ރިޔާސީ އިންތިހާބުގެ ދެވަނަ ބުރު އުވާލާ ފުރަތަމަ ބުރުން ރައީސަކު ހޮވޭ ގޮތަށް ގާނޫނުއަސާސީ ބަދަލުކުރުމަށް ކުރާ މަސައްކަތުގައި ވެރިކަންކުރާ ޕީއެންސީއަށް ނިސްބަތްވާ މަޖިލިސް މެންބަރުންގެ ތާއީދަށް ރައީސް ޑރ. މުހައްމަދު މުއިއްޒު އެދިވަޑައިގެންފި އެވެ.
ރައީސް މުއިއްޒު މެންބަރުންގެ ގާތު އެދިވަޑައިގެންނެވީ އިއްޔެ މެންދުރު މުލިއާގޭގައި ބޭއްވި ބައްދަލުވުމެއްގަ އެވެ. މި ބައްދަލުވުމުގައި ރައީސް ހުށަހެޅުއްވި ކަންކަން ޕީއެންސީގެ ބައެއް މަޖިލިސް މެންބަރުން ވަނީ އަދަދު ނޫހާ ހިއްސާކޮށްފަ އެވެ.
މެންދުރު ކެއުމާއެކު ބޭއްވި މި ބައްދަލުވުމުގައި، ރިޔާސީ އިންތިހާބުގެ ދެވަނަ ބުރު އުވާލުމަށް ގާނޫނުއަސާސީއަށް ބަދަލުކުރުމަށް ނަގަންޖެހޭ, ފެންނަ ނުފެންނަ ވޯޓު މި އަހަރު ނެގުމަށް މަސައްކަތް ކުރަމުންދާ ކަމަށް ވެސް ރައީސް ވަނީ ވިދާޅުވެފަ އެވެ.
މީގެ އިތުރުން، ރިޔާސީ އިންތިހާބާއި ރައްޔިތުންގެ މަޖިލިސް އިންތިހާބު އެއްކޮށްލުމަަށް ވެސް މި އަހަރު ފެންނަ ނުފެންނަ ވޯޓެއް ނަގަން މަސައްކަތް ކުރާ ކަމަށް ރައީސް އިއްޔެ ވިދާޅުވި ކަމަށް މެންބަރުން މައުލޫމާތު ދިނެވެ.
"ދެ އިންތިހާބު އެއްކޮށްލުމަށް، ދެން ރިޔާސީ އިންތިހާބު އެއްބުރަށް ހެދުމަށް ފެންނަ ނުފެންނަ ވޯޓަކަށް ދާނެ ކަމަށް ވިދާޅުވީ. މިކަމުގައި މެންބަރުންގެ ތާއީދަށް އެދިލެއްވީ،" މެންބަރަކު ވިދާޅުވި އެވެ.
މީގެއިތުރުން ވެރިކަމުގެ ހުވާ ކުރާ ދުވަސް ޖުމްހޫރީ ދުވަހަށް ބަދަލުކުރުމަށް ވެސް ރައީސް ހުށަހަޅުއްވާނެ އެވެ. އެއީ ކޮންމެ އަހަރެއްގެ ވެސް ނޮވެމްބަރު 11 ވަނަ ދުވަހެވެ.
ކުރީގެ ރައީސް އަބްދުﷲ ޔާމީންއާ ހަމައިން ފެށިގެން އިންތިހާބީ ރައީސް ހުވާ ކުރައްވަމުން ގެންދަވާފައި ވަނީ ނޮވެމްބަރު 17 ވަނަ ދުވަހު އެވެ. އެއީ 2013 ވަނަ އަހަރުގެ ރިޔާސީ އިންތިހާބު ބޭއްވުން ލަސްވުމާ ގުޅިގެންނެވެ.
ދެ އިންތިހާބު އެއްކޮށްލުމަށް ރައްޔިތުންގެ ފެންނަ ނުފެންނަ ވޯޓަކަށް މިއަހަރު ދިޔުމަށް ނިންމާފައިވާކަން ރައީސް މުއިއްޒު ފުރަތަމަ އިއުލާނުކުރެއްވީ ރައްޔިތުންގެ މަޖިލީހަށް މިއަހަރުގެ ރިޔާސީ ބަޔާން އިއްވަވަމުންނެވެ.
ރިޔާސީ އިންތިހާބުގެ ދެވަނަ ބުރު އުވާލަން ހުށަހަޅުއްވާނެ ކަމަށް ރައީސް ވިދާޅުވީ މިދިޔަ އަހަރުގެ ޖުމްހޫރީ ދުވަހުގެ ޖަލްސާގައި ވާހަކަ ދައްކަވަމުންނެވެ. ރައްޔިތުން އެގޮތަށް ދެކޭނަމަ 2028 ގެ އިންތިހާބު ކުރިއަށް ގެންދާނީ އެއްބުރަށް ކަމަށްވެސް ރައީސް އެ ދުވަހު ވިދާޅުވި އެވެ.
"ދިރާސާ ކުރަމުންދާ ކަމެއް، އެޓަރނީ ޖެނެރަލާ އަޅުގަނޑު ހަވާލުކޮށްގެން ދިރާސާ ކުރަމުންދާ ކަމެއް، ބައެއް ގައުމުތަކުގައި އޮންނަ ގޮތެއް، ޕްރިފަރެންޝަލް ވޯޓިން ނިޒާމު. ދެވަނަ ބުރު އުވާލުން. ޕާސަނަލީ އަޅުގަނޑު ގަބޫލުކުރާގޮތް،" ރައީސް އެ ދުވަހު ވިދާޅުވި އެވެ.
ގިނަ ޕާޓީތަކަށް ވާދަކުރެވޭ ގޮތަށް ރާއްޖޭގައި ރިޔާސީ އިންތިހާބު ބާއްވަން ފެށި ފަހުން ފުރަތަމަ ބުރުގައި 50 އިން މަތިން ވޯޓު ހޯދައިގެން އިންތިހާބު ކާމިޔާބުކޮށްފައި ވަނީ 2018 ވަނަ އަހަރު، އޭރު އެމްޑީޕީން ވާދަ ކުރެއްވި ކެންޑިޑޭޓު އިބްރާހިމް މުހައްމަދު ސޯލިހެވެ.
އެފަހަރު އެއްބުރުން އިންތިހާބު ކާމިޔާބުކުރަން އެންމެ ބޮޑު ބާރަކަށް ވެގެން ދިޔަ މައިގަނޑު ސަބަބަކީ އެމަނިކުފާނާ އިދިކޮޅު ހުރިހާ ސިޔާސީ ލީޑަރުން ޖަލަށް ލާފައި ތިބުމުން، ރިޔާސީ އިންތިހާބުގެ ކުރިން އިދިކޮޅު ހުރިހާ ޕާޓީތަކެއް ކޯލިޝަން ހެދުމެވެ.
