ކުރީގެ ރައީސް އަބްދުﷲ ޔާމީންއަކީ ރަހުމަތްތެރިއެއް ކަމަށް ސައުދީ ކްރައުން ޕްރިންސް މުހައްމަދު ބިން ސަލްމާން އަލް ސައުދު ވިދާޅުވި ކަމަށާއި ވެރިކަމުގައި ހުންނެވިއިރު ޔާމީންއަށް ކޮންމެ އަހަރަކު 20 މިލިއަން ޑޮލަރު ދެއްވި ކަމަށް ގާސިމް އިބްރާހިމްގެ ހަޔާތުނާމާގައި ހާމަ ކުރައްވައިފި އެވެ.
ޖުމްހޫރީ ޕާޓީގެ ލީޑަރު ގާސިމްގެ ހަޔާތުނާމާގައި ސިޔާސީ ބައެއް ކަންކަމުގެ ވާހަކަ ވަރަށް ތަފުސީލުކޮށް ވަނީ ލިޔެފަ އެވެ. އޭގެ ތެރެއިން އެއް ވާހަކައަކީ ރައީސް އިބްރާހިމް މުހައްމަދު ސޯލިހު 2018 ވަނަ އަހަރު އިންތިހާބުވުމަށްފަހު ސައުދީއަށް ކުރެއްވި ދަތުރުގެ ވާހަކަ އެވެ.
ސޯލިހު ސައުދީއަށް ވަޑައިގެންނެވީ ވެރިކަމުގެ ހުވާ ކުރެއްވުމުގެ ކުރިން ނޮވެމްބަރު 7، 2018، ގަ އެވެ. ގާސިމްގެ ހަޔާތުނާމާގައި ލިޔެފައި އޮތީ އެއީ ކްރައުން ޕްރިންސްގެ ދައުވަތަކަށް ކުރެއްވި ދަތުރެއް ކަމަށެވެ. އެ ދަތުރުގައި ގާސިމް ވެސް ވަޑައިގެންނެވި އެވެ.
"އެ ދަތުރުފުޅުގެ ތެރޭގައި ވަލީ އަހްދު މުހައްމަދު ވަރަށް ފުރިހަމަ ރޭގަނޑުގެ ފަރިއްކޮޅެއް ދެއްވި. އެފަރިއްކޮޅުގެ ތެރޭގައި ވާހަކަފުޅު ދައްކަވަމުން މުހައްމަދު ވިދާޅުވީ ޔާމީނަކީ ރައްޓެއްސެއްގެ ގޮތުގައި ބައްލަވާ ކަމާއި އެކަމަކު ސައުދީގެ ގުޅުން އޮންނަނީ ގައުމާ ކަމަށްވުމުން ވެރިކަމަށް އަންނަ ކޮންމެ މީހަކާ ވެސް ސައުދީން ގާތްކަން ބާއްވާނެ ކަމަށް،" ފޮތުގައި އޮތެވެ.
"[ޕްރިންސްއާއެކު ބޭއްވި] ވަން ޓު ވަން ބައްދަލު ކުރެއްވުމަށްފަހު ގާސިމް އަރިހުގައި ސޯލިހް ވިދާޅުވީ ރައީސް ޔާމީނަށް ކޮންމެ އަހަރަކު 20 މިލިޔަން ޑޮލަރ،ު ބަޖެޓްގެ ހަރަދުތަކުގެ ބޭރުން، ރައީސް އޮފީހުގެ މަސައްކަތްޕުޅަށް ދެއްވާކަމަށް ވަލީ އަހްދު ވިދާޅުވި ކަމަށް. އެއީ ބަޖެޓު ތެރެއަށް ނުވައްދައި ދެއްވަމުން ގެންދެވި އެހީއެއް،" ގާސިމްގެ ފޮތުގައި އޮތެވެ.
ހަމަ އެގޮތަށް ސޯލިހުގެ ސަރުކާރަށް ވެސް އަހަރަކު 20 މިލިއަން ޑޮލަރު ދެއްވާނެ ކަމަށް ޕްރިންސް ވިދާޅުވި އެވެ. ނަމަވެސް އެ އެހީ ދެއްވި ކަމެއް ގާސިމްގެ ފޮތަކުން ނޭނގެ އެވެ.
"އަޅުގަނޑުމެންގެ ސަރުކާރަށް ވެސް އެ އެހީ ދެއްވާނެތޯ ގާސިމް އެއްސެވުމުން ދެއްވާނެ ކަމަށް މުހައްމަދު ވިދާޅުވި ކަމަށް ވެސް ސޯލިހް ވިދާޅުވި،" ފޮތުގައި ލިޔެފައި އޮތެވެ.
ގާސިމްގެ ފޮތުގައި އޭނާ އެންމެ ފުރަތަމަ ވިޔަފާރި ފެށި ގޮތާއި އެ ވިޔަފާރިން ކުރި ފަޅައި ރާއްޖޭގެ އެންމެ ބޮޑު އެއް މަހުޖަނަށް އޭނާވީ ގޮތުގެ އިތުރުން ގައުމު ބިނާކުރުމަށް ގާސިމް ކުރެއްވި ހިދުމަތާއި، ލިބުނު ތަނަވަސް ކަމުން ހުޅުވައިލި ދީލަތިކަމާއި، ސިޔާސީ މައިދާނުގައި ނުފޫޒު ގަދަ މީހަކަށްވި ގޮތުގެ ވާހަކަ ވަރަށް ތަފުސީލުކޮށް ގެނެސްދީފައިވެ އެވެ.
ރާއްޖޭގެ ފުރަތަމަ ޖުމްހޫރިއްޔާގެ ރައީސް މުހައްމަދު އަމީން އާއި ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ހަޔާތުނާމާ ވެސް ލިޔުނު ތަޖުރިބާކާރު ނޫސްވެރިޔާ, މުހައްމަދު ޖަމީލް ލިޔެފައިވާ ގާސިމުގެ ހަޔާތުނާމާ މިރޭ ރަސްމީކޮށް ވަނީ ނެރެފަ އެވެ. މިއަދަކީ ގާސިމުގެ އުމުރުން 75 އަހަރު ފުރުނު ދުވަހެވެ.
އޭނާގެ ހަޔާތާއި ހިދުމަތާއި ވިޔަފާރިއާ ގުޅޭ ގޮތުން ކުރިން ކިޔައި ދީފައި ނެތް އެތައް ވާހަކައެއް މިރޭ ނެރުނު 700 އަށް ވުރެ ގިނަ ސަފުހާގެ "ގާސިމް އިބްރާހިމް - ލާމަސީލް ދިވެހި ދަރިއެއް" ފޮތުގައިވެ އެވެ. މި ފޮތުގައި ގާސިމު އާއި އޭނާގެ އާއިލާގެ މިހާތަނަށް އާންމުކޮށް ފެނިފައި ނެތް ފޮޓޯ ވެސް ހިމެނެ އެވެ.
މިފޮތާއެކު ގާސިމްގެ ހަޔާތުނާމާގެ ހާއްސަ ވެބްސައިޓު އާއި އޯޑިއޯ ބުކް ވެސް ވަނީ މިރޭ ނެރެފަ އެވެ. އަދި މާދަމާއިން ފެށިގެން ފޮތް ހިލޭ ބަހަން ވެސް ވަނީ ނިންމައިފަ އެވެ.
