އަވަސް އަރުވާލައިގެން ގދ. ތިނަދޫއަށް އަގުބޮޑުކޮށް ހޯދި ފެން ޕްލާންޓަށް ފައިސާ ނުދައްކާތީ އިންސްޓޯލްނުކުރެވި ހަތް މަސް ދުވަސް ވެއްޖެ އެވެ.
ތިނަދޫއަށް ގެންދިޔަ ފެން ޕްލާންޓުގެ މުއާމަލާތުގެ މައުލޫމާތު އެނގޭ މީހަކު އަދަދު އަށް ބުނީ އެ ރަށަށް ގެންދިޔައީ ފެން ޕްލާންޓަށް ބޭނުންވާ ޕްލާންޓު އެކަނި ކަމަށެވެ. އެއަށް ބޭނުންވާ ޓޭންކުތަކާއި އިތުރު ސާމާނުތައް ނުގެންގޮސްގެން އުޅެނީ އެކަމާ ހަވާލުވި އެޗްކިއު ހޯލްޑިންގްސްއަށް ފައިސާ ނުދޭތީ ކަމަށެވެ.
"ފެން ޕްލާންޓް ގަތީ އެއްކޮށް ލާރި ދީފައި. އެކަމަކު ބާކީ ހުރި ޓޭންކުތަކާއި އެހެން ހުރިހާ އެއްޗަކަށް ފެނަކައިން ފައިސާ ނުދޭތީ ފޯރުކޮށްނުދޭ. އެޗްކިއު އިން ބުނާ ގޮތުގައި ފެނަކައިން މިހާރު ނޫޅޭ އެ މަޝްރޫއު ކުރިއަށް ގެންދާކަށް،" އޭނާ ބުންޏެވެ.
ތިނަދޫއަށް ފެން ޕްލާންޓެއް ފޯރުކޯށްދޭން އެޗްކިއު ހޯލްޑިންގްސްއާ ފެނަކައިން އެއްބަސްވުން ހަދާފައި ވަނީ މާކެޓް އަގަށްވުރެ ބޮޑުކޮށް ޖުމްލަ 13.6 މިލިއަން ރުފިޔާއަށެވެ.
އެޗްކިއު ހޯލްޑިންގްސް އިން ހުށަހެޅި އަގަށްވުރެ ހަތް މިލިއަން ރުފިޔާ ކުޑަކޮށް ސަރުކާރުގެ ފެން ކުންފުނި އެމްޑަބްލިއުއެސްސީން ހުށަހެޅި ނަމަވެސް، އެ ކުންފުނިން ފެން ޕްލާންޓް ފޯރުކޮށްދޭން ގިނަ ދުވަސްތަކެއް ނަގާ ކަމަށް ބުނެ ފެނަކައިން އެޗްކިއު ހޯލްޑިންގްސްއާ މަޝްރޫއު ހަވާލުކުރި އެވެ.
އެޗްކިއު ހޯލްޑިންގްސް އިން ތިނަދޫއަށް ހޯދި ފެން ޕްލާންޓް އެއްފަހަރާ ފައިސާ ދީފައި ގަތީ މެކޭނިޒަމް މޯލްޑިވްސް އިން ހަތަރު މިލިއަނެއްހާ ރުފިޔާއަށްކަން މި ނޫހަށް ވަނީ އެނގިފަ އެވެ. ނަމަވެސް އޭގެ ފަހުން އެ ޕްލާންޓަށް ބޭނުންވާ ޓޭންކުތަކާއި އެހެނިހެން ސާމާނަށް ފެނަކައިން ފައިސާ ނުދޭތީ އެޗްކިއު ހޯލްޑިންގްސްއިން މެކޭނިޒަމް މޯލްޑިވްސްއަށް ފައިސާ ދެއްކިފައެއް ނުވެ އެވެ.
ފެނަކައިގެ ހިންގުމާ މުއާޒް މުހައްމަދު ރަޝީދު ހަވާލުވެގެން ހުންނެވިއިރު ހިނގާފައިވާ ފެން ޕްލާންޓުގެ މުއާމަލާތުގައި ކޮރަޕްޝަންގެ އެއްވެސް އަމަލެއް ހިންގާފައި ނުވާ ކަމަށް އޭރު އެ ކުންފުނިން ބުންޏެވެ.
