މިދިޔަ މަހު މީރާއިިން ބަލައިގަތް އާމްދަނީ 2023 އަށް ވުރެ ވެސް ދަށް

Feb 12, 2025, 4:13 AM
މީރާގެ މައި އިދާރާ ހުންނަ ފިނޭންސް އިމާރާތް: އާމްދަނީ ދަށްވީ ބޭންކުތަކާއި ވިޔަފާރިތަކުގެ ޓެކްސް ދަށްވުމުން ކަމަށް މީރާއިން ބުނި -- ފޮޓޯ: ހުސެއިން ޝަޔާހު/އަދަދު

މީރާގެ މައި އިދާރާ ހުންނަ ފިނޭންސް އިމާރާތް: އާމްދަނީ ދަށްވީ ބޭންކުތަކާއި ވިޔަފާރިތަކުގެ ޓެކްސް ދަށްވުމުން ކަމަށް މީރާއިން ބުނި -- ފޮޓޯ: ހުސެއިން ޝަޔާހު/އަދަދު

އަންދާޒާ ކުރި ވަރަށް ވުރެ ފަސް ޕަސެންޓު މަތިން އާމްދަނީ ލިބުނު ނަމަވެސް ޓެކްސް އިދާރާ, މީރާއިން މިދިޔަ މަހުގެ ތެރޭގައި ބަލައިގަތް އާމްދަނީ ކުރީ ދެ އަހަރަށް ވުރެ ވެސް ދަށް ވެއްޖެ އެވެ.

މީރާއިން އާންމުކޮށްފައިވާ މި އަހަރުގެ ފުރަތަމަ މަންތުލީ ރެވެނިއު ރިޕޯޓުގައިވާ ގޮތުގައި, މިދިޔަ މަހު 3.3 ބިލިއަން ރުފިޔާ ބަލައިގެންފައިވެ އެވެ. މި ފައިސާގެ ގާތްގަނޑަކަށް 48 ޕަސެންޓަކީ މުދަލާއި ހިދުމަތުގެ ޓެކްސް (ޖީއެސްޓީ) އިން ލިބުނު އާމްދަނީ އެވެ.

މިދިޔަ އަހަރުގެ ޖެނުއަރީގައި ލިބުނު އަދަދަށް ވުރެ މިދިޔަ މަހު ލިބުނު އާމްދަނީ ދަށްވީ ސަބަބެއް ކަމަށް މީރާއިން ބުނެފައި ވަނީ, ބޭންކުތަކުގެ އާމްދަނީން ނަގާ ޓެކުހާއި ވިޔަފާރިތަކުގެ އާމްދަނީން ލިބުނު ޓެކްސް ދަށްވުމެވެ.

Advertisement

ވިޔަފާރިތަކުގެ އާމްދަނީން ނަގާ ޓެކްސް (ކޯޕަރޭޓް އިންކަމް ޓެކްސް) އާމްދަނީ ދަށަށް ދިޔަ ސަބަބެއްގެ ގޮތުގައި މީރާއިން ފާހަަގަކުރީ, އެ ފައިސާ ދައްކަން ޖެހޭ ސުންގަޑިއަކީ ސަރުކާރު ބަންދު ދުވަހަކަށް ވުމުން, ޓެކްސް ދައްކަން ޖެހޭ ތާރީހު މި މަހުގެ ދެ ވަނަ ދުވަހަށް ފަސް ކުރުމެވެ.

މީރާއިން ބަލައިގަތް އާމްދަނީގެ އުސްއަލިތައް

  • ޓެކްސް އާމްދަނީ - ތިން ބިލިއަން ރުފިޔާ
  • ޓެކްސް ނޫން އާމްދަނީ - 324 މިލިއަން ރުފިޔާ
  • ޑޮލަރުން ލިބުނު އާމްދަނީ - 125 މިލިއަން ޑޮލަރު
  • ޓީޖީއެސްޓީ - އެއް ބިލިއަން ރުފިޔާ
  • ޖީޖީއެސްޓީ - 530 މިލިއަން ރުފިޔާ
  • އިންކަމް ޓެކްސް - 1.1 ބިލިއަން ރުފިޔާ

ޖުމްލަ އާމްދަނީ ދަށަށް ދިޔަ ނަމަވެސް, އާމްދަނީގެ ބޮޑު ބަޔެއް ހިއްސާކުރާ މުދަލާއި ހިދުމަތުގެ ޓެކުހާއި އާމްދަނީން ނަގާ ޓެކްސްއިން ލިބުނު ފައިސާ ވަނީ އިތުރުވެފަ އެވެ. އަދި ޑޮލަރުން ލިބުނު އާމްދަނީ ވެސް ވަނީ މިދިޔަ އަހަރަށް ވުރެ އިތުރުވެފަ އެވެ.

