އިކޮނޮމިކް މިނިސްޓްރީގެ ދަށުން މަސައްކަތް ކުރާ ރެޖިސްޓްރާ އޮފް ކޮމްޕެނީސްގެ މަގާމަށް މަރިޔަމް ޝައްމަ އިސްމާއިލް އައްޔަނުކޮށްފި އެވެ.
އިކޮނޮމިކް މިނިސްޓްރީން ސޯޝަލްމީޑިއާގައި ކުރި ޕޯސްޓެއްގައި ވަނީ އެ މަގާމަށް އޭނާ އައްޔަނު ކުރުމަށްފަހު މަރުހަބާ ކިޔައިފަ އެވެ.
ގާނޫނީ ދާއިރާއިން ބެޗެލާސް ޑިގްރީ ހާސިލު ކުރައްވައިގެން ހުންނެވި ޝައްމަ މީގެ ކުރިން ވަނީ ސުޕްރީމް ކޯޓުގެ ރެޖިސްޓްރާ ކަމާއި ހިއުމަން ރައިޓްސް ކޮމިޝަނުގެ ޑިރެކްޓާ އޮފް ލީގަލް އެންޑް ޕޮލިސީ އެފެއާސްގެ މަގާމުގެ އިތުރުން އިކޮނޮމިކް މިނިސްޓްރީގެ ލީގަލް ކޮންސަލްޓެންޓުގަ މަގާމު ފުރައިފަ އެވެ.
ޝައްމަ އެންމެ ފަހުން ފުރުއްވީ ކޮންޒިއުމާ އޮމްބަޑްސްމަންގެ މަގާމެވެ. އެ މަގާމަށް ޝައްމަ އައްޔަނު ކުރީ މިދިޔަ ސަރުކާރުންނެވެ.
ރެޖިސްޓްރާ އޮފް ކޮމްޕެނީސްގެ މަގާމު ހުސްވީ 10 އަހަރަށްވުރެ ގިނަ ދުވަހު ހިދުމަތް ކުރުމަށްފަހު އެ މަގާމުގައި ހުންނެވި މަރިޔަމް ވިސާމް މިދިޔަ ބުދަ ދުވަހު އިސްތިއުފާ ދެއްވުމުންނެވެ.
އޭނާ އެ މަގާމުން އިސްތިއުފާ ދެއްވި ސަބަބެއް ހާމައެއް ނުކުރައްވަ އެވެ. ރެޖިސްޓްރާ އޮފް ކޮމްޕެނީސްގެ މަގާމަށް ވިސާމް އައްޔަނުކުރީ ކުރީގެ ރައީސް، އަބްދުﷲ ޔާމީންގެ ވެރިކަމުގަ އެވެ.