އެގޮތުން ތިނަދޫގެ ފެން ޕްލާންޓް މަޝްރޫއު އޭރު އެޗްކިއު ހޯލްޑިންގްސްއާ ހަވާލުކުރީ އެމްޑަބްލިއުއެސްސީން ކުޑަ އަގެއް ހުށަހެޅި ނަމަވެސް، ވީހާ ވެސް އަވަހަށް އެ ރަށަށް ދިމާވެފައިވާ ފެނުގެ މައްސަލަ ހައްލު ކުރުމަށް ކަމަށް ފެނަކައިން އޭރު ބުންޏެވެ.
ތިނަދޫއަށް ގެނެސްފައިވާ އައު ފެން ޕްލާންޓް އިންސްޓޯލްނުކޮށް ދިގުލައިގެންދާތީ އެކަމުގެ ކަންބޮޑުވުން ތިނަދޫ ކައުންސިލްގެ ރައީސް ސައުދު އަލީ ވަނީ ފާޅުކުރައްވާފަ އެވެ.
މިކަމާ ގުޅޭ ގޮތުން އަދަދު އާ ވާހަކަ ދައްކަވަމުން ސައުދު ވިދާޅުވީ ފެނަކައިން ބުނާ ގޮތުގައި ފެން ޕްލާންޓް އިންސްޓޯލް ނުކުރެވި ދިގުލައިގެން ދަނީ އެއަށް ބޭނުންވާ ބައެއް ފިޓިންގްސް ނުލިބިގެން ކަމަށެވެ.
"ފެން ޕްލާންޓެއް ގެންގޮސްފައި ހުންނަތާ ފުދޭވަރަކަށް ދުވެސްވެއްޖެ އަސްލު. މިހާރު ހަތަރު މަހެއް ވެދާނެ. ސާފު ޖަވާބެއް ނޫން. އެކަމަކު މައުލޫމާތު އެނގޭ ގޮތުގައި އެއަށް ބައެއްކަހަލަ ފިޓީންގްސްތައް އެބޭފުޅުންނަށް އަދި ނުލިބޭތީ އޭތި އިންސްޓޯލް ނުކުރެވި ލަސްވަނީ ކަމަށް ބުނެފައި އޮތީ،" އޭނާ ވިދާޅުވި އެވެ.
ތިނަދޫއަށް ފެން ޕްލާންޓެއް އެންމެ ފުރަތަމަ ގެންދިޔައީ އެމްޑީޕީގެ ފުރަތަމަ ވެރިކަމުގަ އެވެ. އަދި އިންސްޓޯލްކޮށް ހިދުމަތް ދޭން ފެށީ ރައީސް ޑރ. މުހައްމަދު ވަހީދުގެ ވެރިކަމުގަ އެވެ.
އޭގެ ފަހުން އެތައް އަހަރުތަކެއް ފާއިތުވެފައިވާއިރު މިހާރު ހުރި ފެން ޕްލާންޓުން ހިދުމަތް ދިނުމަށް ދަނީ ދަތިތައް ދިމާވަމުންނެވެ. އެގޮތުން ގެތަކަށް ފެން ލިބޭ ޕްރެޝާ ދަށްވެ، ފެން ޕްލާންޓުގެ ފިލްޓަރުތަކަށް ވެސް އަންނަނީ މައްސަލަތައް ދިމާވަމުންނެވެ.
ތިނަދޫ ފެން ޕްލާންޓަށް އެންމެ ފަހުން މައްސަލަ ދިމާވުމާ ގުޅިގެން އެ މައްސަލަ ހައްލު ކުރުމަށް ދެ މަސް ދުވަސް ނެގި އެވެ. އެ މުއްދަތުގައި ރަށުގެ ރައްޔިތުންނަށް ފެން ފޯރުކޮށްދިނުމަށް ފެނަކަ އިން އެތައް މިލިއަން ރުފިޔާއެއް ހޭދަކުރަން ވެސް ޖެހުނެވެ.
