އެއްވެސް ފަނޑިޔާރެއްގެ މައްސަލަ އެ ކޮމިޝަނުން ބަލަމުންދޭތޯ ސުވާލު ކުރުމުން ޖުޑީޝަލް ސާވިސް ކޮމިޝަން (ޖޭއެސްސީން) އިން މައުލޫމާތު ދޭން ދެކޮޅު ހަދައިފި އެވެ.
އެއްވެސް ފަނޑިޔާރެއްގެ މައްސަލަ ބަލަމުންދާތޯ ޖޭއެސްސީގެ ސެކްރެޓަރީ ޖެނެރަލް އާމިނަތު ނަދާއާ "އަދަދު" އިން ސުވާލު ކުރުމުން އޭނާ ވިދާޅުވީ ފަނޑިޔާރެއްގެ މައްސަލަ ޖޭއެސްސީއަށް ހުށަހަހެޅުމުން، އެ މައްސަލަ ހާމަ ނުކުރާ ގޮތަށް އެ ކޮމިޝަނުގެ ޕޮލިސީ ބަދަލުކޮށްފައިވާ ކަމަށެވެ.
ނަދާ ވިދާޅުވީ ފަނޑިޔާރެއްގެ މައްޗަށް ތުހުމަތު ކުރެވޭ މައްސަލައެއްގެ ތަފުސީލް މިހާރު ހާމަ ކުރަމުންދަނީ ހަމައެކަނި އެ މައްސަލައެއް ފަނޑިޔާރުގެ މައްޗަށް ސާބިތުވުމުން ކަމަށެވެ.
"ކޮމިޝަންގެ ޕޮލިސީ އޮތް ގޮތުން ފަނޑިޔާރެއްގެ މައްސަލަ ހުށަހެޅުމުން މިހާރު އެ މައްސަލަ ހާމައެއް ނުކުރޭ. މައްސަލައެއް ހާމަކުރަނީ ފަނޑިޔާރެއްގެ މައްޗަށް ސާބިތުވީމަ،" އޭނާ ވިދާޅުވި އެވެ.
މީގެކުރިން ފަނޑިޔާރެއްގެ މައްސަލަ ޖޭއެސްސީއަށް ހުށަހެޅުމުން އެކަން ހާމަކުރެ އެވެ. އަދި އެއަށްފަހު މައްސަލައާ މެދު އަމަލުކުރާ ގޮތާއި ސާބިތު ނުވިޔަސް އެކަން ވެސް ހާމަކުރެ އެވެ.
ސިޔާސީ ޕާޓީތަކުން ބޭނުންވުމުން ރައްޔިތުންގެ މަޖިލީހުގެ މެންބަރުންގެ މަގާމު ގެއްލުވައިލެވޭ ގޮތަށް ގާނޫނުއަސާސީއަށް ގެނައި ބަދަލު ބާތިލު ކުރަން ކަނޑައެޅުމަށް، ރައްޔިތުންގެ މަޖިލީހުގެ ކެންދޫ ދާއިރާގެ ކުރީގެ މެންބަރު އަލީ ހުސައިން ހުށަހެޅި މައްސަލައަށް ސަރުކާރުން ނުފޫޒު ފޯރުވަމުންދާ ކަމަށް އިދިކޮޅު އެމްޑީޕީން ވަނީ ތުހުމަތުކޮށްފަ އެވެ.
އެމްޑީޕީން ބުނީ ސުޕްރީމް ކޯޓުގެ ތިން ފަނޑިޔާރުން ވަކިކޮށް، ހުސްވާ މަގާމުތަކަށް އައްޔަން ކުރަން ނިންމާފައި ވަނީ ޕްރޮސެކިއުޓާ ޖެނެރަލް އައްބާސް ޝަރީފްގެ އިތުރުން، މި ސަރުކާރުގެ ސިޔާސީ މަގާމުތައް ފުރަމުން ގެންދާ ދެ ބޭފުޅެއް ކަމަށެވެ.
މިކަމާ ގުޅޭ ގޮތުން މިހާތަނަށް ސަރުކާރުގެ އިތުރުން ސުޕްރީމް ކޯޓުން އަދި ޖޭއެސްސީން ވެސް އެއްވެސް އެއްޗެއް ބުނެފައެއް ނުވެ އެވެ.
