ހއ. ކެލާގެ ފަޅު ތެރޭ ދެ ރިސޯޓު ތަރައްގީކުރަން ނިންމާ އެކަމަށް މަގުފަހިކުރުމުގެ ގޮތުން ރަށުގެ އިހުތިސާސުން ބައެއް އުނިކުރަން ރައީސް ޑރ. މުހައްމަދު މުއިއްޒު ނިންމަވައިފި އެވެ.
މިއަދު ނެރުއްވި ގަރާރަކުން ކެލާގެ އިހުތިސާސުގެ ތެރެއިން އުނިކޮށްފައިވަނީ އެ ރަށުގެ ފަޅުތެރެއިން ޖުމުލަ 325.5 ހެކްޓަރުގެ ސަރަހައްދެކެވެ. މިތަނުގައި ތަރައްގީކުރާ ދެ ރިސޯޓާ ގުޅޭ އިތުރު ތަފުސީލެއް ސަރުކާރުން ހާމައެއް ނުކުރެ އެވެ.
ރައީސް މުއިއްޒު މި ގަރާރު ނެރުއްވީ ލާމަރުކަޒީ ގާނޫނުގެ ދަށުން ރަށު ކައުންސިލްތަކާއި ސިޓީ ކައުންސިލްތަކުގެ އިހުތިސާސު ކަނޑައެޅުމަށް އެމަނިކުފާނަށް ލިބިވަޑައިގަންނަވާ ބާރުގެ ދަށުންނެވެ. މި ނިންމެވުމުގެ ކުރިން މިއަދު ހެދުނު ރައީސް އޮފީހުގައި އިކޮނޮމިކް ކައުންސިލްގެ ބައްދަލުވުމެއް ކުރިއަށް ގެންދިޔަ އެވެ.
ކެލާގެ ފަޅުތެރޭ ދެ ރިސޯޓު ތަރައްގީ ކުރުމަށް އެ ރަށުގެ އިހުތިސޯސަށް ގެނައި ބަދަލު ---
ކެލާގެ ފަޅު ތެރޭ ފަތުރުވެރިކަމުގެ ދާއިރާގެ ފެސިލިޓީއެއް ތަރައްގީ ކުރުމަކީ ރައީސް މުއިއްޒުގެ ރިޔާސީ ވައުދެކެވެ. އޭރު އިތުރު ތަފުސީލު ނުދެއްވި ނަމަވެސް ރިޔާސީ ކެމްޕޭނުގައި ކެލާގައި ހުންނަވާ ރައީސް ވަނީ އެ ރަށުގެ ފަޅު ތެރޭ ރިސޯޓު ތަރައްގީ ކުރައްވާނެ ކަމުގެ ވައުދުވެވަޑައިގެންފަ އެވެ.
އަދި، އެ މަޝްރޫއުގެ ސަބަބުން ކެލާގެ ރައްޔިތުންނަށް، ހާއްސަކޮށް އެ ރަށުގެ ޒުވާނުންނަށް ވަޒީފާގެ ފުރުސަތުތައް އިތުރުވެގެންދާނެ ކަމަށްވެސް ރައީސް މުއިއްޒު، ރިޔާސީ ކެމްޕޭނުގައި ފާހަގަކުރެއްވި އެވެ.
ލާމަރުކަޒީ ގާނޫނުގައިވާ ގޮތުން އިދާރީ ދާއިރާއެއްގެ އިހުތިސޯސުގައި ހިމެނޭ ފަޅުރަށެއްގައި ނުވަ ފަޅެއްގެ ސަރަހައްދެއްގައި ޓޫރިޒަމްގެ ވިޔަފާރި ކުރަން ދޫކުރާ ހިސާބުން އެ ސަރަހައްދެއް، ކުރިން އިހުތިސޯސް އޮތް ރަށު އިހުތިސޯސުން ވަކިވާނެ އެވެ.
