ތިމާވެށީގެ ގޮތުން އިޔާދަނުކުރެވޭނެ ވަރުގެ ގެއްލުމެއް ލިބިދާނެތީ ރިސޯޓެއް ނާޅާ ގޮތަށް މީގެ ކުރިން ނިންމާފައި އޮތް. ކ. ކާށިދޫ ފަޅު (ކާށިދުއްފަރު) ގައި ރިސޯޓެއް ތަރައްގީ ކުރާނެ ބަޔަކު ހޯދަން ސަރުކާރުން އިއުލާނުކޮށްފި އެވެ.
ޓޫރިޒަމް މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ ކާށިދޫ ފަޅުގައި ތަރައްގީ ކުރަން ދޫކުރަނީ ޖުމްލަ 115 ހެކްޓަރުގެ ސަރަހައްދެއް ކަމަށެވެ. ރިސޯޓު ތަރައްގީ ކުރުމަށް ހިއްކޭނީ 10 ހެކްޓަރުގެ ރަށެކެވެ. މި ސަރަހައްދުގެ އަގެއްގެ ގޮތުގައި ކަނޑައަޅާފައިވަނީ 2.25 މިލިއަން ޑޮލަރެވެ.
މިނިސްޓްރީން އާންމުކޮށްފައިވާ މައުލޫމާތުން އެނގޭ ގޮތުގައި ރިސޯޓު ތަރައްގީކުރަން ދޫކުރަނީ ކާށިދުއްފަރުގެ ހުޅަނގު އުތުރު ކަނުން ހިކި ދިޔައިގައި ހިކޭ ފިނޮޅާ ދިމާލުންނެވެ. ކާށިދުއްފަރަކީ ރާއްޖޭގެ އެހެން ފަޅުތަކާ އަޅާބަލާއިރު ގިނަ އަދަދަކަށް މޫދު ވިނަ ހެދިފައިވާ ފަޅެކެވެ.
ކާށިދޫ ފަޅުގައި ރިސޯޓެއް ތަރައްގީ ކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. ރިޔާސީ ކެމްޕޭނުގެ ތެރެއިން ސެޕްޓެމްބަރު 5، 2023 ގައި ކާށިދޫއަށް ވަޑައިގެން ދެއްކެވި ވާހަކައިގައި ރައީސް މުއިއްޒު ވިދާޅުވީ އެކަން ކުރާނީ ކާށިދޫއަށް ފައިދާވާނެ ގޮތެއްގެ މަތިން ކަމަށެވެ.
މިއަދު ކުރި އިއުލާނުގެ ދަށުން ކާށިދޫ ފަޅުގައި ރިސޯޓު ތަރައްގީކޮށް ހިންގަން ޝައުގުވެރިކަން ހުރި ފަރާތްތަކުން ބިޑު ހުށަހެޅުމުގެ ސުންގަޑިއަކަށް ކަނޑައަޅާފައިވަނީ ޖޫން 5، ގެ ހެދުނު 10:00 އެވެ.
ކާށިދޫ ފަޅުގައި ރިސޯޓު ތަރައްގީ ކުރުމުގެ ފަސްފަހަތް
ކާށިދޫ ފަޅުން ބަޔެއް ހިއްކައިގެން ރިސޯޓެއް ތަރައްގީކުރުމުގެ މަސައްކަތް ފުރަތަމަ އިއުލާނުކުރީ ރައީސް މައުމޫން އަބްދުލް ގައްޔޫމްގެ ސަރުކާރުގެ ފަހު އަހަރު، މީހުން ދިރިއުޅޭ ރަށްތަކުގެ ފަޅު ތެރޭގައި ރިސޯޓު ތަރައްގީކުރަން ގެންގުޅުނު ސިޔާސަތުގެ ދަށުންނެވެ.
2008 ގެ ރިޔާސީ އިންތިހާބާ ދިމާކޮށް މައުމޫނުގެ ސަރުކާރުން ހަތް ރަށެެއްގެ ފަޅު ހިއްކައިގެން ރިސޯޓުތަކެއް ތަރައްގީކުރާނެ ބަޔަކު ހޯދަން އިއުލާނުކުރީ ރަށާ ކައިރިން ވަޒީފާގެ ފުރުސަތު ދިނުމަށް ކަމަށް ބުނެ އެވެ. ނަމަވެސް އެތަނުން އެއްވެސް ރަށެއްގެ ފަޅެއްގައި މިއަދާ ހަމައަށްވެސް ރިސޯޓެއް ތަރައްގީކޮށްފައި ނުވެ އެވެ.
