ރައްޔިތުންގެ މަޖިލީހުގެ މެންބަރުންނަށާއި އެ ބޭފުޅުންގެ އާއިލާ ބޭފުޅުންނަށް ރާއްޖެއިން ބޭރުން ބޭސްފަރުވާ ކުރުމުގައި ތަކުލީފުތަކެއް އުފުލަންޖެހޭ ކަމަށާއި އެ ކުރާ ހަރަދު އަނބުރާ ހޯދުމުގައި ވެސް ދަތިތަކެއް ކުރިމަތިވާ ކަމަށް ބުނެ ބައެއް މެންބަރުން ކަންބޮޑުވުން ފާޅުކޮށްފި އެވެ.
މެންބަރުން ކަންބޮޑުވުން ފާޅު ކުރެއްވީ ރައްޔިތުންގެ މަޖިލީހުގެ މިހާރުގެ މެންބަރުންނާއި މެންބަރުކަން ކޮށްފައިވާ ބޭފުޅުންގެ އިތުރުން އެ ބޭބޭފުޅުންގެ އައިލާތަކަށް ރާއްޖެއިން ބޭރުން ހިލޭ ބޭސްފަރުވާ ކުރެވޭ ގޮތަށް އޮންނަ އިންތިޒާމާ ގުޅޭ ގޮތުން މަޖިލީހުގެ އާންމު ކޮމިޓީއަށް ފޮނުވާފައި އޮތް ސިޓީއަކާ ބެހޭ ގޮތުން ވާހަކަ ދައްކަވަމުންނެވެ.
އެ މަޝްވަރާގައި ބައިވެރިވެވަޑައިގެން ގިނަ މެންބަރުން ވާހަކަ ދެއްކެވީ މައިކު ނުޖައްސައި އަޑު ކަނޑާލައިގެންނެވެ. ނަމަވެސް މެންބަރުންނަށް ލިބޭ ބޭސްފަރުވާގެ އިމްތިޔާޒު އެންމެ ފުރިހަމަ ގޮތުގައި ނުލިބޭ ކަމަށް ވިދާޅުވެ އެންމެ ފުރަތަމަ ކަންބޮޑުވުން ފާޅު ކުރެއްވީ ފޭދޫ ދެކުނު ދާއިރާގެ ޕީއެންސީ މެންބަރު، އިބްރާހިމް ދީދީ އެވެ. ނަމަވެސް އޭނާ ވާހަކަދެއްކެވީ މައިކު ކަނޑާލައިގެން ކަމަށް ވާތީ ދެއްކެވި ވާހަކައިގެ ތަފުސީލެއް ނޭނގެ އެވެ.
އިބްރާހިމް ދީދީގެ ވާހަކައަށްފަހު އެ ދެއްކެވި ވާހަކައަށް ތާއީދު ކުރައްވައި ތިމަރަފުށީ ދާއިރާގެ ޕީއެންސީ މެންބަރު، އަހުމަދު ރިޔާޒު ވިދާޅުވީ މަޖިލީހުގެ މެންބަރުންގެ އާއިލާތަކަށާއި އެ މެންބަރުންނަށް ރާއްޖެއިން ބޭރުން ބޭސްފަރުވާ ކުރުމަށް ވަރަށް ބޮޑު ހަރަދެއް ކުރާ ކަމަށެވެ. އެހެންކަމުން ރާއްޖެއިން ބޭރުން ބޭސްފަރުވާ ކުރުމުގައި މަޖިލިސް މެންބަރުންނަށާއި އެ ބޭފުޅުންގެ އާއިލާތަކަށް ތަކުލީފެއް އުފުއްލަވަން ޖެހިވަޑައިގެން ނުވާނެ ކަމަށް އޭނާ ވިދާޅުވި އެވެ.
