މިދިޔަ ހުކުރު ދުވަހު ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ހައްވާ ޔުމްނު ރަޝީދު (ޔުމްނު) 21، ވެއްޓުނު ހާދިސާއާ ގުޅިގެން އިންސާފަށް އެދި ގިނަ ބަޔަކު ތެދުވެ އަޑު އުފުލަމުން ދާއިރު ހިއުމަން ރައިޓްސް ކޮމިޝަން އޮފް މޯލްޑިވްސް (އެޗްއާރްސީއެމް) އަދިވެސް ކަންބޮޑުވުމެއް ފާޅެއް ނުކުރެ އެވެ.
ޔުމްނު ވެއްޓުނު ހާދިސާއާ ގުޅިގެން ފުލުހުން ހިންގާ ތަހުގީގު ދޯދިޔާ ކަމާއި، އެކަމުގައި ޝާމިލުވާ އެއްވެސް މީހަކު ހައްޔަރު ނުރާތީ އަދި ކަންކަން ސިއްރު ކުރާތީ އެކަމާ ދެކޮޅަށް ރޭ ގިނަ އަދަދެއްގެ ޒުވާނުން ފުލުހުންގެ "އާދަމް ހަލީމް ކްރިމިނަލް އިންވެސްޓިގޭޝަން ބިލްޑިން" ކައިރީ ވަނީ މުޒާހަރާކޮށްފަ އެވެ.
ރޭގެ މުޒާހަރާގައި އެޗްއާރްސީއެމްގެ ވެރިންގެ އިސްތިއުފާއަށް ވެސް ގޮވި އެވެ.
އާންމު މަސްލަހަތު ބޮޑު މައްސަލަތަކުގައި އެޗްއާރްސީއެމް އިން ފަހަކަށް އައިސް އަމަލުކުރާ ގޮތުން ގިނަ ބައެއްގެ ފާޑުކިޔުން އެ ކޮމިޝަނަށް އަމާޒުވެފައި ވާއިރު، އެންމެ ފަހުން އެ ކޮމިޝަނުން ކަންބޮޑުވުން ފާޅުކުރި ރައީސްގެ ދޮށީ ދަރިކަލުން ވާހަކަ އެމްޑީޕީގެ އެއްވުމެއްގައި ދެއްކި ބުނެ އެކަން ކުށްވެރިކުރުމަށެވެ.
ހ. ފެންޓެނޯއީ ގޭގެ ނުވަ ވަނަ ފަންގިފިލާއިން ޔުމްނު އާއި އޭނާއާއެކު އުޅުނު މީހާ، އެހެން ޒުވާނުންތަކާކާއެކު ބުރާސްފަތި ދުވަހުގެ ރޭ ފުރަތަމަ ދިޔައީ "މާލޭގެ މެދުތެރޭގައި" ހުރި ގެއަކަށެވެ. ޔުމްނު އާއި އޭނާއާއެކު އުޅުނު މީހާ ދިޔައީ ފެންޓެނޯއީ އަށް ދިޔައީ އެއަށް ފަހު އެވެ.
އެ ގެއިން ޔުމްނު ވެއްޓި، ޖެހިގެން ހުރި ގުދަނުގެ ފުރާޅުމަތީގައި އޮއްވައި ފެނުނީ ހުކުރު ދުވަހު ހެނދުނު އެވެ. މި މައްސަލައިގައި އޭނާއާއެކު އުޅުނު މީހާ ހައްޔަރެއް ނުކުރެ އެވެ.
މި މައްސަލައިގައި ޒުވާނުން ނުކުމެ އިހުތިޖާޖު ކުރާ ހިސާބަށް ދިޔައީ، ޔުމްނު ވެއްޓުނު ކަމަށް ބުނާ ހާދިސާގައި ޝާމިލުވާ މީހުން ހިމާޔަތްކުރަން މަސައްކަތް ކުރަމުންދާ ކަމުގެ ތުހުމަތު ފުލުހުންނަށް އަމާޒުވެފައި ވަނިކޮށެވެ.
