ލިވަޕޫލް (އޭޕްރީލް 3) - އިނގިރޭސި ޕްރިމިއާ ލީގުގައި ރޭ އެވަޓަން އަތުން 1-0 އިން މޮޅުވެ، ލީގުގެ އެއް ވަނައިގައި 12 ޕޮއިންޓުގެ ލީޑު ލިވަޕޫލުން ދަމަހައްޓައިފި އެވެ.
ރޭގެ މޮޅާ އެކު ލިވަޕޫލުން ވަނީ 30 މެޗުން 73 ޕޮއިންޓް ހޯދައިފަ އެވެ. ބާކީ އޮތް އަށް މެޗުން ލިވަޕޫލަށް ލީގު ހޯދަން ބޭނުންވަނީ 13 ޕޮއިންޓެވެ. ލީގުގެ ދެ ވަނައިގައި އޮތް އާސެނަލަށް ވަނީ 30 މެޗުން 61 ޕޮއިންޓް ލިބިފަ އެވެ.
ލިވަޕޫލްގެ އެންފީލްޑް ސްޓޭޑިއަމްގައި ރޭ ކުޅުނު މެޗު ފަށައިގެން 11 މިނިޓް ތެރޭ އެވަޓަންގެ ޖޭމްސް ޓާކޯސްކީ ލިވަޕޫލްގެ އަލެކްސިސް މެކް އަލިސްޓާ އަށް ނުރައްކާތެރި ފައުލެއް ކުރުމުން ލިވަޕޫލުން ރަތް ކާޑެއް ދައްކަން އެޕީލް ކުރި ނަމަވެސް ދެއްކީ ރީނދޫ ކާޑެކެވެ.
އެވަޓަންގެ ބެޓޯ ޖެހި ގޯލެއް ވީޑިއޯ އެސިސްޓަންޓް ރެފްރީ (ވީއޭއާރް) އިން ބަލައިފައި ވަނީ އޮފްސައިޑް ކަމަށް ނިންމައިފަ އެވެ. އޭގެ ފަހުން، ބެޓޯ އަށް ލިބުނު މުޅިން ހުސް ފުރުސަތެއްގައި އޭނާ ފޮނުވާލި ބޯޅަ އަމާޒުވީ ގޯލުގެ ދަނޑިއަށެވެ.
މެޗުގައި ލިވަޕޫލުން ޖެހި ހަމައެކަނި ލަނޑު 57 ވަނަ މިނިޓްގައި ކާމިޔާބުކުރީ ޑިއޯގޯ ޖޮޓާ އެވެ. މިއީ، އެވަޓަން އޭރިއާތެރެއިން ދެ ކުޅުންތެރިން ކައިރިން ދެމިގަތުމަށް ފަހު ޖޮޓާ ޖެހި ގޯލެކެވެ. އޭގެ ފަހުން، ދެ ވަނަ ގޯލެއް ޖެހޭތޯ ލިވަޕޫލުން މަސައްކަތް ކުރި ނަމަވެސް ކާމިޔާބެއްނުވި އެވެ.
އެންމެ ފަހުގެ ޗެމްޕިއަން މެންޗެސްޓާ ސިޓީން ވަނީ އަމިއްލަ ދަނޑުގައި ކުޅުނު މެޗުން ޖެކް ގްރީލިޝް އާއި އޮމަރު މާމޫޝްގެ ލަނޑުތަކުން 2-0 އިން ލެސްޓާ ސިޓީ ބަލިކޮށްފަ އެވެ. މެންޗެސްޓާ ސިޓީ، ހަތަރެއްގައި އޮތީ 30 މެޗުން 51 ޕޮއިންޓާ އެކު އެވެ. ނިއުކާސަލް ޔުނައިޓެޑުން ފަސް ވަނަ އަށް އެރީ ރޭ އަމިއްލަ ދަނޑުގައި 2-1 އިން ބްރެންޓްފޯޑް ބަލިކޮށްފަ އެވެ. ނިއުކާސަލަށް މި މެޗުގައި ލަނޑުތައް ޖަހައިދިނީ ސަންޑްރޯ ޓޮނާލީ އާއި އަލެކްސަންޑަ އިސާކް އެވެ. ބްރެންޓްފޯޑްގެ ލަނޑު ޖެހީ ބްރަަޔާން އެމްބުއޭމޯ އެވެ.
ރޭގެ އެހެން މެޗުުތަކަށް ބަލާއިރު، ބްރައިޓަން ދަނޑުގައި އެސްޓަން ވިލާ 3-0 އިން މޮޅުވިއިރު، ބޯންމައުތު ވަނީ އަމިއްލަ ދަނޑުގައި 2-1 އިން އިޕްސްވިޗު ޓައުން އަތުން ބަލިވެފަ އެވެ. ސައުތެމްޓަން އިން ކުޅުނު މެޗު ނިމުނީ 1-1 އިން ކްރިސްޓަލް ޕެލަސްއާ އެއްވަރުވެގެންނެވެ.
