ހއ. ކެލާގެ ފަޅު ތެރޭ ދެ ރިސޯޓު ތަރައްގީ ކުރާނެ ބަޔަކު ހޯދަން ސަރުކާރުން އިއުލާނުކޮށްފި އެވެ.
ޓޫރިޒަމް މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ ކެލާ ފަޅުގައި ރިސޯޓު ތަރައްގީކުރާނީ 12.9 ހެކްޓަރުގެ ދެ ރަށް ހިއްކައިގެން ކަމަށެވެ. މި ރިސޯޓުތައް ތަރައްގީ ކުރުމަށް ކެލާގެ އިހުތިސާސުން ޖުމުލަ 325.5 ހެކްޓަރުގެ ސަރަހައްދެއް އުނިކުރަން ރައީސް ޑރ. މުހައްމަދު މުއިއްޒު ވަނީ މާޗު 29، ގައި ނިންމަވާފަ އެވެ.
ދެ ރިސޯޓުގެ ތެރެއިން ފުރަތަމަ ރިސޯޓަށް ކަނޑައަޅާފައިވާ 169.3 ހެކްޓަރުގެ ފަޅުގެ ސަރަހައްދުގެ އަގެއްގެ ގޮތުގައި ޓޫރިޒަމް މިނިސްޓްރީން ކަނޑައަޅާފައިވަނީ 2،032،110 ޑޮލަރެވެ. ދެވަނަ ރިސޯޓުގެ ޖުމްލަ ސަރަހައްދަކީ 156.2 ހެކްޓަރެވެ. އެ ސަރަހައްދުގެ އަގަކީ 1،996،740 ޑޮލަރެވެ.
މި ދެ ރަށަށް އިންވެސްޓްކުރުމަށް ބޭނުންވާ ފަރާތްތަކުން މައުލޫމާތު ސާފުކުރުމަށްފަހު ބީލަން ހުށަހެޅުމުގެ ސުންގަޑިއެއްގެ ގޮތުގައި މިނިސްޓްރީން ކަނޑައަޅާފައިވަނީ ޖޫން 5، ގެ މެންދުރު 1:00 އެވެ. ބިޑު ހުށަހަޅާ ފަރާތްތަކުގެ ރިސޯޓު ތަރައްގީ ކުރުމަށް ފަޅުގެ ސަރަހައްދު ދޫކުރާ ފަރާތެއް ކަނޑައަޅާނީ އިންވެސްޓްމަންޓު އިވެލުއޭޓްކުރުމަށްފަހު ދޭ ޕޮއިންޓުތަކަށް ބިނާކޮށެވެ.
އިންވެސްޓަރުން ހޮވުމުގައި މިނިސްޓްރީން އެންމެ ބޮޑަށް ބަލަނީ ބިޑު ކުރާ އަގަށެވެ. އޭގެއިތުރުން، އިންވެސްޓަރުން ތިމާވެށްޓާ ރަށްޓެހި ތަރައްގީއަށާއި އިޖުތިމާއީ ތަރައްގީގެ އިތުރުން ސީއެސްއާރަށް ދޭ އަހަންމިއްޔަތު ކަމަށް މިނިސްޓްރީން ބަލާނެ އެވެ.
ކެލާގެ ފަޅު ތެރޭ ފަތުރުވެރިކަމުގެ ދާއިރާގެ ފެސިލިޓީއެއް ތަރައްގީ ކުރުމަކީ ރައީސް މުއިއްޒުގެ ރިޔާސީ ވައުދެކެވެ. އެ މަޝްރޫއުގެ ސަބަބުން ކެލާގެ ރައްޔިތުންނަށް، ހާއްސަކޮށް އެ ރަށުގެ ޒުވާނުންނަށް ވަޒީފާގެ ފުރުސަތުތައް އިތުރުވެގެންދާނެ ކަމަށްވެސް ރައީސް މުއިއްޒު، ރިޔާސީ ކެމްޕޭނުގައި ފާހަގަކުރެއްވި އެވެ.
