ޓޫރިސްޓު ރިސޯޓުތަކާއި ހޮޓާތަކުގައި މަސައްކަތް ކުރާ މުވައްޒަފުންނަށް ތުނބުޅި ބެހެއްޓުމާއި ބުރުގާ އެޅުން ފަދަ ކަންކަން ކުރުމަށް މިހާރު ހުރި ހުރަސްތައް ނައްތާލަން ގޮވާލައި ގަރާރެއް ހުށަހެޅީ މަޖިލީހުގެ ވަގުތު ނަގާލަން ކަމަށާއި އެއީ މަޖިލީހަށް ނުވައްދާ ނިންމޭނެ މައްސަލައެއް ކަމަށް މައްޗަންގޮޅި އުތުރު ދާއިރާގެ އިބްރާހިމް މުހައްމަދު މިއަދު ވިދާޅުވެއްޖެ އެވެ.
އޭނާ ވިދާޅުވީ އެ މައްސަލައަކީ ކަމާ ގުޅުންހުރި ބޭފުޅުންނާއި ޓޫރިޒަމް މިނިސްޓްރީއާ އެކު މަޝްވަރާ ކޮށްގެން ހައްލު ކުރެވޭނެ މައްސަލައެއް ކަމަށެވެ. ނަމަވެސް މަޖިލީހަށް ގަރާރެއްގެ ގޮތުގައި އެކަން ހުށަހެޅީ މަޖިލީހުގެ ވަގުތު ނަގައިލަން ކަމަށް އިބްރާހިމް ވިދާޅުވި އެވެ.
"ހަގީގަތުގައި މިއީ މިނިސްޓްރީ އާއި ސްޓޭކް ހޯލްޑަރުން ގުޅިގެން ނިންމަވައިލެވެން އޮތް ކަމެއް، އަޅުގަނޑުމެން ވެސް އެދެނީ މުވައްޒަފުންނަށް އެމީހުންގެ ހައްގުތައް ރައްކާތެރިވެގެން ދިޔުން އެހެން ނަމަވެސް މަޖިލީހުގެ ވަގުތު ނަގާލައިގެން މަޖިލީހުގައި ޝަރީއަތްކޮށް މަޝްވަރާ ކުރަންޖެހޭ ކަމެއް ކަމަކަށް އަޅުގަނޑަކަށް ނުފެނޭ އިނގޭތޯ،" ޖަނާބު ވިދާޅުވި އެވެ.
ފަތުރުވެރިކަމުގެ ސިނާއަތުގައި މަސައްކަތް ކުރާ މުވައްޒަފުން ހެދުން އަޅަންޖެހޭ ގޮތުގައި އުސޫލެއް އެކުލަވައިލުމަށް ގޮވާލައި ހުށަހެޅި ގަރާރަށް ބަހުސް ކުރައްވަމުން އިބްރާހިމް މުހައްމަދު ވިދާޅުވީ އެމްޑީޕީއަކީ ތުނބުޅި މަތިމަސް ބެހެއްޓުމަށް ތާއީދު ކުރާ މީހުން އުޅޭ ޕާޓީއެއް ނޫން ކަމަށާއި އެ ޕާޓީން އެފަދަ ގަރާރެއް މަޖިލީހަށް ހުށަހެޅީ ކޮން ނިޔަތެއްގައިތޯ ސުވާލު އުފެދޭ ކަމަށެވެ.
"އަޅުގަނޑު ހަމަ ދަންނަވައިލަން ބޭނުންވަނީ އެމްޑީޕީގެ ގައުމީ މަޖިލީހުގައި ވެސް މި ތިއްބެވި 13 ބޭފުޅުންގެ ތެރެއިން ހަތް ބޭފުޅުންނަކީ ބުރުގާ ތުރު ނުކުރައްވާ ބޭފުޅުންނަށްވެފައި ބުރުގާ އާއި ތުނބުޅި މަތިމަސްއަށް ތާއީދު ނުކުރާ މީހުން ކޮންފަދަ ނިޔަތެއްގައިތޯ މަޖިލީހުގެ ވަގުތު ހުއްޓައިލަން ކޮންމެ ފަހަރަކު މި މީހުން މިކަހަލަ ވާހަކައެއް މި ގެންނަނީ،" އިބްރާހިމް ވިދާޅުވި އެވެ.
