ރޯމް (އޭޕްރީލް 5) - ޖަރުމަނުގެ ހުނަރުވެރި ޑިފެންޑަރު، މެޓްސް ހަމެލްސް، މި ސީޒަނަށް ފަހު ޕްރޮފެޝަނަލް ފުޓްބޯޅަ އިން ރިޓަޔާކުރަން ނިންމާފައިވާކަން އިއުލާނުކޮށްފި އެވެ.
އިޓަލީގެ ރޯމާ އަށް ކުޅެމުން އަންނަ ހަމެލްސް، 36، މި ވަގުތު އެ ކްލަބްގެ ކޮންޓްރެކްޓްގައި ހުރީ މި އަހަރުގެ ޖޫން މަހުގެ 30 ވަނަ ދުވަހުގެ ނިޔަލަށެވެ. ހަމެލްސް ވަނީ މި ކޮންޓްރެކްޓް ހަމަވުމާ އެކު، ޕްރޮފެޝަނަލް ފުޓްބޯޅަ ކެރިއަރު ވެސް ނިމުމަކަށް ގެންނަން ނިންމާފައިވާކަން ސޯޝަލް މީޑިއާގައި ހާމަކޮށްފަ އެވެ.
"މިއީ ކޮންމެ ކުޅުންތެރިއަކަށް ވެސް އެންމެ އުނދަގޫވާނެ ކަންތައް. އަހަރެން 18 އަހަރު ވަންދެން މަތީ ފަންތީގައި ފުޓްބޯޅަ ކުޅުމަށް ފަހު، ނިންމާފައި މި ވަނީ މި އަހަރަށް ފަހު، ދެން ހުއްޓާލަން. ފުޓްބޯޅައިން އަހަންނަށް ވަރަށް ގިނަ ކަންތައްތަކެއް ފަހިވި، ފުޓްބޯޅަ ދޫކޮށްލުމަކީ އަހަންނަށް ވަރަށް ޖަޒުބާތީ ނިންމުމެއް،" ހަމެލްސް ބުންޏެވެ.
އެކާވީސް ވަނަ ގަރުނުގައި ފެނިގެންދިޔަ މޮޅު ޑިފެންޑަރުންގެ ތެރޭގައި ހިމެނޭ ހަމެލްސް ވަނީ، ޖަރުމަނު ގައުމީ ފުޓްބޯޅަ ޓީމުން 2014 ވަނަ އަހަރު ފީފާ ވޯލްޑް ކަޕް ކާމިޔާބުކުރިއިރު މޮޅު ކުޅުމެއް ދައްކައިފަ އެވެ. ޖަރުމަނު ގައުމީ ޓީމަށް 2010 އިން 2023 އަށް ކުޅުނު ހަމެލްސް ވަނީ އެ ޓީމަށް ޖުމްލަ އެކު، 76 މެޗުން ފަސް ގޯލު ޖަހައިދީފަ އެވެ.
ޖަރުމަނު ފުޓްބޯޅައިގެ ގަދަބާރު ބަޔާން މިއުނިކުން 18 އަހަރު ސީނިއާ ފުޓްބޯޅަ ކެރިއަރުގެ ފުރަތަމަ މެޗު ކުޅުނު ހަމެލްސް ވަނީ، 2008 ވަނަ އަހަރު ބޮރޫޝިއާ ޑޯޓްމަންޑަށް ބަދަލުވެފަ އެވެ. އެ ޓީމުގައި މޮޅު ކުޅުމެއް ދެއްކި، ހަމެލްސް، 2016 ވަނަ އަހަރު އަލުން ބަޔާނަށް ބަދަލުވުމަށް ފަހު، ތިން އަހަރު އެ ޓީމަށް ކުޅެދިނެވެ. އަދި، އަލުން، ޑޯޓްމަންޑަށް ބަދަލުވެ، އެ ޓީމަށް ކުޅެ، މި ވަގުތު ކުޅެމުން އަންނަ ރޯމާއާ ގުޅުނީ މި ސީޒަން ފެށުމުގެ ކުރިންނެވެ.
ޑޯޓްމަންޑަށް 508 މެޗު ކުޅެދިން ހަމެލްސް ވަނީ ބަޔާނަށް 118 މެޗު ކުޅެދީފަ އެވެ. ހިލޭ ޓްރާންސްފާއެއްގައި މި ފަހަރު ރޯމާއާ ގުޅުމަށް ފަހު، މި ސީޒަނުގައި އެ ޓީމުގެ 18 މެޗެއްގައި ވަނީ ކުޅެފަ އެވެ. ކްލަބް ކެރިއަރުގައި 13 ތަށި ހޯދި ހަމެލްސް ވަނީ، ދެ ސީޒަނެއްގައި ޗެމްޕިއަންސް ލީގުގެ ފައިނަލުން ބަލިވެފަ އެވެ.