ޑޮލަރުން ލިބުނު އާމްދަނީގެ ދެ ބައި ކުޅަ އެއް ބަޔަށް ވުރެ ބޮޑު އަދަދަކީ, ޓޫރިޒަމް ދާއިރާގެ މުދަލާއި ހިދުމަތުގެ ޓެކްސް (ޓީޖިއެސްޓީ) އެވެ. ދެން އެންމެ ބޮޑު އަދަދެއް ލިބުނީ އާމްދަނީން ނަގާ ޓެކްސްއިންނެވެ.

ޓެކްސް ނޫން އާމްދަނީގެ އެންމެ ބޮޑު އަދަދެއް ހިއްސާކުރަނީ އެއާޕޯޓު ޑިވެލޮޕްމަންޓް ފީ އެވެ. މިދިޔަ އަހަރުގެ ތެރޭގައި މި ފީ ނަގާ ރޭޓުތަކަށް ބަދަލު ގެނެސްފައި ވާތީ އޭގެ ކުރީ އަހަރަށް ވުރެ ލިބުނު އަދަދު ވެސް އިތުރެވެ.

ކޮމެންޓް

ފަހުގެ ޚަބަރު

ސިމްޑީގެ ވިޔަފާރި ހާދާލަށް ފުޅާކުރަނީ

ސިމްޑީ ގްރޫޕްގެ ވިޔަފާރި ހދ. އަތޮޅުގައި ފުޅާކުރުމަށްޓަކައި ކުޅުދުއްފުށީގެ "މިތުރު" ކުންފުންޏާއެކު ސަބް-ޑިސްޓްރިބިއުޝަން އެއްބަސްވުމެއްގައި މިއަދު ވަނީ ސޮއިކޮށްފައެވެ. މި ޕާޓްނަޝިޕްގެ ސަބަބުން ސިމްޑީން އެތެރެކުރާ ބައިނަލްއަގުވާމީ މަގުބޫލު ބްރޭންޑްތަކުގެ މުދާ އެ އަތޮޅުގެ ރީޓެއިލް ފިހާރަތަކަށާއި އާންމުންނަށް ފަސޭހަކަމާއެކު ލިބޭނެ އިންތިޒާމު ހަމަޖެހިގެންދާނެއެވެ.

ވިލާ ކޮލެޖާއި މާރޕް ގުޅިގެން މެންޓަރޝިޕް ޕްރޮގްރާމެއް

ވިލާ ކޮލެޖާއި މާރޕް ގުޅިގެން ވަޒީފާ އަދާކުރާ ފަރާތްތަކަށް ޚާއްޞަ މެންޓަރޝިޕް ޕްރޮގްރާމެއް ފަށާފައިވަނީ ދިވެހި ލީޑަރުން ބިނާކޮށް ސީނިއަރ މެނޭޖްމަންޓް މަޤާމުތަކަށް މީހުން ތައްޔާރުކުރުމަށެވެ. މި ޕްރޮގްރާމުގެ ދަށުން ތަޖުރިބާކާރުންގެ އެހީތެރިކަމާއެކު ގްރެޖުއޭޓުންނަށް ޢަމަލީ ހުނަރުތައް ދަސްކޮށްދީ، މަތީ ތަޢުލީމާއި އިންޑަސްޓްރީއާ ދެމެދު އޮތް ގުޅުން ވަރުގަދަކުރުމަށް ވަނީ އަމާޒު ހިފާފައެވެ.

ޓްރީ ޓޮޕް ހިތާނީ ކޭމްޕުގެ ރަޖިސްޓްރޭޝަން ހުޅުވާލައިފި

ޓްރީ ޓޮޕް ހޮސްޕިޓަލުގެ މިއަހަރުގެ ފުރަތަމަ ހިތާނީ ކޭމްޕުގައި ބައިވެރިވުމަށް ރަޖިސްޓަރީވުމުގެ ފުރުސަތު ޑިސެމްބަރު 17 ގެ ނިޔަލަށް ވަނީ ހުޅުވާލާފައެވެ. ތަޖުރިބާކާރު ޑޮކްޓަރުންގެ ޓީމަކުން ކުރިއަށްގެންދާ މި ކޭމްޕުގެ ހިތާނުކުރުމުގެ އޮޕަރޭޝަންތައް ކުރިއަށްދާނީ ޑިސެމްބަރު 12 އިން ޖެނުއަރީ 11 ގެ ނިޔަލަށެވެ. މި ޕެކޭޖުގެ ދަށުން ކޮންސަލްޓޭޝަނާއި، ލެބޯޓަރީ ޓެސްޓުތަކުގެ އިތުރުން އޮޕަރޭޝަނަށްފަހު ބޭނުންވާ ފަރުވާގެ ހިދުމަތްތައް ލިބިގެންދާނެއެވެ.