އިބްރާހިމް އެހެން ވިދާޅުވި ނަމަވެސް ސަރުކާރަށް ތާއީދު ކުރާ ގިނަ މެންބަރުން ވަނީ އެ ގަރާރަށް ތާއީދުކޮށް، އެފަދަ އުސޫލެއް އެކުލަވައިލަންޖެހޭ ކަމަށް މަޖިލީހުގައި މިއަދު ވިދާޅުވެފަ އެވެ.
މަޖިލީހަށް މައުރޫފް ހުށަހެޅުއްވި ގަރާރުގައި ބުނެފައި ވަނީ އިސްލާމީ ޝަރީއަތުގައި ނުވަތަ ގާނޫނުގައި ކަނޑައެޅިގެން މަނާކޮށްފައި ނުވާ ކޮންމެ ކަމެއް ކުރުމުގެ މިނިވަންކަން ގާނޫނުއަސާސީގެ 19 ވަނަ މައްދާއިން ދިވެހި ކޮންމެ ރައްޔިތަކަށް ވެސް ކަށަވަރު ކޮށްދީފައިވާ ކަމަށާއި އެމީހަކު ބޭނުން ވަޒީފާއެއް އަދާ ކުރުމުގެ މިނިވަންކަން ގާނޫނުއަސާސީގެ 37 ވަނަ މާއްދާއިން ކަށަވަރު ކޮށްދީފައިވާ ކަމަށެވެ.
ނަމަވެސް ތުނބުޅި މަތިމަސް ބެހެއްޓުމާއި ބުރުގާ އެޅުމަކީ އިސްލާމީ ޝަރީއަތާއި ގާނޫނުތަކާ ހިލާފު ކަމަށް ނުވި ނަމަވެސް ފަތުރުވެރިކަމުގެ ވިޔަފާރި ހިންގާ ބައެއް ތަންތަނުގެ ހެދުންއަޅަންޖެހޭ މިންގަނޑުގެ ދަށުން އެކަންކަން ކުރުމަށް ހުރަސް އެޅޭ ކަމަށް މައުރޫފުގެ ގަރާރުގައި ބުނެފައިވެ އެވެ.
އެކަމުގެ ސަބަބުން ފަތުރުވެރިކަމުގެ ސިނާއަތުގައި މަސައްކަތް ކުރަން ބޭނުންވާ މީހުންގެ ތެރެއިން ބުރުގާ އަޅާ އަންހެނުންނާއި ތުނބުޅި މަތިމަސް ބަހައްޓައިގެން މަސައްކަތް ކުރަން ބޭނުންވާ ފިރިހެނުންގެ ވަޒީފާ އަދާކުރުމުގެ ހައްގަށް ހުރަސް އެޅޭ ކަމަށް މައުރޫފުގެ ގަރާރުގައި ބުނެފައިވެ އެވެ.
އެހެންކަމުން ފަތުރުވެރިކަމުގެ ވިޔަފާރި ހިންގާ ތަންތަނުގެ މުވައްޒަފުން ތަބާވާންޖެހޭ ހެދުންއެޅުމުގެ ގަވާއިދު އެކުލަވައިލުމުގެ ރިއާޔަތް ކުރަންޖެހޭ އެއްހަމަ، އާންމު މިންގަނޑެއް ނުވަތަ އުސޫލެއް އެކުލަވައިލުމަށް އެ ގަރާރުން ސަރުކާރަށް ގޮވާލައިފައިވެ އެވެ.
