މާލެއިން ފެށިގެން ތިލަފުއްޓާ ދޭތެރޭގައި ހުރި ރަށްތަކަށް އެއް ގަމުން ދަތުރުކުރެވޭ ގޮތް ހަދަން ފެށި ތިލަމާލެ ބްރިޖުގެ އެންމެ އުސް ތަނބު މިއަދު ބަހައްޓައިފި އެވެ.
މިކަން ހާމަކޮށް، އިންޑިއާ ހައި ކޮމިޝަނުން ސޯޝަލް މީޑިއާގައި ކުރި ޕޯސްޓެއްގައި ވަނީ، މިއީ މިހާތަނަށް މުޅި ދުނިޔޭގައި ވެސް ޕްރީކާސްޓު ކޮށްގެން ބެހެއްޓި އެންމެ އުސް ތަނބު ކަމަށެވެ. މި ތަނބުގެ އުސްމިނުގައި 8.2 މީޓަރު، ފުޅާ މިނުގައި 25.3 މީޓަރު ހުރެ އެވެ.
މި ބްރިޖުގެ ގިނަ ބައިތަކަކީ ޕްރީކާސްޓު ކޮށްގެން ގެނެސް ގުޅާލާ ބައިތަކެކެވެ. ކޮންސްޓްރަކްޝަން މިނިސްޓްރީން މިދިޔަ ހަފުތާގައި ބުނީ، މުޅި މަޝްރޫއުގެ ދެބައިކުޅަ އެއްބައި މަސައްކަތް އެއްކޮށް ނިމިފައިވާ ކަމަށެވެ.
ތިލަމާލެ ބްރިޖު މަޝްރޫއުގެ ދަށުން މިހާރު ކުރިއަށް ދަނީ ޕައިލް ކެޕް ޖެހުމާއި ޕިއާ ކޮލަމްސް އެޅުމުގެ މަސައްކަތުގެ އިތުރުން ސުޕަ ސްޓްރަކްޗާގެ ބައިތައް ގުޅާލުމުގެ މަސައްކަތްތައް ކަަމަށް ވެސް ކޮންސްޓްރަކްޝަން މިނިސްޓްރީން ބުނެފައިވެ އެވެ.
އިންޑިއާ އެގްޒިމް ބޭންކުން ނަގާފައިވާ 400 މިލިއަން ޑޮލަރުގެ ލޯނަކާއި އިންޑިއާ ސަރުކާރުގެ 100 މިލިއަން ޑޮލަރުގެ ހިލޭ އެހީގައި ތަރައްގީކުރާ މި ބްރިޖުގެ މަސައްކަތް ކުރަނީ އެފްކޮންސް ކުންފުނިންނެވެ.
ދިގުމިނުގައި 6.7 ކިލޯމީޓަރު ހުންނަ މި ބްރިޖު ތަރައްގީކުރަން ހަތް ބިލިއަނަށް ވުރެ ގިނަ ރުފިޔާ ހަރަދު ވާނެ އެވެ. ސަރުކާރުން އެންމެ ފަހުން ބުނެފައިވާ ގޮތުގައި މުޅި މަޝްރޫއު އެއްކޮށް ނިންމާލެވޭނީ އަންނަ އަހަރުގެ ސެޕްޓެމްބަރަށެވެ.
މިއީ މިދިޔަ އަހަރަށް މަސައްކަތް ނިންމާލެވޭނެ ކަމަށް ބުނެ އަމަލީ މަސައްކަތް ފެށި މަޝްރޫއެކެވެ. ނަމަވެސް އެކި ސަބަބުތަކާ ހުރެ މަސައްކަތުގެ ދުވެލި ލަސްވެ، ބްރިޖުގެ އެއްވެސް ބަޔެއް ގުޅާލެވޭ ގޮތެއް ނިމިފަ އެވެ.