ޓޯޓަލް ފިޒިއޯއިން އެލައިޑްގެ ހިދުމަތް ގަބޫލުކުރަން ފަށައިފި

ފިޒިއޮތެރަޕީގެ ޚިދުމަތްދޭ "ޓޯޓަލް ފިޒިއޯ" ކްލިނިކުން ބަލިމީހުންނަށް ލުއިފަސޭހަކޮށްދިނުމުގެ ގޮތުން އެލައިޑް އިންޝުއަރެންސް ގަބޫލުކުރަން ފަށައިފިއެވެ. ޒަމާނީ ވަސީލަތްތަކާއެކު ފަރުވާދޭ މި ކްލިނިކުން މިހާރުވެސް ޕޮލިސް، އެމްއެންޑީއެފް އަދި ސޮލަރެލް އިންޝުއަރެންސްގެ ޚިދުމަތް ލިބޭއިރު، އިތުރު އިންޝުއަރެންސްތައް މެދުވެރިކޮށް ޚިދުމަތް ލިބޭނެ އިންތިޒާމު ހަމަޖެއްސުމަށް ދަނީ މަސައްކަތް ކުރަމުންނެވެ.

ލަކްސް ގްލޯގެ ދެވަނަ ފިހާރަ މަޖީދީމަގުގައި ހުޅުވައިފި

މަޝްހޫރު ކޮސްމެޓިކްސް ބްރޭންޑް "ލަކްސް ގްލޯ" ގެ ދެވަނަ ފިހާރަ މާލޭގެ މަޖީދީމަގުގައި ހުޅުވައިފިއެވެ. މި ފިހާރައިން ބައިނަލްއަގުވާމީ ބްރޭންޑްތަކުގެ ސްކިންކެއާ އަދި މޭކަޕް ސާމާނު ޓެސްޓުކޮށްލުމާއި، ފަންނީ ލަފާ ހޯދައިގެން ވަގުތުން ގަނެވޭނެ އިންތިޒާމު ވަނީ ހަމަޖެހިފައެވެ. ފިހާރަތަކުގެ އިތުރުން އެ ބްރޭންޑުގެ ވެބްސައިޓް މެދުވެރިކޮށް އޮންލައިންކޮށް އޯޑަރުކުރުމުގެ ފުރުސަތުވެސް ކަސްޓަމަރުންނަށް ވަނީ ހުޅުވާލެވިފައެވެ.

ކްލީވިއާ ރެސިޑެންސް: ޒަމާނީ ބޯހިޔާވަހިކަން އާ މަޝްރޫއެއް

ޕޭން ރިއަލް އެސްޓޭޓުން އަލަށް ތައާރަފްކުރި "ކްލީވިއާ ރެސިޑެންސް" މަޝްރޫއަކީ މެދުފަންތީގެ އާމްދަނީ ލިބޭ ފަރާތްތަކަށް އަމާޒުކޮށްގެން ހިންގާ އަތްފޯރާ އަގުތަކެއްގެ ބޯހިޔާވަހިކަމުގެ މަޝްރޫއެކެވެ. މި މަޝްރޫއުގެ ދަށުން ޒަމާނީ ފެންވަރުގެ އެއް ކޮޓަރި އަދި ދެ ކޮޓަރީގެ އެޕާޓްމަންޓްތައް ލިބޭއިރު، ފައިސާ ދެއްކުމުގައި ލުއި ގޮތްތަކެއް ވަނީ ހަމަޖައްސާފައެވެ.

ދިރާގު ރޯޑް ރޭސްގެ ބިބް އެކްސްޕޯ ބުދަ ދުވަހާ ހަމައަށް

ދިރާގު މޯލްޑިވްސް ރޯޑް ރޭސް 2026 ގެ ބިބް އެކްސްޕޯ ބީޖީ ޓާފް ދަނޑުގައި ކުރިއަށްދާއިރު، ބިބް އާއި ރޭސް ކިޓް ދޫކުރުމުގެ މުއްދަތު މި މަހުގެ 18 ވާ ބުދަ ދުވަހުގެ ނިޔަލަށް ވަނީ އިތުރުކޮށްފައެވެ. ފަސް ހާހަށްވުރެ ގިނަ ދުވުންތެރިން ބައިވެރިވާ މި ދުވުން އޮންނާނީ ކުރިއަށް އޮތް ހުކުރު ދުވަހު ހުޅުމާލޭ ސެންޓްރަލް ޕާކުގައެވެ.

Newsletter

Get the latest news delivered straight to your inbox