އެއީ ރައްކާތެރި އެއްޗެއްގެ ގޮތުގައި ދެކިގެން ބޭނުން ކުރަން ފެށުމަށްފަހު ގިނަ ބަޔަކު ޕާޓީ ޑްރަގްސްއަށް ދެވިހިފާފައިވާ ކަމަށް ނެޝަނަލް ޑްރަގް އެޖެންސީއިން ބުނެފި އެވެ.
އެންޑީއޭއިން އިއްޔެ ނެރުނު ބަޔާނެއްގައި ބުނީ ރާއްޖޭގައި ޕާޓީ ޑްރަގްސް އާންމުވެފައި ވަނީ ރައްކާތެރި އެއްޗެއްގެ ގޮތުގައި ދެކިގެން ކަމަށެވެ. ނަމަވެސް ފަހުން މަސްތުވާތަކެއްޗަށް ދެވިހިފައި ނުރައްކާތެރި ހާލަތަކަށް އެފަދަ މީހުން ވެއްޓިފައިވާ ކަމަށް އެންޑީއޭއިން ބުނެ އެވެ.
"ރާއްޖޭގައި މިކަން ފެތުރިގެން ގޮސްފައި ވަނީ ރައްކާތެރި އެއްޗެއް ކަމަށް ދެކިގެން ނަމަވެސް މިއީ ފުރާނަ ގެއްލިދިޔުމުގެ ފުރުސަތު އޮތް ނުރައްކާތެރި މަސްތުވާތަކެތި،" އެންޑީއޭއިން ބުންޏެވެ. "މިފަހަކުން މަޝްހޫރުވެގެން މި އައި ޕާޓީ ކުރުމުގެ އާ ގޮތް [ޓްރެންޑު] ގެ ސަބަބުން ގިނަ ބަޔަކު އެކަމުގެ ތެރެއިން ލާފައި މަސްތުވާތަކެތީގެ ޝިކާރައަކަށްވެ ނުރައްކާތެރި ހާލަތަކަށް ވެއްޓިފައިވޭ."
ރާއްޖޭގައި ހަދާފައިވާ ދިރާސާތަކުން ދައްކާ ގޮތުގައި ރާއްޖޭގައި އަދި ހާއްސަކޮށް މާލޭގައި އެންމެ ގިނައިން ބޭނުން ކުރަނީ ރަލާއި ކެނަބިސް އެވެ. ދެން އެންމެ ގިނައިން ބޭނުން ކުރަނީ ހެރޮއިން ނުވަތަ ހަކުރެވެ. އެކަމަކު ޕާޓީ ޑްރަގްސްގެ ގޮތުގައި ކްލާސް ކުރެވޭ އެމްފެޓަމައިންސް، މެތައެމްފެޓަމައިންސް އެމްޑީއެމްއޭ ފަދަ މަސްތުވާތަކެތި ބޭނުން ކުރާ މިންވަރު އަންނަނީ އިތުރުވަމުންނެވެ.
އެންޑީއޭއިން ބުނީ، ގިނަ ޒުވާނުން ޕާޓީ ޑްރަގްސް ބޭނުން ކުރަން ފަށާފައި ވަނީ ދެވިހިފައިދާނެ ކަމަށް ބަލައިގެން ނޫން ކަމަށެވެ. ގިނަ މީހުން ޕާޓީ ޑްރަގްސް ބޭނުން ކުރަން ފަށަނީ ދޭތެރެެއަކުން އެ ތަކެތި ބޭނުން ކުރަން ހިތުލައިގެން ކަމަށް ވެސް އެންޑީއޭއިން ބުނެ އެވެ.
"ފަރުވާގެ ނިޒާމުގެ ހިދުމަތަށް އެދިގެން އައި ގިނަ ޒުވާނުންގެ ފަރާތުން އެނގުނު ގޮތުގައި އެފަދަ މީހުން މިތަކެތި ބޭނުން ކުރަމުން ގޮސްފައި ވަނީ ދޭތެރެ ދޭތެރެއިން ބޭނުން ކުރަމުންދާ ގޮތަށް ނަމަވެސް އެކަމުގެ ތެރެއިން މިފަދަ މީހުން މަސްތުވާތަކެއްޗަށް އަޅުދާސްތުވެ، މަސްތުވާތަކެތީގެ އެކި ބާވަތްތަކުގެ ތެރެއަށް ވަދެފައިވޭ،" އެ ބަޔާނުގައިވެ އެވެ.
އެންޑީއޭއން ބުނީ ޕާޓީ ޑްރަގްސްއަކީ ވެސް ނުރައްކާތެރި މަސްތުވާ އެއްޗެހި ކަމަށާއި އެފަދަ ބާވަތްތައް ބޭނުންކޮށްގެން ވެސް ފުރާނަ ދިޔުމުގެ ނުރައްކާ އޮތް ކަމަށެވެ.
"އެހެންކަމުން ޕާޓީ ކުރުމުގެ ނަމުގައި ފެތުރެމުންދާ މި ނުރައްކާތެރި މަސްތުވާތަކެއްޗާއި އެ ނޫން ވެސް މަސްތުވާ ޒާތުގެ އެންމެހާ މާއްދާތަކާއި ތަކެތި ބޭނުން ކުރުމަކީ ފުރާނަ ގެއްލިދިޔުމުގެ ނުރައްކާ އޮތް ކަންކަމަށް ވާތީ، އެކަންކަން ކުރާ އެންމެހާ ފަރާތްތަކަށް މި ނުރައްކަލުގެ އިންޒާރު ދެން،" އެންޑީއޭއިން ބުންޏެވެ.
އޭގެ އިތުރުން އެންޑީއޭއިން ބުނީ، ޕާޓީ ކުރުމުގެ ޓްރެންޑުގެ ތެރެއަށް ކުޑަކުދިންނާއި ދެ ޖިންސުގެ މީހުންގެ ވެސް ވަންނަމުންދާ ކަމަށެވެ. އެކަމާ ދެކޮޅަށް މަސައްކަތް ކުރުމަށް އެންޑީއޭއިން މިހާރު އައުޓްރީޗް ޕްރޮގްރާމުތަކެއް ހިންގަމުންދާ ކަމަށް ވެސް އެތަނުން ބުންޏެވެ.