އޭރުގެ ނޫސް ރިޕޯޓުތަކުން އެނގޭ ގޮތުގައި، ކާށިދޫ ފަޅުގައި ރިސޯޓެއް ތަރައްގީކުރަން ޝައުގުވެރިކަން ފާޅުކުރި ހަމައެކަނި ފަރާތް ކަމުގައިވާ މއ. ނިވިކޯ، އަހުމަދު ޝަފީގުއަށް ޖޫން 22، 2008 ގައި ވަނީ މި ފަޅު ކުއްޔަށް ދީފަ އެވެ. މި އެއްބަސްވުމާ ގުޅިގެން ޝަފީގުއަށް ލިބިދޭ ހުރިހާ ހައްގުތަކަށް ފަހުން ބަދަލުކުރީ ވިޔަފާރިވެރިޔާ ހާމިދު އިސްމާއިލް (ހާމިދު ސޭޓު)ގެ ނަންމައްޗަށެވެ.
ފަޅު ހިއްކުމުގެ ސަބަބުން ތިމާވެއްޓަށް އިޔާދަނުކުރެވޭ ފަދަ ބޮޑު ގެއްލުމެއް ލިބިދާނެކަމަށް ބުނެ އެންވަޔަރަމެންޓަށް ޕްރޮޓެކްޝަން އެޖެންސީ (އީޕީއޭ) އިން ކަންބޮޑުވުން ފާޅުކުރުމާ ގުޅިގެން ކާށިދުއްފަރުގައި ރިސޯޓު ތަރައްގީ ނުކުރާން ނިންމީ ރައީސް މުހައްމަދު ނަޝީދުގެ ސަރުކާރުންނެވެ. އެގޮތަށް ނިންމާ ރިލޮކޭޝަން އެއްބަސްވުމުގެ ދަށުން ބަދަލުގައި ދިނީ ދިއްފުށީ ފަޅެވެ.
ކާށިދުއްފަރުގައި ރިސޯޓު ތަރައްގީކުރުމުގެ މަސައްކަތް އަލުން ފެށީ މިދިޔަ ސަރުކާރުންނެވެ. އެގޮތުން ކާށިދޫ ފަޅުގައި ރިސޯޓު ތަރައްގީކުރުމުގެ މަސައްކަތުގެ ދަށުން ޓޫރިޒަމް މިނިސްޓްރީން އެ ފަޅުގެ 180 ހެކްޓަރުގެ ސަރަހައްދެއްގެ ބެތިމެޓްރިކް ސާވޭ ހަދައިދޭނެ ބަޔަކު ހޯދަން އިއުލާނުކުރީ ސެޕްޓެމްބަރު 2022، ގަ އެވެ.
ކާށިދޫ ފަޅުގައި ރިސޯޓެއް ތަރައްގީ ކުރުމަކީ ރައީސް އިބްރާހިމް މުހައްމަދު ސޯލިހުގެވެސް ރިޔާސީ ވައުދުކެވެ. ޓޫރިޒަމުން 2022 ގައި ބުނީ ދިރާސާ ކުރަނީ އެ ފަޅުގައި ރިސޯޓެއް ތަރައްގީ ކުރުމަކީ ދެކޮޅު ޖެހޭ ކަމެއްތޯ ބެލުމަށެވެ.
މިދިޔަ ސަރުކާރުން ކާށިދުއްފަރުގައި އަލުން ރިސޯޓު ތަރައްގީކުރުމުގެ މަސައްކަތް ފެށި އިރު އެ ކަންބޮޑުވުންތަކަށް ހައްލެއް ލިބުނު ކަން ސާފެއް ނޫނެވެ. ފާހަގަކޮށްލެވޭ ގޮތުގައި މިހާރު އެންވަރަމަންޓުން މިނިސްޓްރީ ހިންގަނީ ޓޫރިޒަމް މިނިސްޓްރީއާ އެއް ފުރާޅެއްގެ ދަށުންނެވެ.
