ރާއްޖެ އާއި ރާއްޖެއިން ބޭރުން ތައުލީމާއި ތަމްރީނު ހާސިލު ކުރުމަށް ކޮންމެ އަހަރަކު ވެސް ކުރިއަށް ގެންދާ ސްޓޫޑެންޓް ލޯނު ސްކީމުގެ ދަށުން މި އަހަރުގެ ފުރުސަތު ހުޅުވާލައިފި އެވެ.
ހަޔާ އެޑިއުކޭޝަން މިނިސްޓްރީން މިއަދު ގެޒެޓުކުރި އިއުލާނެއްގައި ބުނީ މި އަހަރު ދޭން ހަމަޖެހިފައިވަނީ ލޯނުގެ 500 ފުރުސަތު ކަމަށެވެ. ލޯނަށް އެދި ހުށަހެޅުމުގެ ސުންގަޑިއަކީ އެޕްރީލް 30، ގެ މެންދުރުފަހު 1:30 އެވެ.
މި ފުރުސަތުގެ ދަށުން އަލަށް ކިޔަވަން ފަށާ ފަރާތްތަކަށް އަދި މިހާރު ކިޔަވަމުންދާ ފަރާތްތަކަށްވެސް ލޯނަށް އެދި ހުށަހެޅޭނެ އެވެ.
މީގެއިތުރުން، ސަރުކާރުން ދޫކުރާ ލޯނުގެ ދަށުން ކިޔަވަމުންދާ ދަރިވަރުން އިތުރަށް ޓޮޕް އަޕް ނަގަން ބޭނުންވާނަމަ އެކަމަށްވެސް މި އިއުލާނުގެ ދަށުން ހުށަހެޅޭނެ އެވެ. ޓޮޕް އަޕް ދޫކުރާ އެންމެ މަތީ އަދަދަކީ 700،000ރ. އެވެ.
ސްޓޫޑަންޓު ލޯނަށް ހުޅުވާލާފައި މިވަނީ އެކަން ލަސްވެ، އެކަމާ ގުޅޭގޮތުން ގިނަ ބަޔަކު ދަނީ ކަންބޮޑުވުން ފާޅުކުރަމުން ދަނިކޮށެވެ. އެގޮތުން ރާއްޖެއިން ހައި ސްކޫލް ނިންމާ މަތީ ތައުލީމަށް ބޭރަށް ނުފުރި ތިބި ކުދިންނާއި އެ ކުދިންގެ އާއިލާތަކުންވެސް ދަނީ އެ މީހުންގެ ޝުއޫރުތައް ހާމަކޮށްފައިވެ އެވެ.
ސްޓޫޑެންޓު ލޯން ސްކީމުގެ ދަށުން މިދިޔަ އަހަރުވެސް ސަރުކާރުން ފުރަތަމަ އިއުލާނުކުރީ 500 ލޯނު ދިނުމަށެވެ. ނަމަވެސް، ޝަރުތު ހަމަވާ ހުރިހާ ފަރާތްތަކަށް ލޯނު ދޭން ސަރުކާރުން ފަހުން ނިންމި އެވެ.
މި ނިންމުމާ އެއްގޮތަށް ދަރިވަރުން އެޕްލިކޭޝަން ހުށަހެޅި 1،709 ދަރިވަރުންގެ ތެރެއިން ލޯނު ދޭން ނިންމީ 1،153 ދަރިވަރުންނަށެވެ. ޝަރުތުހަމަވި ނަމަވެސް ލޯނު ނުދޭން ނިންމީ ހަމައެކަނި ޕައިލެޓުކަން ކިޔަވަން ހުށަހެޅި ބައެއް ދަރިވަރުންނަށެވެ.
ޕައިލެޓު ލައިސަންސް ސްލޮޓަށް ޝަރުތު ހަމަވި 148 ދަރިވަރުންގެ ތެރެއިން ލޯނު ދޭން ސަރުކާރުން ނިންމީ 10 ދަރިވަރުންނަށެވެ.