"އަޅުގަނޑު ދާދިފަހުން ހިނގައްޖައިމު ހަމަ ޑޮކްޓަރަށް ދައްކަން، ދިޔައިރު، އެލައިޑް އިންޝުއަރެންސުން އެ ބޭފުޅުންގެ ލެޓާއެއް [ސިޓީއެއް] ވެސް ހިފައިގެން ދިޔައީ އެހެންނަމަވެސް ކަން ދިމާ މިވާގޮތަކީ އަޅުގަނޑުމެންނަށް ވަކި ޑޮކްޓަރަކަށް މި ދެއްކުނީ އެ ލެޓާ ބޭނުން ކޮށްގެން، ދެން އެހެން ޑޮކްޓަރަކަށް ދައްކަން މި ޖެހުނީ އަޅުގަނޑުމެން އަމިއްލައަށް ރީއެމްބާސް ކުރާގޮތަށް، އަޅުގަނޑުމެން ސީދާ ހަމަ ޕޭ ކުރަން ޖެހުނު، އެހެންވީމާ އެއީ ހަގީގަތުގައި އެކަން ވެގެން ވާނެ ގޮތެއް ނޫން،" ރިޔާޒު ވިދާޅުވި އެވެ.
އޭނާ ވިދާޅުވީ ރާއްޖެއިން ބޭރުން ބޭސްފަރުވާ ކުރުމުގެ އިންތިޒާމު ވަކި ގޮތަކަށް ހަމަޖެހިގެން އެކޮޅަށް ދިޔުމުން އިތުރު ތަކުލީފެއް އުފުލަން ޖެހި، މާލެ އައިސް ފޯމު ހުށަހަޅައި އެތައް ވަގުތެއް އެކަމަށް ހޭދަ ކުރަން ޖެހުމަކީ އޮންނަންޖެހޭ ގޮތެއް ނޫން ކަމަށެވެ.
މިސާލު ދައްކަވަމުން ރިޔާޒު ވިދާޅުވީ މިފަހުން އިންޑިއާއަށް ކުރެއްވި ދަތުރެއްގައި ބޭސްފަރުވާއަށް ކުރި ހަރަދު އަނބުރާ ހޯދުމަށް އެލައިޑް އިންޝުއަރެންސަށް ލިޔުންތައް ހުށަހެޅުމުން އެ ތަނުން ރީއިންބާސް ކޮށްދިނުމުގެ ބަދަލުގައި އެ ލިޔެކިޔުންތައް ރިޖެކްޓު ކޮށްލި ކަމަށެވެ.
"އިންޑިއާއަށް އަޅުގަނޑު ކުރި ދަތުރެއްގައި އަޅުގަނޑު އަންހެނުންނާއި އަޅުގަނޑުގެ މެޑިކަލް ހުރިހާ އެއްޗެއް ހުށަހެޅިން، ހުށަހެޅީމާ ރިޖެކްޓު ކޮށްލީ އަޅުގަނޑު އެ ބޭފުޅުންނަށް ވަޓްސްއެޕް ކޮށްލިން އަޅުގަނޑަކީ މިއީ މެންބަރެކޭ، އަޅުގަނޑުމެން މިހެން ހުށަހަޅާ އެއްޗެހި ރިޖެކްޓެއް ތިބޭފުޅުންނަކަށް ނުކުރެވޭނެޔޭ، އިނގޭތޯ؟ ކޮށްގެން ނުވާނެޔޭ،" ރިޔާޒު ވިދާޅުވި އެވެ.
"އަޅުގަނޑުމެން ވަރަށް ބޮޑު ހަރަދުކޮށްފައި އައީ، އެކަމަކު ލިބުނީ 3000ރ.، އިނގޭތޯ؟ އެހެންވީމާ މިގޮތަށް މި ކަންކަން ހިނގައިގެން ނުވާނެ."
މަޖިލިސް މެންބަރުންނަށް ލިބޭ ބޭސްފަރުވާގެ އިންޝުއަރެންސާ މެދު ބައެއް މެންބަރުން ކަންބޮޑުވުން ފާޅުކުރިއިރު، މެންބަރުންގެ މުސާރައިގެ ގޮތުގައި މަހަކު 82،000ރ. ލިބެ އެވެ. އޭގެއިތުރުން މަޖިލިސް މެންބަރުންނާއި އެ ބޭފުޅުންގެ އަނބިންނާއި 18 އަހަރު ނުފުރޭ ކުދިންނަށް މެޑިކަލް އިންޝުއަރެންސުގެ ގޮތުގައި އަހަރަކު 24،000ރ. ލިބެ އެވެ.
