ސިޔާސީ ޕާޓީތަކަށް, ރައްޔިތުންގެ މަޖިލީހުގެ މެންބަރުންގެ ގޮނޑި ގެއްލުވައިލެވޭ ގޮތަށް ގާނޫނުއަސާސީއަށް ގެނައި އިސްލާހު ބާތިލު ކުރަން ހުށަހަޅާފައިވާ މައްސަލަ ސުޕްރީމް ކޯޓުން ބަލަމުންދަނިކޮށް، އެ ކޯޓުގެ ދެ ފަނޑިޔާރަކު ވަކި ކުރަން ހުށަހަޅާފައި އޮތް ބިލާ ދެކޮޅަށް މަޖިލީހުގެ ތަޅުމުގައި އިހުތިޖާޖު ކުރަމުންދާ އެމްޑީޕީގެ މެންބަރުންގެ ނަންތައް ގަނޑުކޮށް އިއްވުމަށް ފަހު އެ ބިލު ފާސްކުރަން މަޖިލީހުން ތައްޔާރުވެއްޖެ އެވެ.
ގަޑިއިރެއް ތެރޭ ޖުޑީޝަރީ ކޮމިޓީން ބިލު ދިރާސާކޮށް ނިންމައި، ކޮމިޓީ ރިޕޯޓު މެންބަރުންނަށް ވަނީ ފޮނުވާފަ އެވެ. މިއަދު ކޮމިޓީ ރިޕޯޓަށް ބަހުސް ކުރަމުންދާއިރު އެމްޑީޕީގެ މެންބަރުން ދަނީ މިއީ ޖުޑީޝަރީއަށް ނުފޫޒު ފޯރުވުމަށް ސަރުކާރުން ފާސްކުރާ ބިލެއް ކަމަށް ބުނެ ކަންބޮޑުވުން ފާޅުކުރަމުންނެވެ.
މެންބަރުން އެންމެ ބޮޑަށް މައްސަލަ ޖެއްސީ ބިލާމެދު ރައްޔިތުންގެ މަޖިލީހުގެ ކައުންސެލް ޖެނެރަލް ފާތިމަތު ފިލްޒާ ފާޅުކުރައްވާފައިވާ ކަންބޮޑުވުންތަކާއި އުފައްދަވާފައިވާ ސުވާލުތަކާ ބެހޭގޮތުން ރައްޔިތުންގެ މަޖިލީހުގެ ތަޅުމުން ގޮތެއް ނިންމުމަށް ވޯޓަށް ނޭހުމަށް ރިޔާސަތުން ނިންމުމުންނެވެ. އިއްޔެގެ ކޮމިޓީގައި ނިންމީ ތަޅުމުން ފިލްޒާގެ ލަފަޔަށް ގޮތެއް ނިންމުމަށެވެ.
އެންމެ ފުރަތަމަ އިއްވީ ވައިކަރަދޫ ދާއިރާގެ މެންބަރު ހުސައިން ޒިޔާދުގެ ނަމަވެ. އެއަށްފަހު ކެންދޫ ދާއިރާގެ މެންބަރު މައުރޫފް ޒާކިރުގެ ނަމާއި ގަލޮޅު ދެކުނު ދާއިރާގެ މެންބަރު މީކާއިލް ނަސީމްގެ ނަން ވަނީ އިއްވާފަ އެވެ.
