް އަޅުދާސްތުވެ، މަސްތުވާތަކެތީގެ އެކި ބާވަތްތަކުގެ ތެރެއަށް ވަދެފައިވޭ،" އެ ބަޔާނުގައިވެ އެވެ.
